Ads by Google Ads by Google

Tala otooto o Fa’amasinoga

ausage@samoanews.com

TO’A 5 NA TAOFIA I LE ULUA’I POLOKA A LEOLEO

 

E to’alima tagatanu’u na taofia i le ulua’i po o le poloka a Leoleo i le vaiaso nei, ma ua tu’uaia nei i latou i solitulafono eseese i luma o le fa’amasinoga fa’aitumalo.

 

O i latou e to’alima na taofia i le po o le aso Gafua na te’a nei, e aofia ai le to’atolu o loo tu’uaia i le faatupu vevesi i nofoaga faitele, ma le to’alua ua tu’uaia i le ave ta’avale ‘ona, e pei ona taua i fa’amaumauga a le fa’amasinoga fa’aitumalo i le taeao ananafi.

 

O i laua e to’alua ua tu’uaia i le ave ta’avale ‘ona, o loo maua i fa’amaumauga o le ulua’i taimi lenei fa’atoa molia ai i laua i lenei solitulafono, ma ua toe tatalaina nei i laua i tua e fa’atali ai le aso lea ua fa’atulaga e toe valaau ai a laua mataupu, i lalo o poloaiga a le fa’amasinoga e ao ona la usita’i ai.

 

O ni isi o ia poloaiga e aofia ai le fa’asa lea ona la toe tagofia le ‘ava malosi, fa’asa fo’i ona la toe fa’afoeina se ta’avale ao fa’agasolo ai a laua mataupu i luma o le fa’amasinoga.

 

Ae mo i latou e to’atolu o loo tu’uaia i le faatupu vevesi i nofoaga faitele, o loo aofia ai le mataupu fa’asaga i le ali’i o Chris Valaau, lea o loo tu’uaia i le faatupu vevesi i nofoaga faitele ma le fa’aoolima i le tulaga tolu, e mafua mai i le fa’alavelave lea na ia po ai foliga o se alii talavou na ia lafo atu se upu mataga ia te ia.

 

Na taua i faamaumauga a le fa’amasinoga e fa’apea, o Valaau sa ‘ona i le fale o lona uso matua i Taputimu, o le mafua’aga lea na palauvale i ai le ali’i na a’afia ma fai i ai e soia le soona pisapisao le mafaufau, ae ita ai Valaau ma savali atu ma po foliga o le ali’i na a’afia.

 

E $500 lea ua faatulaga e le faamasinoga e totogi ona faatoa mafai lea ona tatala Valaau i tua mai le toese.

 

O le mataupu faasaga ia Allice Filiga na taofia mai e Leoleo i se inugapia sa faia i Tafuna i le po o le aso Gafua nei, ma tu’uaia ai o ia i le faatupu vevesi i nofoaga faitele. E pei ona taua i faamaumauga a le fa’amasinoga, o Filiga na fa’au’u i le fa’auuga a le Kolisi Tu’ufa’atasi sa faia i le vaiaso na te’a nei, ma faia ai loa sa latou fiafia ma ana uo i le po o le aso Gafua na tea nei, ma tula’i mai ai loa le fa’alavelave e pei ona molia ai o ia.

 

Ua tatala nei o ia i tua e aunoa ma se tupe e totogi e fa’atali ai lana iloiloga lea ua faatulaga mo le masina fou.

 

UALE ANETONE

 

E 12 masina lea ua faanofovaavaaia ai le alii o Uale Anetonu i luma o le faamasinoga faaitumalo i le vaiaso na te’a nei, ina ua ta’usala o ia e le fa’amasinoga i le moliaga o le faaoolima i le tulaga tolu, faapea ai ma le tu fua i le fanua o le isi aiga.

 

O se inugapia sa faia a Anetone ma ni isi o ana uo, na tula’i mai ai se vevesi i le va o le ua molia ma se tasi o ana uo, ma ia faaoolima ai loa i le alii na a’afia, ae ina ua sulu le alii na aafia i lona fale, sa tuliloa atu pea lava o ia e Anetone ma taumafai e faaauau lona fasiga o ia, peita’i na mafai ona vaovao e ni isi sa i ai ma mae’a ai loa le vevesi.

 

O n isi o poloaiga o le nofovaavaaia a Anetone e aofia ai le fa’asa ona ia toe tagofia o le ‘ava malosi, faasa ona ia toe soli se tulafono, a ia avea o ia ma tagatanu’u e tausisi i tulafono a le malo i taimi uma.

 

Ua fautuaina foi e le fa’amasinoga le ua molia e auai i se aoaoga fa’a faufautua e fesoasoani ai i le tulaga o le loto ita.