Ads by Google Ads by Google

Tala otooto o Fa’amasinoga

ausage@samoanews.com

GERHARD HALECK OTTO

 

O le vaiaso na te’a nei na faila ai e le malo le moliaga mamafa e tasi o le umia faasolitulafono o vaega o le laau fa’asaina o le mariuana fa’asaga ia Gerhard Otto Haleck, e mafua mai i le fa’alavelave lea na maua ai fualaau fa’asaina i le afifi na ia alu e piki mai i le Falemeli i Fagatogo.

 

O le aoauli o le aso Lulu na te’a nei, Ianuari 03 na aga’i atu ai Haleck e piki mai se afifi na fa’atuatusi mai i le pusa meli P.O Box 1132 i lalo o le igoa o Gabriel Otto Haleck, ae na lafo mai ia Haleck mai Tacoma, WA 98445.

 

Ina ua taunu’u le ua molia i le Falemeli mo le pikiina o lana afifi, sa ia aga’i atu ai loa i le itu e masani ona siaki ai uta mai fafo mo le kiliaina, ae masalomia ai loa le i ai o ni vaega o fualaau fa’asaina i totonu o le afifi.

 

O le aso 2 Ianuari na faia ai e le Ofisa o Tiute sa latou siaki masani ina ua taunu’u mai le meli na aumai e le va’alele o le Hawaiian Air, ma fa’ailoa atu ai e le ta’ifau o Critter le i ai o vaega o fualaau i totonu o le afifi lea na alu atu Otto ma piki mai.

 

Ina ua taunu’u Gerhard Haleck i le vaega e piki ai meli, sa fesiligia o ia e sui o le Ofisa o Tiute poo ia lea o Gabriel Haleck o loo fa’atuatusi mai ai le afifi, ae na tali le ua molia e leai, o ia o Gerhard Haleck, ae o Gabriel o lona uso laititi. Na toe fesiligia o ia  e sui o le Ofisa o Tiute poo a mea o loo i totonu o le afifi, ae na tali le ua molia, o loo i ai lana fagu fa’atupu maso.

 

Na fa’aauau le su’eina o le afifi ma maua ai taga pepa iila o loo afifi ai sanuisi (sandwich) e 4, o lo o i ai lau mamago lanu meamata, ae ina ua faia i ai se suesuega na iloa ai, o lau ia o le laau o le mariuana.

 

E pei ona taua i fa’amaumauga a le fa’amasinoga, o Gerhard Haleck na a’afia ai fo’i i se mataupu e fa’atatau i se afifi sa pikiina mai i le Falemeli, lea fo’i na i ai vaega o le laau fa’asaina o le mariuana.

 

E $5,000 le vaega tupe ua totogi e tatala ai i tua le ua molia, e fa’atalitali ai taualumaga o lana mataupu lea o loo faagasolo i luma o le fa’amasinoga i le taimi nei.

 

MOSEGI SOLIA JR

 

O le masina fou o Fepuari lea ua toe tolopo i ai le lauina o le fa’asalaga a le ali’i o Mosegi Solia Jr, ina ua talia e le afioga i le ali’i fa’amasino ia Elvis P. Patea ma ana fa’amasino lagolago le talosaga a Solia Jr ma lana loia fautua ia Douglas Fiaui, mo se avanoa e toe tolopo ai le lauina o le fa’asalaga a le ua molia, ona o lo o fia auai lona faletua e molimau, ae faigata ona sa i ai o ia i le falema’i i le aso ananafi.

 

O le fa’aiuga o le tausaga na te’a nei na ta’usala ai Solia Jr i le moliaga mamafa o lona umia fa’asolitulafono o vaega o le laau fa’asaina, ina ua talia e le fa’amasinoga se maliliega na sainia e le ua molia ma le malo.

 

E lua iloiloga a Solia Jr na fa’atulaga e faia i le taeao ananafi, o le lauina o lana fa’asalaga i le mataupu “HCCR 21-15”, ma le iloiloga e fa’atatau i lona le usitaia lea o tuutuuga o lana nofovaavaaia sa tu’uina atu e le fa’amasinoga maualuga i lana mataupu “HCCR 20-10”.

 

O se tasi o tuutuuga o le poloaiga a Solia Jr i lana mataupu na tula’i mai i le 2010, o le fa’asa lea ona ia toe soli se tulafono, ae i le tausaga e 2015, na pu’e fa’apagota ai o ia ma tu’uaia i le fa’alavelave lea na tafana ai le ofisa o Leoleo i Leone.

 

Ina ua fesiligia e le fa’amasinoga le ua molia ananafi, sa ia tali ioe ai i lona le usitaia lea o tuutuuga o lana nofovaavaaia sa tu’uina atu muamua e le fa’amasinoga, sa toe fa’ailoa fo’i i ai e le fa’amasinoga e fa’apea, talu ai o lea ua fa’amaonia tu’uaiga o lona le usitaia o poloaiga a le fa’amasinoga, e ono mafai e le fa’amasinoga ona fa’aleaoga lana poloaiga sa tu’uina atu ia te ia, ae poloaina loa o ia e tuli fa’amae’a tausaga o loo totoe o lana nofovaavaaia e 15 tausaga.

 

O le aso 23 Fepuari lea ua fa’atulaga e lau ai le fa’asalaga a Solia Jr, ma tu’uina atu ai fo’i ma se fa’aiuga a le fa’amasinoga e tusa ai o le mataupu lea ua fa’amaonia ai lona le usitaia o tuutuuga o lana nofovaavaaia.

 

O afioga i ali’i fa’amasino lagolago ia Mamea Sala Jr ma Tunupopo Faleafaga na lagolago i le afioga a Patea i le iloiloina o le mataupu a Solia Jr, lea o loo taofia pea i le toese i le taimi nei e fa’atali ai le aso lea ua fa’atulaga e toe valaau ai lana mataupu.