Ads by Google Ads by Google

Tala otooto o Fa’amasinoga

ausage@samoanews.com

ABRAHAM McMOORE

 

O le ali’i lea o lo o tu’uaia e le malo i lona fa’alala o se fana i se isi tagata i se auala fa’asolitulafono, ua tofu atu nei i luma o le fa’amasinoga maualuga lana mataupu.

 

O le aso Faraile na te’a nei na fa’atulaga e faia ai le ulua’i iloiloga o le mataupu a McMoore i luma o le fa’amasinoga fa’aitumalo, peita’i na manatu le ua molia e fa’aagafua ona aia tatau fa’aletulafono, ina ia aua ne’i fa’ataunu’uina lea iloiloga, ae tu’u sa’o atu loa lana mataupu i luma o le fa’amasinoga maualuga e fa’agasolo ai.

 

O le mataupu o lo o tu’uaia ai le ua molia na alia’e mai i Utulei i le masina na te’a nei, ina ua vili e le ali’i na a’afia Leoleo mo se fesoasoani, i le mae’a ai lea ona fa’afefe o ia e le ua molia i se fana.

 

I fa’amaumauga a le fa’amasinoga o lo o taua ai e fa’apea, o le ali’i na a’afia na alu e fai sana galuega kamuta i le fale e tuaoi ma le fale a le ua molia, peita’i ina ua paka le ta’avale a le ali’i na a’afia i luma o le fale o le a sauni e fa’atino lana galuega, na fa’ateia o ia i le alu atu a le ali’i ua molia ma fai atu ia te ia e aveese lana ta’avale ma le fanua.

 

Na taua e le ali’i na a’afia i Leoleo lona vaaia o le ova o le ‘ona o McMoore, i le taimi na ia fa’alala atu ai le fana ia te ia, ma ia viliina ai loa Leoleo mo se fesoasoani.

 

VA’ATAUSILI TOFAEONO

 

O le vaiaso nei lea ua fa’amoemoe le ali’i o Va’atausili Tofaeono ma lana loia, la te toe talosagaina ai le fa’amasinoga maualuga mo se avanoa e fa’ataga ai o ia ona malaga i fafo i fuafuaga tau i lana galuega, i le mae’a ai lea ona teena e le fa’amasinoga maualuga o lana ulua’i talosaga sa tu’uina atu i ni nai masina e lei mamao atu.

 

I le teena ai e le fa’amasinoga o le ulua’i talosaga a le ua molia, na fa’ailoa ai e le ali’i fa’amasino sili ia Michael Kruse le mana’omia o ni isi fa’amatalaga fa’aopoopo e fesoasoani ai i le lagolagoina o lana talosaga.

 

O Tofaeono na ta’usala e le fa’amasinoga i le ave ta’avale a o se’i lona laisene, ina ua maua e Leoleo o ia o lo o ia fa’afoeina se ta’avale i le masina o Novema 2015, ae o lo o se’i e le fa’amasinoga lona laisene ave ta’avale, e mafua mai ina ua ta’usala o ia e le fa’amasinoga fa’aitumalo i le moliaga o le ave ta’avale ‘ona i le tausaga e 2012.

 

RAY UPUTAUA

 

E 12 masina lea ua fa’anofovaavaaia ai e le fa’amasinoga fa’aitumalo le ali’i o Ray Uputaua, ina ua ta’usala o ia i le moliaga mama o le gaoi. Na ulua’i tu’uaia e le malo ia Uputaua i moliaga e lua o le gaoi ma le fa’atupu vevesi i nofoaga faitele, ae i lalo o se maliliega na sainia e le ua molia ma le malo, lea fo’i na talia e le fa’amasinoga, na malie ai le ua molia e tali ioe i le moliaga o le gaoi, ae solofua e le fa’amasinoga le isi  moliaga o lo o totoe ai i le pepa o tagi na fa’aulu e le malo.

 

O le fa’alavelave e pei ona ta’usala ai Uputaua na tula’i mai i le masina o Setema na te’a nei, ina ua ia gaoia ni apa meaai mai totonu o se faleoloa i Tafuna, i le taimi o lo o pisi ai tagata fa’ata’u.

 

O le aso na sosoo ai na fa’atoa iloa ai e le pule o le faleoloa gaioiga a le ua molia sa faia, ina ua ia matamata i ata sa pu’eina e masini pu’eata o lo o i totonu o le faleoloa, ma ia logoina ai loa Leoleo mo se fesoasoani.

 

Ina ua fesiligia e Leoleo le ali’i ua molia e tusa ai o lenei mataupu, sa ia ioeina ai lona gaoia o ni apa meaai mai totonu o le faleoloa e silia i le $20 le tau, e aai ai ma ana uo ina ua uma le latou inugapia sa faia ae ua leai se meaai o totoe i le fale.

 

O ni isi o tuutuuga o le nofovaavaaia a le ua molia e aofia ai le fa’asa lea ona ia toe tagofia le ‘ava malosi, fa’asa ona toe alu i le faleoloa na tula’i mai ai le fa’alavelave, a ia saili sana galuega e maua ai sona totogi, ma ia usita’i i tulafono a le malo.

 

Ua poloaina fo’i o ia e auai i ni aoaoga fa’a faufautua e fesoasoani ai i a’afiaga o le ‘ava malosi.