Ads by Google Ads by Google

Tala otooto o Fa’amasinoga


[ata: archive]
ausage@samoanews.com

PALEMIA SALANOA

 

Ua talia e le fa’amasinoga maualuga le talosaga a le ali’i o Palemia Salanoa, ina ia tu’uina atu se isi avanoa e mafuta fa’atasi ai ma lona aiga, i le mae’a ai lea ona ta’usala o ia i lona le usitaia o tuutuuga o lana nofovaavaaia e 24 masina sa tu’uina atu e le Fa’amasinoga.

 

Ae na fa’ailoa e le fa’amasino sili ia Michael Kruse ia Salanoa ananafi e fa’apea, afai na te toe soli se tuutuuga se tasi o tuutuuga uma ua tu’uina atu e le fa’amasinoga e usita’i i ai, o le a poloaina loa o ia na te tuua le teritori o Amerika Samoa, ae toe fa’afo’i atu o ia i lona atunu’u mo le umi o lana nofovaavaaia o loo totoe.

 

I le ta’usala ai o Salanoa i lona le usitaia o tuutuuga o lana nofovaavaaia, ua poloaina ai loa le taofia o ia i le falepuipui i Tafuna, fa’atoa tatala mai i le aso 10 Mati, ona tu’u atu ai loa lea o aso e 90 e saili ai sana galuega tumau e totogi ai lana sala, ae afai e mae’a aso e 90 e le maua lava sana galuega, ona poloaina ai loa lea o ia na te tuua le atunu’u ae toe fo’i atu i lona aiga i Samoa ma aumau ai mo le umi o lana nofovaavaaia.

 

FREDERICK CRICHTON & TONY FA’ATAU KOME

 

Ua talia e le fa’amasinoga maualuga le fa’afinauga a le ali’i loia ia Douglas Fiaui o loo tula’i mo Frederick Crichton ma Tony Fa’atau Kome, ina ia fa’atulaga loa se aso e faia ai le fa’amasinoga autu o le mataupu o loo tu’uaia ai nei ali’i e le malo, i le mae’a ai lea o feutanaiga sa faia ma le itu a le malo, ma manino ai le faigata lea ona faia e itu e lua o se maliliega aufa’atasi e fa’amuta ai lenei mataupu.

 

I le iloiloga lona lua o lenei mataupu i luma o le fa’amasinoga maualuga i le taeao ananafi, na fa’ailoa ai e Fiaui i le fa’amasinoga le mae’a lea ona tauaao e Crichton ma Kome o mau fa’amaonia mai le malo e tusa ai o tu’uaiga fa’asaga ia tei laua, peita’i o loo tumau pea lo la teena o moliaga o loo tu’uaia ai i laua e le malo.

 

O lo o fa’aauau pea le taofia o Crichton ma Kome i le toese i Tafuna e fa’atali ai le aso lea ua fa’atulaga e faia ai le la fa’amasinoga autu.

 

Ae pei ona manino i fa’amaumauga a le fa’amasinoga, o lo o tu’uaia e le malo ali’i talavou nei i moliaga mamafa e lua o le fa’aoolima i le tulaga muamua fa’apea ai ma le talepe fale i le tulaga muamua, e mafua mai i le fa’alavelave lea na tula’i mai i le po o le aso 12 Novema 2016 i Iliili, lea o loo tu’uaia ai i laua i lo la fa’ao’olima i se isi ali’i, atoa ai ma le taumafai lea e fa’aleaga le fale o le ali’i na a’afia ina ua sulu o ia i totonu i lona fale o loo i ai lona aiga.

 

O le ulua’i iloiloga o lenei mataupu i luma o le fa’amasinoga fa’aitumalo i le masina o Tesema o le tausaga na te’a nei, na finau ai le ali’i loia ia Fiaui ina ia solofua moliaga o loo tu’uaia ai i Crichton ma Kome, ona e le o lava mau a le malo e lagolago ai ia tu’uaiga.

 

Ae ina ua mae’a ona iloilo e le afioga i le ali’i fa’amasino ia Fiti Sunia o mau fa’amaonia sa tu’uina atu e le malo, atoa ai ma le molimau a le Leoleo sa su’esu’eina le mataupu, na faia ai loa le fa’aiuga ina ia tu’uina atu lenei mataupu i luma o le fa’amasinoga maualuga e fa’agasolo ai feutanaiga a itu e lua, poo le faia fo’i lea o se fa’amasinoga autu e iloilo ai se fa’aiuga amiotonu o lenei mataupu.