Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

FA’AILI MATA’U

 

O le vaiaso na te’a nei na sainia ai e le Fa’amasinoga Maualuga sana poloaiga e pu’e faapagota mai ai le ali’i o Fa’aili Mata’u, e mafua mai i tu’uaiga i lona le usitaia lea o tuutuuga o lana nofovaavaaia.

 

O Mata’u, poo ‘Whistle’ fo’i e pei ona iloa ai o ia e le to’atele na ta’usala e le fa’amasinoga i le masina o Fepuari na te’a nei i le moliaga mamafa o le umia fa’asolitulafono o vaega o fualaau fa’asaina o le aisa.

 

O lea moliaga na afua mai i le fa’alavelave lea na maua ai e Leoleo o ia o lo o moe taliaga i luma o se Fale Faatali pasi i Tafuna, ae ina ua sailia lona tino, sa maua i ai vaega o le pauta oona o le aisa.

 

O ni isi o tuutuuga o le nofovaavaaia a Mata’u na tuuina atu e le fa’amasinoga i le masina o Fepuari na te’a nei, o lona tuliina lea o masina e 20 i le falepuipui. Na faamalumalu e le fa’amasinoga lea poloaiga, ae faia le faaiuga ina ia lava masina e 5 ma ona tupu na taofia ai Mata’u i le falepuipui e fai ma ana fa’asalaga, ma tatala ai lava o ia i tua i le aso na lau ai lana fa’asalaga, ae o isi masina o lo o totoe ai o lana fa’asalaga o le a taofi le tuliina, fuafua lava i lona usita’i i isi poloaiga a le fa’amasinoga.

 

O isi poloaiga a le fa’amasinoga e aofia ai le tatau lea ia Mata’u ona alu e vaai le ofisa faanofovaavaaia fa’atasi i le masina, aua ne’i ona toe tagofia pe fa’aaoga fualaau fa’asaina, ma ia tuuina atu lona tino e faia i ai ni suiga ina ia faamaonia ai na te le o toe tagofia fualaau fa’asaina.

 

Talu mai lava le taimi na tatala ai Mata’u i tua seia oo mai i le vaiaso na te’a nei, e le i alu lava o ia e vaai le Ofisa Faanofovaavaaia, e le i alu fo’i e faia se suega i lona tino po o ona tagofia fualaau faasaina pe leai. O le mafua’aga lea na talosagaina ai loa e le Ofisa Faanofovaavaaia le fa’amasinoga, mo sana poloaiga e pu’e fa’apagota mai ai le ua molia.

 

E o o mai lava i le taimi nei o lo o tau sailia pea e Leoleo ma Masela a le fa’amasinoga ia Mata’u, ina ia pu’e fa’apagota e tusa ai ma le poloaiga a le fa’amasinoga.

 

IAKIMO FELISE

 

O le masina o Iuni lea ua fa’atulaga e toe valaau ai le mataupu a Iakimo Felise i luma o le Fa’amasinoga Maualuga, i le mae’a ai lea ona ia teena o moliaga mamafa e 10 ua tu’uaia ai o ia e le malo i le taeao ananafi.

 

O Felise, 55 tausaga le matua mai le afioaga o Leloaloa na pu’e fa’apagota mai e Leoleo i Nu’uuli i le aso Lua o le vaiaso na te’a nei, ona o tu’uaiga i lona faia o uiga mataga i se teineititi i le taimi o le tuua o aoga.

 

E 10  moliaga o lo o tu’uaia ai o ia e le malo. O ia moliaga mamafa e aofia ai moliaga e 3 o le faia o amioga mataga i fanau e i lalo o le 12 tausaga le matutua; 1 le moliaga o le fai’aiga fa’amalosi; 2 moliaga o le faia o uiga mataga fa’asotoma, ma moliaga e 4 o le tagofia o itutinosa o se teineititi e laititi i lalo o le tulafono.

