Ads by Google Ads by Google

Tala otooto o Fa’amasinoga

ausage@samoanews.com

TO’A 10 NA TAOFIA ASO MALOLO TAUSAGA FOU

 

E to’a 10 i latou na taofia e Leoleo i le aso malolo o le tausaga fou na te’a nei, ona o tu’uaiga i le fa’atupu vevesi i nofoaga faitele atoa ai ma le tagofia o le ‘ava malosi. E pei ona taua e se Leoleo sinia i le Samoa News i le taeao ananafi, e leai se fa’alavelave matuia na tula’i mai i le aso o le tausaga fou na a’afia ai se soifua o se tagata, poo se isi fo’i na manu’a tigaina ai, se’i vagana ai lava fa’alavelave mama e pei o le ‘ona ma le fa’atupu vevesi.

 

Na teena uma e i latou na molia tu’uaiga mama fa’asaga ia te i latou ina ua tutula’i i luma o le fa’amasinoga fa’aitumalo, ma ua tatala uma nei i latou i tua e fa’atali ai taimi ma aso lea ua fa’atulaga e le fa’amasinoga fa’aitumalo e toe valaau ai a latou mataupu.

 

E pei ona taua i fa’amaumauga a le fa’amasinoga, e to’alua isi ali’i na taofia mai e Leoleo mai Iliili i le aso o le tausaga fou na te’a nei, e mafua mai i se misa na tula’i mai i se inugapia sa faia ai.

 

O le isi ali’i na taofia mai i Aua ina ua ‘ona atu i le po o le tausaga fou ma fa’ao’olima i lona to’alua, ae o isi ali’i e to’alua na taofia mai e Leoleo i Fagatogo, e mafua mai ina ua ‘ona ma lafo upu mataga i nofoaga faitele.

 

SOLOFUA MATAUPU A MEL KATRINA WELLS

 

O le mae’a ai o le ulua’i iloiloga o le mataupu a Mel Katrina Wells lea na fa’ataunu’uina i luma o le afioga i le fa’amasino ia Fiti Sunia i le vaiaso na te’a nei, na faia ai loa le fa’aiuga a le fa’amasinoga e solofua ai tu’uaiga fa’asaga ia Wells, ma le tuutuuga e i ai le avanoa o le malo latou te toe failaina ai moliaga fa’asaga i lenei mataupu.

 

O tu’uaiga fa’asaga ia Wells na alia’e mai i le fa’alavelave lea na tula’i mai i le vaiaso lona lua o le masina o Tesema na te’a nei, ina ua alu atu e piki mai se afifi sa aumai i lana pusa meli ae taofia ai o ia e ali’i Ofisa o le Tiute ina ua  masalomia, o lo o i ai i totonu o le afifi lea vaega o fualaau fa’asaina.

 

Na saili e ali’i Ofisa o le Tiute le afifi ma maua i ai se vaega o le pauta pa’epa’e e tusa ma le 3 pauna le mamafa, ae ina ua faia i ai su’esu’ega a Leoleo e uiga i lea pauta pa’epa’e, na manino ai o vaega ia o le pauta oona o le aisa.

 

O le ulua’i iloiloga la lea sa faia i le 2 vaiaso talu ai, na taumafai ai le malo e fa’ailoa i le fa’amasinoga a latou mau e lagolago ai sa i ai se solitulafono sa fa’atinoina, ae o Wells fo’i lea o loo tu’uaia i le fa’atinoina o lea solitulafono.

 

Sa tu’uaia e le malo ia Wells i le moliaga o lona umia fa’asolitulafono lea o vaega o le pauta fa’asaina o le aisa, atoa ai ma le umia fa’asolitulafono o vaega o le pauta oona o le aisa ma le fa’amoemoe e tulei ma fa’atau atu i isi tagata.

 

O mau na fa’ailoa e le malo i luma o le fa’amasinoga i lea iloiloga, e aofia ai lo latou fa’ailoa lea i le fa’amasinoga le umia fa’asolitulafono e le ua molia o vaega o le pauta fa’asaina o le aisa.

 

Na taua e le fa’amasinoga i lana fa’aiuga e fa’apea, e ui o lea ua mae’a ona fa’amaonia e le malo tulaga o le umia o fualaau fa’asaina, peita’i e tatau fo’i ona manino loia a itu e lua, e 2 elemeni o le umia o se fualaau fa’asaina e tatau ona fa’amanino lelei, e le gata o le umia, ae tatau fo’i ona iloa le mea o loo umia.

 

Saunoa atili le afioga a Sunia e fa’apea, e ui o lea ua faamaonia e le malo sa umia e Wells vaega o fualaau fa’asaina e ala i lona alu ma piki mai le afifi sa maua i ai vaega o fualaau fa’asaina i totonu, peita’i e le i mafai e le malo ona fa’amaonia pe sa iloa e Wells o fualaau fa’asaina sa i totonu o le afifi na alu e piki mai.

 

TETE’E TONY FA’ATAU KOME I TU’UAIGA A LE MALO

 

O le masina fou o Fepuari lea ua tolopo i ai le ulua’i iloiloga o le mataupu a Tony Fa’atau Kome, i le mae’a ai lea o lona teena o moliaga mamafa e 2 ua faila e le malo fa’asaga ia te ia, e mafua mai i le fa’alavelave lea na latou fa’aoolima ai ma isi ali’i i se ali’i i Iliili i le masina o Novema na te’a nei.

 

O loo tu’uaia e le malo ia Kome i le moliaga mamafa o le fa’aoolima i le tulaga lua, atoa ai ma le taumafai e fa’atino le solitulafono o le talepe fale i le tulaga muamua.

 

Na fa’ailoa e le loia a Kome ia Michael White i le fa’amasinoga le tete’e o le ua molia i tu’uaiga a le malo, ma ia talosagaina ai loa le tolopo o le mataupu mo aso e 45, lea fo’i na talia e le afioga i le ali’i fa’amasino ia Elvis P. Patea.

 

O loo tu’uaia e le malo ia Kome ma isi ali’i e to’alua i lo latou fa’ao’olima i le ali’i na a’afia, atoa ai ma le taumafai e fa’aleaga le faitoto’a o le fale ma le fa’amoemoe e toe fa’aauau ai le fasiga o le ali’i na a’afia.

 

O lo o taofia pea Kome i le toese i Tafuna e fa’atali ai le aso lea ua fa’atulaga e toe valaau ai lana matuapu i luma o le fa’amasinoga maualuga.