Ads by Google Ads by Google

Tala otooto o Fa’amasinoga


[ata: archive]
ausage@samoanews.com

ELIJAH LEASAU

 

Ua molia nei e le malo le ali’i o Elijah Leasau i le moliaga mamafa e tasi o le umia fa’asolitulafono o vaega o le laau fa’asaina o le mariuna, e mafua mai i se fa’alavelave na tula’i mai i le fa’aiuga o le tausaga na te’a nei, ina ua taofia e Leoleo le ta’avale a le ua molia ina ua masalomia lona fa’atautaia o le ta’avale ae o loo fa’asua’ava, peita’i na maua ai e Leoleo ma se vaega laititi o le laau fa’asaina i totonu o le ta’avale.

 

O ni isi o vaaiga sa molimauina e Leoleo i le taimi na latou taofia ai le ta’avale a le ua molia e pei ona taua i fa’amaumauga a le fa’amasinoga, mo le molimauina lea o le mumu o mata o le ua molia.

 

O le vaiaso na te’a nei na tula’i ai Leasau i luma o le fa’amasinoga fa’aitumalo mo le ulua’i taimi, ma ua tatalaina nei o ia i lalo o tuutuuga e tatau ona usita’i i ai, ma o ni isi o ia tuutuuga e aofia ai le fa’asa lea ona ia toe tagofia le ‘ava malosi poo fualaau fa’asaina, fa’asa ona ia toe soli se tulafono, a ia avea o ia ma tagatanu’u lelei e tausisi i tulafono a le malo.

 

O le vaiaso nei lea ua fa’amoemoe e fa’ataunu’u ai le ulua’i iloiloga o le mataupu a Leasau i luma o le fa’amasinoga fa’aitumalo.

 

AVETONU ALOTU

 

O le ali’i lea ua tu’uaia e le malo i moliaga mama e tolu o le fa’ao’olima i le tulaga tolu, e mafua mai i le fa’alavelave lea na ia fa’ao’olima ai i lana uo teine, o le uncle a lana uo teine atoa ai ma le atali’i a lona uncle, ua poloaina e le fa’amasinoga fa’aitumalo o ia ina ia aua ne’i ona toe taumafai i soo se auala e fa’afeso’ota’i i latou uma o loo a’afia i le mataupu e pei ona tu’uaia ai o ia e le malo.

 

O le vaiaso na te’a nei na tula’i ai le ali’i o Avetonu Alotu i luma o le fa’amasinoga fa’aitumalo, ma ia teena uma ai moliaga fa’asaga ia te ia, e pei ona fa’ailoa e lana loia fautua ia Mathoni McCormick i luma o le fa’asinoga.

 

E pei oa taua i fa’amaumauga a le fa’amasinoga e fa’apea, o se feeseeseaiga i le va o le ua molia ma lana uo teine, na i’u ai loa i lona fa’ao’olima ia te ia, ona sulu loa o lana uo teine i lona uncle mo se fesoasoani, peita’i sa tula’i mai ai ma le isi fa’alavelave e pei ona tu’uaia ai le fa’ao’olima o le ua molia i le uncle ma lona atali’i.

 

O lo o tu’uaia fo’i e le malo le i ai o se a’upega sa i le ali’i ua molia i le taimi na tula’i mai ai le fa’alavelave, peita’i na te le’i fa’aaogaina lea a’upega, ae na avea lea ma itu na lagona ai le fefe ma le le mautonu o lana uo teine ona o le saogalemu a lona aiga.

 

E $300 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atalitali ai taualumaga o lona fa’amasinoga lea ua fa’agasolo i luma o le fa’amasinoga fa’aitumalo, ae a mafai ona tatala o ia i tua, ua poloaina o ia ina ia aua ne’i ona toe taumafai e fa’afeso’ota’i i latou uma o loo avea ma molimau a le malo i lenei mataupu, e aofia ai lana uo tama’ita’i fa’apea ai lona uncle ma lona atali’i.

 

Ua fa’asa ona ia toe soli se tulafono, pe toe latalata fo’i i fale ma nofoaga o loo i ai i latou e pei ona taua, a ia avea o ia ma tagatanu’u lelei e tausisi i tulafono a le malo.

 

Saunoa le afioga i le ali’i fa’amasino ia Fiti Sunia e fa’apea, o se tasi o itu o loo fa’avae i ai le fa’aiuga a le fa’amasinoga e fa’atulaga se tupe e tatala ai le ua molia i tua, ona o loo maua i fa’amaumauga a le fa’amasinoga, sa ta’usala fo’i o ia i moliaga o le fa’ao’olima i le tulaga tolu atoa ai ma le fa’atupu vevesi i nofoaga faitele i le 5 tausaga talu ai, ma e atagia mai ai o loo tutusa lava ituaiga moliaga ia sa ta’usala muamua ai o ia, ma moliaga lea ua toe a’afia ai fo’i o ia i le taimi nei.

 

SEMURANA LEAUMOANA

 

Ua poloaina nei e le fa’amasinoga maualuga le toe taofia o le ali’i o Semurana Leaumoana i le toese i Tafuna, mo le tuliina lea fa’amae’a o masina e 16 o loo totoe o lana fa’asalaga fa’a falepuipui sa fa’amalumalu talu mai le tausaga e 2013, ina ua fa’amaonia e le fa’amasinoga ua ia le usitaia ni isi o tuutuuga o lana nofovaavaaia sa tu’uina atu e le fa’amasinoga.

 

O ni isi o poloaiga o le nofovaavaaia a Leaumoana ina ua ta’usala o ia e le fa’amasinoga maualuga i le moliaga o le talepe fale i le tulaga luai, e mafua mai i le fa’alavelave lea na la osofaia ai ma se isi ali’i se fale Su’isu’i fa’apea ai le lala o le Ofisa o le Western Union i Puapua, o le totogi lea o le salatupe e $ 1,000, peita’i e oo mai lava i le taimi e na o le $200 le tupe lea ua mae’a ona totogi e le ua molia.

 

E 28 masina na poloaina e le fa’amasinoga e taofia ai le ua molia i le toese i Tafuna, o se tasi lea o tuutuuga o lana nofovaavaaia e 7 tausaga, peita’i e na o le 12 masina na ia tuliina ae tatalaina loa o ia i tua e saili sana galuega e totogi ai lana salatupe, ae fa’amalumalu ai loa le isi 16 masina mai lana fa’asalaga fa’a falepuipui.

 

Talu ai o lea ua ia le usitaia tuutuuga o lana nofovaavaaia, ua poloaina nei e le fa’amasinoga le ua molia ina ia tuli masina e 16 sa fa’amalumalu o lana fa’asalaga, ae o le a fa’amagalo le isi vaega o lana salatupe o loo totogi e le’i totogiina.