Ads by Google Ads by Google

Tala otooto o Fa’amasinoga

ausage@samoanews.com

MATTHEW BARJA

 

Ua toe tolopo fo’i e le fa’amasinoga le tu’uina atu o sana fa’asalaga e tusa ai o le mataupu fa’asaga ia Matthew Barja, ina ua le mafai e le malo ona faamalie le finagalo o le fa’amasinoga i fa’amaumauga sa naunau ali’i fa’amasino e fia fa’afofoga ma vaai i ai.

 

O le tausaga na te’a nei na ta’usala ai e le fa’amasinoga maualuga le ali’i o Barja i le moliaga mamafa o le gaoi, e mafua mai i le fa’alavelave lea na latou osofaia ai ma ni ali’i talavou se to’alua le ofisa autu o le Aoga Maualuga i Tafuna, ma gaoia ai le tele o meaaoga e aofia ai masini laptops, ma iPads.

 

Na taua e Barja i le fa’amasinoga, e 7 iPads sa ia toe fa’afo’iina i Leoleo, 2 laptops, 1 le laptop laititi, atoa ai ma uaea ma isi totoga o masini sa ia gaoia.

 

I le lua vaiaso talu ai, na fa’atonuina ai e le faamasinoga le itu a le malo ina ia tu’uina atu mea uma sa maua mai e Leoleo ia Barja, ma ia fa’amaonia atu e le malo ua mae’a ona faila moliaga fa’asaga i ali’i talavou e to’alua ia sa i ai fa’atasi i le osofaiaina o le faleaoga ma le ua molia.

 

Ae i le aso Faraile na te’a nei, e le gata e lei mafai e le malo ona faamaonia i luma o le fa’amasinoga lo latou failaina o moliaga fa’asaga i ali’i talavou se auai fa’atasi i le osofaiga, ae na o le 6 fo’i iPads sa latou tu’uina atu i luma o le fa’amasinoga, e ui e 7 iPads lea o lo o taua e Barja sa ia toe fa’afo’i i Leoleo.

 

O isi mea uma na fa’afo’i e le ua molia i Leoleo e pei o laptops ma uaea na atoa uma atu i luma o le fa’amasinoga i le vaiaso na te’a nei.

 

Na fa’ailoa e le fa’amasinoga i le loia a le malo ia Gerald Murphy e fa’apea, e le iloa pe aisea ua tuai ai ona molia e le malo ali’i talavou sa a’afia i lenei mataupu, ae o lea ua mae’a ona fa’ailoa e ali’i ia i Leoleo, “e le o se taimi muamua lea ua latou osofaia ai le faleaoga i Tafuna”.

 

O le aso Faraile o le vaiaso nei lea ua toe tolopo i ai le iloiloga o lenei mataupu, ma o lo o taofia pea Barja i le toese i Tafuna e fa’atali ai le isi ana iloiloga.

 

TIE JEFFREY LOMON

 

E 6 masina lea ua fa’asala ai e le fa’amasinoga maualuga le ali’i o Tie Jeffrey Lomon i le toese i Tafuna, ina ua ta’usala o ia e le fa’amasinoga i le moliaga mamafa o le gaoi, i lalo o se maliliega na latou sainia ma le malo ma talia e le fa’amasinoga.

 

Na fa’atoese le ali’i o Lomon, 20 tausaga le matua i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i lona aiga e tausi ona matua ma fai sona aoga i le nu’u ma le ekalesia.

 

Na tutu fa’atasi loia a itu e lua e talosaga i le fa’amasinoga mo se avanoa e tu’uina atu mo lenei ali’i talavou, aemaise ai le tatau lea ona tu’uina atu o ia e auai i ni aoaoga e fesoasoani ai i le fa’afitauli o le ‘ava malosi o lo o a’afia ai o ia.

 

Na taua e le loia a le malo ia Gerald e fa’apea, o se tasi o fa’afitauli o lo o mafua ai ona a’afia Lomon i le fa’atinoina o solitulafono, o lona fiafia lea e tagofia le ‘ava malosi, ma ua atagia mai ai fo’i, afai ae tele se vaega o le ‘ava malosi na te tagofia, o le a’afia fo’i lena o ia i isi mafaufauga le lelei, ma i’u i lona fa’atinoina ai o solitulafono eseese.

 

Na talosaga le loia a le malo i le fa’amasinoga ina ia tu’u se avanoa ia Lomon e alu ai e auai i aoaoga fa’a faufautua, e fesoasoani ai i le fa’afitauli o le ‘ava malosi.

 

E 5 tausaga lea ua nofovaavaaia ai le ua molia i lalo o poloaiga e ao ona ia usita’i i ai, ma o ni isi o ia poloaiga e aofia ai le fa’asa lea ona ia toe tagofia le ‘ava malosi, fa’asa ona ia toe soli se tulafono, a ia auai i ni aoaoga e fesoasoani ai i le fa’afitauli o le ‘ava malosi o lo o a’afia ai o ia.

 

E 20 masina sa manatu le fa’amasinoga maualuga e fa’asala ai Lomon i le toese, peita’i o le a lava na o masina e 6 na te tuliina, ae fa’amalumalu lona tuliina o isi masina e 14 o lo o totoe ai.