Ads by Google Ads by Google

Tala otooto o Fa’amasinoga

ausage@samoanews.com

MAMONA UNASA

 

O le aso Gafua o le vaiaso fou lea ua fa’atulaga e faia ai le fa’amasinoga autu a le ali’i o Mamona Unasa, lea o lo o tu’uaia e le malo i lona faia o uiga mataga i se teineititi e 16 tausaga le matua, o le tama teine lea a le fafine sa avea ma ana paaga i le taimi na tula’i mai ai lenei fa’alavelave.

 

I le teena ai e Unasa o moliaga mamafa e 4 o lo o tu’uaia ai o ia e le malo, na ia talosagaina ai loa le fa’amasinoga mo se avanoa e fa’ataunu’u ai lana fa’amasinoga autu, ina ia mafai ai ona iloilo e tagatanu’u se fa’aiuga aloaia o lana fa’amasinoga.

 

O moliaga mamafa e 4 o lo o tu’uaia ai Unasa e aofia ai le moliaga o lona faia o uiga mataga faasotoma i se teineititi, faia o gaioiga fa’afeusuaiga, atoa ai ma moliaga e lua o lona tagofia lea o itutinosa o se teineititi e laititi i lalo o le tulafono.

 

O le mataupu lenei na tofu atu i le Ofisa o Leoleo i Tafuna i le so 25 Mati 2016, ina ua faila e le Tina o le teineititi na a’afia sana tagi i le Ofisa o Leoleo, fa’asaga i le ali’i o Unasa lea sa avea ma ana paaga i le taimi na tula’i mai ai le fa’alavelave, i lona faia lea o uiga mataga i lana tama teine i le masina o Tesema 2015.

 

O lo o taua i fa’amaumauga a le fa’amasinoga e fa’apea, o le po na tula’i mai ai le fa’alavelave, na moe ai le teineititi na a’afia i le potu moe a lona Tina ma le ua molia, ina ua alu lona Tina e momoe ma lona nephew sa ma’i i le potu malolo.

 

E le i umi ona i ai le teineititi na a’afia i luga o le moega a lona Tina, ae ona ia fa’alogoina loa le taumafai o le ua molia e tatala lona ofu, sosoo ai ma le amata lea ona sogi atu i lona ua ma ona foliga. Na taua i fa’amaumauga a le fa’amasinoga le fa’aauau o gaioiga a le ua molia, e aofia ai ma lona tagofia o itutinosa o le teineititi na a’afia.

 

E le i e e le teineititi na a’afia pe taumafai fo’i e faia ni gaioiga e fa’ailoa atu ai i lona Tina gaioiga a le ua molia, ona sa lagona lona fefe i le taimi lea, o le mafua’aga fo’i lea na te le i ta’uina ai i se isi gaioiga sa fai atu e le ua molia ia te ia, ona sa lagona lona fefe ina nei te’i ua faia e le ua molia se mea leaga ia te ia.

 

O le masina o Fepuari 2016 na taua e le Tina i Leoleo na toe faia ai fo’i e le ua molia uiga mata lava ia i lana tama.

 

Ina ua fesiligia e Leoleo ia Unasa e uiga i lenei mataupu, na taua ai e le ua molia le sese o le tagata na ia tago i ai, sa i ai lona manatu o lana uo teine (Tina o le teineititi ua a’afia) lea o lo o ia tago tago atu i ai i luga o le la moega. Sa ia taua atili fo’i i Leoleo e fa’apea, e leai sona mafaufau na te faia ni uiga mataga fa’apea i le teineititi ua a’afia.

 

O lo o taofia pea Unasa i le toese i Tafuna ina ua le mafai ona ia totogiina le $30,000 na fa’atulaga e le fa’amasinoga e totogi ona fa’atoa mafai lea ona tatalaina o ia i tua.

 

TUMUATASI LEFATIA

 

Ua toe tolopo i le aso 30 Tesema le tu’uina atu o se fa’aiuga aloaia a le fa’amasinoga maualuga fa’asaga i le maliliega aufa’atasi lea ua mae’a ona sainia e le malo ma le Tina ia Tumuatasi Lefatia, lea o lo o fa’apea o ia lea o le Pule o le pisinisi a Le Aute Bar, i le mae’a ai lea ona talia e le fa’amasinoga maualuga o se talosaga na tu’uina atu e loia a itu e lua i le aso ananafi, mo se avanoa e toe tolopo ai le mataupu a Lefatia mo le 2 vaiaso.