 

O ia tuuaiga e mafua mai i le fa’alavelave na tula’i mai i le vaiaso na te’a nei, i lona faia lea o uiga mataga i se teineititi e 10 tausaga le matua.

 

O le tausaga e 2011 na ta’usala ai fo’i Felise e le fa’amasinoga maualuga i le moliaga o le tagofia o itutinosa o se teineititi e 10 tausaga le matua, ma fa’asala ai o ia e le fa’amasinoga i le umi e 20 masina, o se tasi lea o tuutuuga o lana nofovaavaaia e 5 tausaga.

 

Na teena e le afioga i le ali’i Fa’amasino ia Fiti Sunia le talosaga ina ia fa’atulaga se tupe e tatala ai Felise i tua mai le toese i Tafuna. Saunoa Sunia e fa’apea, talu ai le matuia o tu’uaiga fa’asaga i lenei ali’i, ua manatu ai le fa’amasinoga ina ia taofia pea o ia i le toese e aunoa ma se tupe e taofia ai o ia.

 

CAROLINE PURCELL

 

Ua talia e le fa’amasinoga maualuga le talosaga a se tama’ita’i talavou e 19 tausaga le matua, mo se avanoa e tatala ai o ia i tua e fa’aauau le mafutaga ma lona aiga.

 

O le vaiaso na te’a nei na lau ai le fa’asalaga a Caroline Purcell i luma o le fa’amasinoga maualuga, i le mae’a ai lea ona ta’usala o ia i le moliaga mamafa o le gaoi. O le moliaga o le gaoi, o se solitulafono C i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, poo le fa’asala fo’i i le salatupe e le silia i le $5,000, poo fa’asalaga uma fo’i ia e lua.

 

Na fa’atoese Purcell i le fa’amasinoga e tusa ai o lana solitulafono, ma ia talosagaina ai se isi avanoa o ia. Na ta’utino Purcell e fa’apea, o ia o se tama’ita’i talavou e 19 tausaga, e le o toe umi se taimi ona avea lea o ia ma Tina. Sa ia taua i le fa’amasinoga, ua 5 masina o lona ma’itaga.

 

Sa ia augani i le fa’amasinoga mo se avanoa e toe fo’i ai i lona aiga e toe fa’asa’o ni isi o tulaga ua fa’aletonu i lona olaga.

 

Na talosaga lana loia ia Michael White i le fa’amasinoga ina ia talia le talosaga a Purcell ae tatala o ia i tua e toe fo’i i lona aiga. Sa i ai le Tama o Purcell i totonu o le potu fa’amasino atoa ai ma lona grandmother.

 

Na lagolagoina e le loia a le malo ia Woodrow Pengelly le talosaga a le itu tete’e, ina ia fa’anofovaavaaia le ua molia e aofia ai le tatala o ia i tua.

 

Saunoa le afioga i le ali’i Fa’amasino ia Elvis P. Patea e fa’apea, e foliga mai i fa’amaumauga ua i luma o ali’i fa’amasinoga e le o se taimi muamua lenei ua a’afia ai Purcell i le tulafono.

 

“E foliga mai sa i ai isi au solitulafono i le Fa’amasinoga Fa’aitumalo, a o lea ua amata ona e oo mai i luma o le Fa’amasinoga Maualuga, lona uiga o le a maualuga fo’i le fa’asalaga e tuuina atu ia te oe. Ui o lea, ua talia e le fa’amasinoga lau talosaga ma ua sauni fo’i le fa’amasinoga e tuuina atu se isi avanoa o oe”, o le saunoaga lea a Patea.

 

O masina e 4 lea na taofia ai Purcell i le toese, ua fa’aaoga e fai ma ana faasalaga, ae ua faamalumalu lona tuliina o le fa’asalaga fa’a falepuipui e 20 masina, fuafua lava i lona usitaia o tuutuuga o lana nofovaavaaia e 5 tausaga.

 

O isi tuutuuga e aofia ai le usita’i i tulafono a le malo, ma ia avea o ia o se tagatanu’u e tausi i le tulafono.