Tala otooto o Fa’amasinoga


[ata: archive]
ausage@samoanews.com

MICHAEL AGASIVA

 

Ua teena e le susuga a Michael Agasiva tu’uaiga a le malo fa’asaga ia te ia, i le mae’a ai lea o lana ulua’i iloiloga lea na fa’atautaia i luma o le Fa’amasinoga Maualuga i le taeao ananafi. I lona teena ai o tu’uaiga fa’asaga ia te ia, ua fa’atulaga ai loa e le fa’amasinoga lana ulua’i iloiloga e faia lea i le masina o Mati o le tausaga nei.

 

O loo tu’uaia e le malo le susuga a Agasiva i le moliaga o le talepe fale i le tulaga lua, tagofia o itutinosa o se tama’ita’i i le tulaga muamua, atoa ai ma le fa’atupu vevesi i nofoaga faitele.

 

O ia moliaga na afua mai i se fa’alavelave na tula’i mai i le taeao o le aso o le tausaga fou na te’a nei, ina ua ulufale fa’amalosi le ua molia i totonu o le fale o se fafine ma ia faia i ai ni uiga mataga, e pei ona tu’uaia ai o ia e le malo.

 

Na taua e le fafine na a’afia i Leoleo e fa’apea, o le mae’a ai o se fiafia a le latou aiga sa faia i le po o le tausaga fou na te’a nei, na manatu ai loa e fo’i i lona aiga e fai sana malologa ina ua latalata i le taeao pe tusa o le itula e 5:00.

 

O luga o le nofoa sa i luma o le potu malolo o le fale na alu atu le fafine ma moe ai, peita’i ina ua o ese lana fanau mai le fale i le taeao lea, sa galo ia tei latou ona loka le faitoto’a, o iina la lea o loo tu’uaia e le malo ia Agasiva na mafai ai ona ia ulufale i totonu o le fale, ma ia fa’atinoina loa uiga mataga i le fafine na a’afia e pei ona tu’uaia ai o ia e le malo.

 

O loo taofia pea Agasiva i le toese i Tafuna i le taimi nei, ina ua le mafai ona ia totogi le tupe e $5,000 ua mae’a ona fa’atulaga e le fa’amasinoga e tatala ai o ia i tua, peita’i afai e mafai ona ia totogiina le tupe ma tatala ai o ia i tua, ua fa’atonuina e le fa’amasinoga o ia ina ia aua ne’i ona toe taumafai e fa’afeso’ota’i le fafine na a’afia i soo se auala, pe toe alu ai fo’i i lona fale.

 

Ua fa’asa ona ia toe soliina se tulafono a le malo, a ia avea o ia ma tagatanu’u lelei e tausisi i tulafono a le malo i taimi uma.

 

O le tama’ita’i loia ia Sharron Rancourt lea ua avea nei ma loia fautua a Agasiva, ae o le ali’i loia ia Gerald Murphy lea ua avea nei ma loia a le malo mo lenei mataupu.

 

RICHARD TUANA’I

 

E 12 masina lea ua nofovaavaai ai le ali’i o Richard Tuana’i i luma o le fa’amasinoga fa’aitumalo, i le mae’a ai lea ona ta’usala o ia e le fa’amasinoga i le moliaga o le fa’atupu vevesi i nofoaga faitele, atoa ai ma le tu fua i le fanua poo le fale o le isi aiga. I le ta’usalaina ai e le fa’amasinoga o Tuana’i i moliaga mama e lua, i lalo o se maliliega sa latou sainia ma le malo ma talia e le fa’amasinoga, na solofua ai loa e le fa’amasinoga le moliaga mama o le fa’aoolima i le tulaga tolu.

 

O se fa’alavelave na tula’i mai i le masina o Novema o le tausaga na te’a nei i Nu’uuli, ina ua tula’i mai se vevesi i le va o le ua molia ma se ali’i la te tuaoi, ma alu ai loa le ua molia i le fale o le ali’i lea ma tauanau o ia la te fufusu, e mafua mai i se taugaupu na amata mai i se ta’aloga Volipolo.

 

Na fa’atoese le ua molia e tusa ai o lana solitulafono sa faia, peita’i na saunoa le afioga i le ali’i Fa’amasino ia Fiti Sunia e fa’apea, o le taimi lava e le mafai ai e le tagata ona fa’atonutonu lona ita, ona tula’i mai ai loa lea o isi la’asaga e ono a’afia ai lona olaga.

 

O ni isi o tuutuuga o le nofovaavaaia a Tuana’i e aofia ai le aua ne’i ona toe solia se tulafono, fa’asa ona ia toe alu i le fale o le ali’i na la vevesi, ma ia totogi le salatupe e $125.

Comment Here