 

O le vaiaso nei na faamoemoe le fa’amasinoga e tuu atu ai sana fa’aiuga, pe talia le maliliega lea na sainia e Lefatia ma le malo i le masina o Mati 2016, ae talu ai le pisi o le kalena a le fa’amasinoga, ua tolopo ai loa e le fa’amasinoga le mataupu a Lefatia fa’atoa toe valaau i le aso 30 Tesema, ae le o le 2 vaiaso e pei ona talosagaina e lana loia ia Sharron Rancourt ma le loia a le malo.

 

O Lefatia na ulua’i tu’uaia e le malo i le moliaga mamafa e tasi o lona umia fa’asolitulafono o vaega o le pauta fa’asaina o le aisa, o se solitulafono mamafa i le vaega D, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, fa’apea ai ma moliaga mama e 3 o le umia fa’asolitulafono lea o se a’upega, o le vaega A lea o solitulafono mama, lea e mafai ona fa’asala ai i le toese mo le umi e le silia i le tausaga, poo le salatupe e le silia i le $1,000.

 

Ae i lalo o le maliliega lea na sainia e le malo ma le ua molia, lea fo’i o lo o fa’atali i ai se fa’aiuga a le fa’amasinoga, ua tali ioe ai le ua molia i le moliaga ua toe suia e le malo, ina ia fa’ailoa ai le moliaga o le umia fa’asolitlulafono o puluo se fana.

 

Ua ioeina e le ua molia i totonu o le maliliega na sainia ma le malo e fa’apea, o pulufana ia sa maua ina ua osofa’i e Leoleo lona fale i le masina o Mati 2015, ma maua ai i lalo o se nofoa sa i totonu o lona potu moe, o ana pulu fana.

 

O lo o tumau pea tuutuuga o lo o tatala ai e le fa’amasinoga Lefatia e fa’atali ai lana iloiloga lea ua fa’atulaga i le masina fou.

 

FRED LOLOGA

 

O le vaiaso na te’a nei na faila ai e le malo le moliaga mamafa o le ave ta’avale ao se’i le laisene fa’asaga ia Fred Lologa, e mafua mai i le fa’alavelave lea na maua ai e Leoleo o ia o lo o ia fa’afoeina se ta’avale i luga o le auala a le malo i Tafuna i le amataga o le masina nei.

 

O le masina o Aperila 2016 na ta’usala ai e le fa’amasinoga ia Lologa i le moliaga mama o le ave ta’avale ‘ona, ma fa’anofovaavaaia ai loa e le fa’amasinoga o ia mo le 12 masina i lalo o tuutuuga e ao ona ia usita’i i ai, ma o ni isi o ia tuutuuga e aofia ai le fa’asa lea ona ia toe tagofia le ‘ava malosi, fa’asa ona ia toe solia se tulafono a le malo, atoa ai ma le poloaiga taua, o le fa’asa lea ona ia toe aveina se ta’avale i totonu o le 6 masina, ona o lea ua se’i lona laisene ave ta’avale mo le 6 masina.

 

I le amataga o le masina lenei o Novema, na molimauina ai e Leoleo se ta’avale pikiapu o lo o aga’i atu i luga o le alatele a le malo i Tafuna ma le fa’amoemoe e aga’i i le itu i sisifo, i se saoasaoa e sili atu ma le aofa’i o maila fa’atulafono e fa’ataga ona o ai ta’avale i luga o le alatele a le malo.

 

Na taofi e Leoleo le ta’avale ma iloa ai, o le susuga ia Lologa le ave ta’avale. E lei faigata i Leoleo ona na iloaina le le usita’i o Lologa i le poloaiga e fa’asa ai ona ia toe fa’afoeina se ta’avale, ona o i laua fo’i ona taofia fa’apagota o ia i le po na ia fa’afoeina ai le ta’avale a lona Tama a o ‘ona.

 

O le moliaga o le ave ta’avale a o se’i le laisene, e mafai ona fa’asala ai se tasi i le toese mo le umi e le silia i le 5 tausaga, pe fa’asala foi i le salatupe e le silia i le $5,000, ae fa’amalosia ai le tuli o aso e 90 i totonu o le toese.

 

O le fa’aiuga o le masina nei lea ua fa’amoemoe e toe valaau ai le mataupu a Lologa i luma o le fa’amasinoga fa’aitumalo.