Tala otooto o Fa’amasinoga

ausage@samoanews.com

LOGONA TIGILAU

 

O le aso 17 Me i le itula e 1:00 i le aoauli lea ua fa’atulaga e faia ai le ulua’i iloiloga o le mataupu a le ali’i faigaluega o le Ofisa o Tiute, ina ua talia e le afioga i le ali’i Fa’amasino ia Fiti Sunia lana talosaga na tauala atu i lana loia fautua, mo se avanoa e toe tolopo ai lana ulua’i iloiloga na fa’atulaga e faia i le vaiaso na te’a nei.

 

Na taua e le loia a Tigilau ia Ryan Anderson e fa’apea, e i ai molimau e moomia le fesiligia ao le i faia le ulua’i iloiloga, ina ia mafai ai ona maua se avanoa a le itu tete’e e sailia mai ai fa’amatalaga tatau mo le iloiloga.

 

E talitonu le ali’i loia fautua ia Anderson, e i ai le avanoa e le mafai ai e le mau o le a tuuina atu e le malo i le fa’amasinoga ona lagolago tu’uaiga fa’asaga ia Tigilau.

 

E le i fa’atuiese le loia a le malo ia Robert Moriss i le talosaga a le itu tete’e.

 

O Tigilau o lo o molia i moliaga mamafa e 3. O ia moliaga e aofia ai le umia faasolitulafono o mariuana, umia faasolitulafono o mariuana ma le fa’amoemoe e tulei ma fa’atau atu isi tagata, atoa ai ma le umia fa’asolitulafono o le pauta oona o le aisa.

 

O tu’uaiga fa’asaga ia Tigilau na alia’e mai i le fa’alavelave lea na tula’i mai i le Falemeli i le aso 6 Aperila, ina ua maua e ali’i Ofisa o le Tiute mariuana i totonu o se afifi na fa’atuatusi mai i le igoa o Fiatupu Tavai.

 

O le susuga a Tavai, o se ali’i sa faigaluega fo’i i le Ofisa o Tiute e pei ona taua i fa’amaumauga a le fa’amasinoga.

 

Na taua e Tavai i leoleo e fa’apea, i le 2 vaiaso a le i oo mai i le fa’alavelave e pei ona taua, na alu atu ai Tigilau i lona fale ma talosaga atu pe mafai ona ia fa’aaoga lana pusa meli e aumai ai lana afifi mai fafo.

 

Na o uma Tigilau ma Tavai i le falemeli e piki mai le afifi, ae ina ua su’e atu a ali’i Ofisa o le Tiute, sa maua i ai vaega o le laau fa’asaina o le mariuana. Na ta’utino Tigilau i ali’i Ofisa o le Tiute, o ia e ana le afifi na aumai i le pusa meli a Tavai.

 

Ina ua saili e leoleo le ta’avale a Tigilau, na tu’uaia le maua ai o se paipa tioata sa totoe ai vaega o le pauta oona o le aisa.

 

Ua tatala i tua Tigilau e fa’atali ai taualumaga o lana mataupu.

 

ALEMA TALALEU

 

E $10,000 le tupe lea ua fa’atulaga e le fa’amasinoga fa’aitumalo e totogi ona fa’atoa mafai lea ona tatala le ali’i o Alema Talaleu i tua mai le toese i Tafuna, e fa’atali ai taualumaga o le tagi a le malo fa’asaga ia te ia lea ua fa’agasolo nei i luma o le fa’amasinoga.

 

O le vaiaso na te’a nei na taofia fa’apagota ai e leoleo ia Talaleu ona o tu’uaiga i lona ulufale fa’amalosi lea i totonu o se fale o se aiga i Tafuna ma gaoi meatotino e silia i le $100 le tau aofa’i.

 

O moliaga mamafa fa’asaga ia Talaleu e aofia ai le talepe fale i le tulaga muamua ma le gaoi. O lo o tu’uaia fo’i o ia i le moliaga mama o le fa’aleaga meatotino i le tulaga tolu.

 

E pe ona taua i fa’amaumauga a le fa’amasinoga, o le masina o Ianuari o le tausaga nei na faila ai e se ulugali’i Saina sa la tagi i le ofisa o leoleo, fa’asaga i se tagata na ulufale fa’amalosi i totonu o le la fale ma gaoi meatotino e aofia ai se laptop, telefoni, lavalava, seevae, faapea ai ma mea faigaluega kamuta sa i totonu o le faase’e o le la fale.

 

Na taua e le ulugali’i Saina i leoleo, na talepe e le ua molia le faitoto’a pito i tua o le fale, ma ulufale fa’amalosi ai i totonu o le fale ma gaoi meatotino sa i totonu o le la potu, o isi meatotino sa i le potu malolo, ma mea faigaluega sa i le fa’ase’e o le fale.

 

A o taumafai leoleo e saili ni fa’amatalaga e uiga i lenei mataupu, na fa’afesootai ai e se ali’i ave taxi le ofisa o leoleo ma ia fa’ailoa i ai fa’amatalaga sa ia maua mai i se tasi o pasese, e fa’atatau i se ali’i na alu atu ma fa’atau atu se laptop i lona atali’i i le tau e $100.

 

I le mae’a ai ona taulima e leoleo o fa’amatalaga mai le molimau, na latou aga’i atu ai loa ma sailia le ua molia ae auina atu i le ofisa mo fesiligia i lenei mataupu. Na ta’utino le ua molia i leoleo, e sa’o na ia ma fa’atau atu se laptop i se tasi o ana uo, ae le o se laptop gaoi, o lana lava laptop.

 

O le aso Tofi o le vaiaso nei lea ua fa’atulaga e faia ai le ulua’i iloiloga a Talaleu e uiga i lenei mataupu, ma o lo o taofia pea o ia i le toese i Tafuna ina ua le mafai ona ia totogi le tupe na fa’atulaga e tatala ai o ia i tua.

 

IOE SE ALI’I FILIPINO I LONA FAIA O UIGA MATAGA I SE TAMA’ITA’I 15 TAUSAGA

 

O le aso 10 Me lea ua fa’atulaga e lau ai le fa’asalaga a se ali’i Filipino o lo o taofia pea i le toese i Tafuna, ina ua mae’a ona ta’usala o ia e le fa’amasinoga maualuga i le moliaga mamafa o lona tagofia lea o itutinosa o se tama’ita’i e 15 tausaga le matua.

 

Na ulua’i tu’uaia e le malo ia Melchor Alamis i moliaga mamafa o le faiaiga fa’amalosi, faia o uiga fa’asotoma, tagofia o itutino o se tama’ita’i, atoa ai ma le faia o uiga mataga fa’afeusuaiga. I lalo o le maliliega sa latou sainia ma le malo ma ua talia fo’i e le fa’amasinoga, sa ia tali ioe ai i le moliaga o lona tagofia o itutinosa o se tama’ita’i.

 

I le tali ioe ai o Alamis i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 30 June o le tausaga na te’a nei, na ia tagofia ai itutinosa o se tama’ita’i e 15 tausaga.

 

Na ta’utino atili le ua molia e fa’apea, i le aso e pei ona taua, sa ia ulufale ai i totonu o le fale o le tama’ita’i na a’afia ma ia maua atu ai o ia o lo o moe i luga o le nofoa i totonu o le potu malolo. Sa ia tagofia ona itutinosa ona o le manatu e fa’amalie ai ona lagona tu’inanau sa i ai.

 

O lo o taofia pea Alamis i le toese i Tafuna e fa’atali ai le aso lea ua fa’atulaga e lau ai lana fa’asalaga.

Comment Here