Tala otooto o Fa’amasinoga


[ata: SN]
ausage@samoanews.com

ANDREW APELU

 

E 12 masina lea ua nofovaavaaia ai le ali’i o Andrew Apelu, ina ua fa’amaonia e le Fa’amasinoga Maualuga le moliaga mamafa o le gaoi na tu’uaia ai o ia e le malo. O ni isi o tuutuuga o le nofovaavaaia a Apelu, e aofia ai lona totogi o le salatup e $1,000.

 

O le mataupu e pei ona ta’usala ai Apelu e le Fa’amasinoga, na afua mai i le fa’alavelave lea na ia gaoia ai se pusa o mea faigaluega mai totonu o se Fale Inisinia, ma ia alu ua fa’atau atu i se tasi o ana uo.

 

Mulimuli ane na toe alu le uo lea a Apelu ma toe fa’afo’i le pusa mea faigaluega i le Fale Inisinia na alu le ua molia ma gaoi mai ai, ma mafua ai loa ona tofu atu lenei mataupu i luma o le fa’amasinoga.

 

Na faailoa e le loia a le malo i le fa’amasinoga e fa’apea, ua mae’a ona toe totogi e Apelu le tupe na aumai i lana uo sa ia fa’atauina i ai le pusa mea faigaluega.

 

Na faatoese le ua molia e tusa ai o lana solitulafono sa faia, ma ia talosagaina ai se avanoa mo ia e fa’aauau ai pea ona galue i lana galuega fou o lo o i ai e tausi ai lona to’alua ma lana fanau. Sa ia ta’utino i le fa’amasinoga e faapea, o le sese o le filifiliga sa ia faia ua mafua ai ona fa’aletonu lona olaga, ae ua ia aoaoina se lesona taua ma ua ia filifili fo’i na te le toe solia lava se tulafono.

 

Na talia e le afioga i le ali’i fa’amasino ia Elvis Patea le talosaga a le ua molia, ma tuu atu ai loa e le fa’amasinoga le avanoa e aoaoina ai lona mafaufau. E 7 tausaga lea ua nofovaavaaia ai o ia i lalo o poloaiga e ao ona ia usita’i i ai. O ni isi o ia poloaiga e aofia ai le fa’asa lea ona ia toe solitulafono, ma ia tumau pea ona galue i lana galuega o lo o galue ai.

 

O le a fa’aaoga e le fa’amasinoga aso e 69 na taofia ai o ia i le toese ao faatalitali se faaiuga o lana mataupu, e fai ma ana fa’asalaga i lana solitulafono. Afai ae ona toe solia se isi tulafono a le malo, o le a toe iloilo loa e le fa’amasinoga tuutuuga o lana nofovaavaaia, ma tuuina atu ai loa se isi faaiuga mo ia.

 

TAVITA FA’AMANATU-FIDOW

 

O le ali’i lea na tu’uaia i lona osofaia o se fale o se ulugali’i Asia i Nuuuli ua molia nei i lona faalavelave i galuega a Leoleo.

 

O moliaga ua tuuaia ai Tavita Faamanatu-Fidow e aofia ai le faatupu vevesi i nofoaga faitele atoa ai ma le fa’alavelave i galuega a Leoleo. E $200 le tupe lea ua faatulaga e le fa’amasinoga e totogi ona fa’atoa mafai lea ona tatala le ua molia i tua.

 

O le mataupu na mafua ai ona loka e Leoleo ia Faamanatu-Fidow na afua mai i le fa’alavelave lea na malaga atu ai Leoleo e suesue le tagata na osofaia le fale o se ulugali’i Asia i Nuuuli, ae fa’afuase’i ai ona oso atu le ua molia ma fia fusu i le atali’i a le ulugali’i o loo a’afia.

 

E pei ona taua i fa’amaumauga a Leoleo, na ita le ua molia ina ua tu’uaia e le atali’i a le ulugali’i, o ia lea na osofaia le latou fale. Na tauanau e le ua molia le atali’i a le ulugali’i e alu atu la te fusu, ae sa fautua i ai Leoleo e alu ese, soia le fa’alavelave i le latou galuega o loo faia.

 

Sa le fa’alogo le ua molia i le fautuaga a Leoleo, ae sa taumafai pea e fa’atupu se vevesi i le va o ia ma le atali’i a le ulugali’i, ma i’u ai loa ina taofia o ia e Leoleo ae molia i moliaga e pei ona ia teena ina ua tula’i i luma o le ali’i Fa’amasino ia Fiti Sunia i le vaiaso na te’a nei.

 

O le masina fou lea ua fa’atulaga e toe tulai ai le ua molia i luma o le fa’amasinoga mo le isi ana iloiloga, ma ua fautuaina o ia ina ia tausi le filemu pe afai ae mafai ona tatala o ia i tua ma toe fo’i atu i lona aiga.

Comment Here