Ads by Google Ads by Google

Tala otooto o Fa’amasinoga

ausage@samoanews.com

MATAUPU MAMONA

 

O le taeao nei lea ua fa’atulaga e amata aloaia ai taualumaga o le fa’amasinoga autu a le ali’i o Mataupu Mamona, lea o lo o tu’uaia i le fa’alavelave lea na maliu ai lona to’alua i le amataga o le tausaga na te’a nei.

 

O lo o tu’uaia e le malo ia Mamona i moliaga mamafa e lua o le fasioti tagata i le tulaga lua, atoa ai ma le fa’ao’olima i le tulaga muamua, o ni moliaga e mafai ona fa’asala ai se tasi i le toese mo le umi e amata atu i le 10 tausaga e oo atu lava i le nofosala i le toese mo le olaga atoa.

 

O le tu’uaiga fa’asaga ia Mamona na alia’e mai ina ua taofia lona faletua i le falema’i, i le mae’a ai lea ona taua e le ua molia i Leoleo le taumafai o lona to’alua e pule i lona ola, peita’i i ni nai aso mulimuli ina ua maua e Leoleo isi fa’amatalaga fou e fa’atatau i le fa’alavelave na tula’i mai, ina ua fa’ailoa e le atali’i o le ua molia i tamaiti o le aoga ma oo atu ai i le faiaoga fa’amatalaga e fa’atatau i le fa’alavelave e pei ona tu’uaia ai lona tama, na fa’atutu ai loa su’esu’ega a Leoleo i le ua molia, ma i’u ina molia ai loa o ia i moliaga mamafa e pei ona taofia ai o ia i le toese i Tafuna i le taimi nei.

 

O le vaiaso na te’a nei na faila ai e le loia a Mamona ia Douglas Fiaui sana talosaga i le fa’amasinoga maualuga, mo se avanoa e aua ai nei fa’aaoga i le taimi o le fa’amasinoga ni isi o mau fa’amaonia ua sauni le malo e tu’uina atu i luma o le vaega iloilo iuga.

 

GERHARD OTTO HALECK

 

O le taeao nei lea ua fa’amoemoe e tula’i ai le ali’i o Gerhard Otto Haleck i luma o le fa’amasinoga maualuga, ma le faamoemoe e fa’agasolo ai taualumaga masani e aofia ai ma le tu’uina atu o lana tali tete’e e tusa ai o le moliaga mamafa e tasi lea ua tu’uaia ai o ia e le malo, o lona umia fa’asolitulafono lea o vaega o fualaau fa’asaina o le mariuana.

 

O le mataupu e pei ona tu’uaia ai e le malo ia Haleck, na alia’e mai i le fa’alavelave lea na maua ai e ali’i Ofisa o le Tiute vaega o fualaau fa’asaina i totonu o le afifi lea na alu atu Haleck e piki mai i le falema’i i Fagatogo i le masina lenei.

 

I totonu o le afifi na alu le ua molia e piki mai i le falemeli, le gata sa i ai lana fagu pauta fa’atupu maso, ae sa maua ai fo’i ma vaega o fualaau faasaina, lea na fa’ailoa e le ua molia i ali’i Leoleo, na te le iloaina po o ai e ana fualaau fa’asaina sa aumai i totonu o le afifi.

 

O lo o tumau pea tuutuuga o lo o tatala ai le ua molia i tua e fa’atali ai taualumaga o lana mataupu lea ua tofu atu nei i luma o le fa’amasinoga maualuga.

 

DANNY MIKA

 

E lei atoa se afa itula talu ona mae’a ona faia le poloaiga a le fa’amasinoga maualuga i le aso Faraile na te’a nei, mo le pu’eina fa’apagota mai lea o le ali’i o Danny Mika ina ua le tali i le taimi na valaau ai lana mataupu, ae ulufale loa o ia i totonu o le potu fa’amasino.

 

Na siisii le si’u fofoga o le fa’amasino sili ia Michael Kruse i le taimi na toe valaau ai le mataupu a Mika, ona o le le tausisi o le ua molia i tuutuuga na tatala ai o ia i tua, e aofia ai le tatau lea ona auai i soo se taimi e valaau ai lana mataupu.

 

Na toe fa’aleaoga e le fa’amasinoga lana poloaiga e taofia ai Mika i le toese, ae ua fa’atonuina o ia ina ia malie e faia se suiga i lona tino i soo se taimi e fa’atonuina ai o ia e se sui o le Ofisa Fa’anofovaavaaia, ina ia mautinoa na te le o toe tagofia fualaau fa’asaina poo le ‘ava malosi.

 

O lo o tu’uaia e le malo ia Mika i le moliaga mamafa o lona umia faasolitulafono o vaega o le pauta fa’asaina o le aisa, ma o loo tumau pea poloaiga o loo tatala ai o ia i tua, e fa’atali ai lana iloiloga lea ua fa’atulaga e faia i le aso 3 Fepuari.