Ads by Google Ads by Google

Tala otooto o Fa’amasinoga

ausage@samoanews.com

TALIA TALOSAGA VA’ATAUSILI TOFAEONO

 

Ua talia e le fa’amasinoga maualuga le talosaga a le ali’i o Va’atausili Tofaeono mo se fa’atanaga a le Fa’amasinoga e mafai ai ona ia malaga i Amerika mo fonotaga a le galuega o lo o galue ai, i lalo o tuutuuga, e na o mataupu lava tau fonotaga o lana galuega e tatau ona malaga ai, ae le aofia ai ni mafua’aga tau i lona lava aiga.

 

O ananafi na fofogaina ai i luma o le fa’amasinoga maualuga le talosaga a Tofaeono mo se fa’atanaga e malaga ai i fonotaga mo lana galuega i le laumua i Uosigitone DC ma Honolulu, i le masina o Novema ma Tesema o le tausaga nei, ae o isi vaiaso o lo o totoe ai o lana malaga, o le a alu ai e momoli lona afafine i Amerika e fai aso fiafia ai ma ni isi o lona aiga, atoa ai ma le alu e fa’amautu ni isi o polokalame i le aoga o lo o ave ai ana vasega i a’oa’oga i luga o initaneti.

 

O le naunau o ali’i fa’amasino i lo latou fia maua o isi fa’amatalaga fa’aopoopo e fa’atatau i le malaga a Tofaeono, na mafua ai loa ona fa’atonu e le afioga i le fa’amasino sili ia Michael Kruse le loia a Tofaeono ia Mahoni McCormick ina ia alu Tofaeono i luga o le nofoa molimau mo le tu’uina mai o fa’amatalaga o lo o mana’o i ai le fa’amasinoga.

 

Saunoa atili Kruse e fa’apea, e le fa’apea ua mae’a ona tuli le fa’asalaga fa’a falepuipui a le ua molia i le falepuipui, ona manatu lea ua mae’a ai lana fa’asalaga, ae tatau ona ia iloa, o lo o fa’anofovaavaaia o ia atoa ai ma le fa’asalaga fa’a falepuipui o lo o fa’amalumalu e le fa’amasinoga.

 

Na taua e Tofaeono i lana molimau e fa’apea, talu ai lana galuega o lo o galue ai i le American Samoa Cancer Coalition, e mana’omia ai lona auai i fonotaga o lo o faia i Uosigitone i le fa’aiuga o Novema ma le fonotaga i Honolulu i le vaiaso muamua o Tesema, ona o fonotaga ia o lo o faia fa’atasi ai ma a’oa’oga mo sui uma o Cancer Coalitions i setete ma teritori, ma fesoasoani ai fo’i i le mauaina mai o vaega tupe e fa’atupe ai polokalame o lo o fa’atino i le atunu’u.

 

Na fesili Kruse ia Tofaeono poo le a le umi o lana malaga, ae na tali le molimau, o lo o fa’amoemoe e malaga ese atu ma le atunu’u i le aso 21 Novema, ma le fa’amoemoe e toe fo’i mai i le aso 2 Ianuari 2017, ona o isi aso o lo o totoe o lana malaga pe a mae’a fonotaga, e fa’aalu e mafuta ai ma lona afafine atoa ai ma nisi o lona aiga, ma fa’amautu ai fo’i isi mataupu i le aoga o lo o ave ai ana mataupu i luga o fesootaiga tau initaneti.

 

E lei tete’e le itu a le malo i le talosaga a Tofaeono mo se avanoa e malaga ai i fafo, ona e talitonu o ia, e toe fo’i mai o ia i Amerika Samoa pe afai ae mae’a ana fonotaga.

 

O le masina o Aokuso o le tausaga nei na talia ai fo’i e le fa’amasinoga le isi talosaga a Tofaeono, mo se avanoa e malaga ai i Amerika i ni isi o fonotaga sa faia ai mo mataupu e fa’atatau i lana galuega.

 

Ina ua fesiligia Tofaeono e fa’atatau i lea malaga, sa ia taua ai e fa’apea, sa ia totogiina le tupe e $5,000 e avea ma pone e fa’amaonia ai lona toe fo’i mai i le atunu’u, ae ina ua ia taunu’u mai, sa ia faia se su’ega ia te ia pe sa ia tagofia fualaau fa’asaina poo le ‘ava malosi, peita’i sa fa’amaonia i le suega sa faia na te le i tagofia le ava malosi.

 

ABRAHAM McMOORE

 

O le aso 30 Tesema lea ua tolopo i ai le ulua’i iloiloga a le ali’i o Abraham McMoore, i le mae’a ai lea ona ia teena o moliaga fa’asaga ia te ia i luma o le fa’amasinoga maualuga i le taeao ananafi.

 

O McMoore, lea o lo o tatala i tua i lalo o tuutuuga a le fa’amasinoga e tatau ona ia usita’i i ai, o lo o tu’uaia i le fa’alavelave lea na ia fa’alala ai se fana i se isi ali’i i Utulei i le masina na te’a nei, e ui o lo o teena e le ua molia tu’uaiga fa’asaga ia te ia.

 

O moliaga o lo o tu’uaia ai o ia e aofia ai lona fa’aaoga fa’asolitulafono o se a’upega, fa’apea ai ma le umia o se a’upega e lei lesitalaina.