Ads by Google Ads by Google

Tala otooto o Fa’amasinoga


[ata: archive]
ausage@samoanews.com

FEGAUIA’I SAGOTE

 

O le aso 13 Aperila i le taeao lea ua fa’atulaga e le fa’amasinoga maualuga, e tu’u atu ai lana fa’asalaga fa’asaga i le tama’ita’i o Fegauia’i Sagote, i le mae’a ai lea ona ta’usala o ia e le fa’amasinoga i le vaiaso na te’a nei i le moliaga mamafa o le gaoi, e mafua mai i le fa’alavelave lea na ia faia ai se gaioiga tau fa’avalea ina ia mafai ai ona ia ave fa’agaoi le silia i le $8,000 mai se aiga Samoa e nonofo i Niu Sila.

 

I le va o le masina o Setema e oo atu ia Tesema o le 2015 i Amerika Samoa, e pei ona taua i tuutuuga o le maliliega na sainia e Sagote ma le malo, lea fo’i ua talia e le fa’amasinoga maualuga, na faia ai se feutanaiga i le va o Sagote ma se uluali’i Samoa e nonofo sitiseni i Niu Sila, ina ia faia e le ua molia ni aoaoga mo le fanau a le ulugali’i ina ia mafai ai ona ulufale i vaega ‘au a le malo tele.

 

I le tali ioe ai o Sagote i le moliaga e pei ona ta’usala ai o ia e le fa’amasinoga maualuga, sa ia ta’utino ai e faapea, i le va o le masina o Setema ma Tesema o le 2015 na fa’atinoina ai e le ua molia le solitulafono o le gaoi e pei ona ta’usala ai o ia e le fa’amasinoga.

 

Na fa’ailoa e le ua molia i le ulugali’i e fa’apea, o ia o le sui o Vaega o le Ami a le malo tele i totonu o Amerika Samoa, e mafai fo’i ona ia faia aoaoga e avea ai le fanau a le ulugali’i na a’afia ma totino o vaega ‘au a le malo tele o Amerika.

 

O le naunau tele o si ulugali’i Samoa o loo sitiseni i Niu Sila ina ia avea le la fanau ma totino o le vaega ‘au a le malo tele, e ala lea i le faia e le ua molia o ni aoaoga mo i laua, na amata ai loa ona la lafoina mai tupe ia Sagote ina ia fa’atupe ai lea fa’amoemoe, peita’i i le tuana’i ai o ni nai masina, na manino ai le ulugali’i e le fa’amaonia fa’amatalaga a le ua molia, ae ua leiloa ai le la vaega tupe e silia i le $8,000 (tupe Amerika).

 

O lo o taofia pea le ua molia i le toese i Tafuna e fa’atali ai le aso lea ua fa’atulaga e lau ai lana fa’asalaga.

 

O le moliaga o le gaoi, e mafai ona fa’asala ai se tasi i le toese i Tafuna mo le umi e le silia i le 7 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga ia e lua.

 

UATAU FALANA’I

 

E 5 tausaga lea ua fa’asala ai e le fa’amasinoga maualuga le ali’i o Uatau Falana’i ma le tuutuuga, a mae’a ona ia tuliina le fa’salaga e 5 tausaga i totonu o le falepuipui, ona ia tuua loa lea o le atunu’u ae aumau ai i fafo atu mo le umi e 15 tausaga o lana faasalaga faanofovaavaaia.

 

E 3 moliaga mamafa na ta’usala ai e le fa’amasinoga le alii o Falana’i, i le mae’a ai lea ona talia e le fa’amasinoga o le maliliega na sainia e le ua molia ma le malo. O ia moliaga e aofia ai le moliaga o le taumafai e fa’atino le solitulafono o le talepe fale i le tulaga muamua, atoa ai ma moliaga e 2 o le talepe fale i le tulaga muamua.

 

Ina ua talia e le fa’amasinoga le maliliega na sainia e itu e lua, na talosaga ai loa le malo ina ia solofua isi moliaga o loo totoe ai i le pepa o tagi sa latou fa’aulu, lea fo’i na talia e le fa’amasinoga.

 

Na fa’atoese le ua molia e tusa ai o lana solitulafono sa faia, ma ia talosagaina ai se isi avanoa o ia se’i toe fo’i atu ai i tua i lona aiga e tautua ona matua. Na taua e Falana’i e faapea, ua avea lana solitulafono ua fai lea ma fa’ata’ita’iga leaga i tupulaga talavou a Amerika Samoa, o loo naunau e fa’atino mea lelei ma aoga mo latou olaga.

 

Sa ia ta’utino i le fa’amasinoga le aoga o masina e tele na taofia ai o ia i le toese, lea ua mafai ai ona ia a’oa’oina lesona aoga mo lona olaga mo le lumana’i.

 

Na talosaga le loia a Falana’i ia Douglas Fiaui i le fa’amasinoga ina ia tu’u atu se isi avanoa mo le ua molia, ina ia mafai ai ona toe fuata’i lona olaga mai mea sese e tele o loo ia faia, peita’i na finau le loia a le malo ia Gerald Murphy ina ia fa’asala le ua molia i se fa’asalaga maualuga, ona e le o se taimi muamua lenei ua ta’usala ai o ia i ituaiga solitulafono nei, aemaise lava i le soitulafono o le talepe fale.

 

O le mataupu e pei ona ta’usala ai Falana’i e le fa’amasinoga, na afua mai i ni fa’alavelave na tula’i mai i le tausaga na te’a nei i totonu o Tafuna, lea na ia ulufale fa’amalosi ai i totonu o fale o ni aiga se to’atolu ma le fa’amoemoe e fa’atino ai le solitulafono o le gaoi.

 

Na avea le ulufale fa’amalosi o le ua molia i totonu o aiga na a’afia ma itu a fa’apopoleina ai i latou mai lo latou saogalemu, aemaise lava i lona taumafai lea e faia ni uiga mataga i tama’ita’i e nonofo ai i aiga na a’afia i latou i lana gaioiga.

 

E 15 tausaga na manatu le fa’amasinoga e fa’asala ai Falana’i i le falepuipui, peita’i ua fa’amalumalu lona tuliina o lea fa’asalaga mamafa, ae ua faanofovaavaaia o ia mo le 15 tausaga i lalo o poloaiga e ao ona ia usita’i i ai, e aofia ai lona tuliina o tausaga e 5 i totonu o le toese, a mae’a, ona ia tuua lea o le teritori ma aumau ai i fafo atu mo le umi e 15 tausaga o lana nofovaavaaia.