Ads by Google Ads by Google

Tala otooto o Fa’amasinoga


[ata: SN]
ausage@samoanews.com

VAITELE TAGO

 

Na talia e le afioga i le ali’i Fa’amasino ia Elvis P. Patea le fautuaga a le alii loia ia Douglas Fiaui, ina ia aua nei faaleaogaina tuutuuga o le nofofaavaavaaia a Vaitele Tago, a ia faia e le fa’amasinoga se poloaiga e toe faia ai se teuteuga i tuutuuga ua mae’a ona tuuina atu ia te ia.

 

O le vaiaso na te’a nei na tula’i ai Tago i luma o le fa’amasinoga maualuga, mo le tuuina atu o se faasalaga faasaga ia te ia, ina ua faamaonia lona le usitaia o tuutuuga o lana nofovaavaaia sa tuuina atu e le fa’amasinoga i le 2013, ina ua ta’usala o ia i le moliaga o le faaoolima i le tulaga lua.

 

O ni isi o tuutuuga o le nofovaavaaia a Tago sa tuuina atu e le Fa’amasinoga, o le fa’asa lea ona ia toe soli se tulafono a le malo.

 

O le 2 vaiaso talu ai na tausala ai e le Fa’amasinoga Faaitumalo ia Tago i le moliaga o le faatupu vevesi i nofoaga faitele, e mafua mai i le faalavelave lea na ia aafia ai i se misa i totonu o Nuuuli i le tausaga na te’a nei.

 

O le ta’usala ai o Tago i le moliaga o le faatupu vevesi i nofoaga faitele, ua atagia mai ai lona le usitaia o tuutuuga o lana nofovaavaaia.

 

Saunoa Patea e faapea, e ui o lea ua faamaonia le le usita’i o Tago e tausisi i poloaiga o lana nofovaavaaia, peita’i ua faamalieina le fa’amasinoga i le faafinauga a lana loia, ma ua manatu ai le faamasinoga e toe tuuina atu se isi avanoa mo ia.

 

Sa manatu le faamasinoga e poloaiga loa Tago e tuli le 5 tausaga o loo totoe o lana nofovaavaaia, peita’i i le mae’a ai ona taliaina o le talosaga a lana loia, na manatu ai loa le fa’amasinoga e lava masina e 8 e poloaina ia Tago na te tuliina i le toese i Tafuna.

 

Na fautua Patea ia Tago ina ia usita’i i tuutuuga o lana nofovaavaaia pe afai e magalo mai o ia mai tua i le toese. Ua fautuaina fo’i o ia ina ia auai i ni aoaoga e fesoasoani ai i le tulaga o le ita, ma ia taumafai e aua nei toe alu i le nofoaga na tula’i mai ai le fa’alavelave e pei ona aafia ai lana nofovaavaaia.

 

MOLIA SE ALII I LONA FAAOOLIMA I LONA TO’ALUA

 

E 41 tausaga o se alii mai Tafuna na taofia e Leoleo i le faaiuga o le vaiaso na te’a nei, ona o tuuaiga i lona faaoolima lea i lona to’alua ao fa’asua’ava o ia. O le aso Lua na te’a nei na tula’i ai lea alii i luma o le fa’amasinoga fa’aitumalo, ma tali tete’e i moliaga mama e lua o le faaoolima i le tulaga tolu, atoa ai ma le faatupu vevesi i nofoaga faitele.

 

O loo tuuaia e le malo e faapea, o se feeseeseaiga na tulai mai i le va o le ua molia ma lona to’alua, na mafua ai loa ona tula’i mai le vevesi, ma i’u ina faaoolima ai le ua molia e ala i lona ta tu’i o foliga o lona to’alua.

 

Na faalogo i ai aiga tuaoi ma latou viliina ai loa Leoleo mo se fesoasoani. Na aga’i atu Leoleo ae sola ese le ua molia mai le fale. O le vaveao o le aso Sa na te’a nei, na toe aga’i atu ai Leoleo ma maua atu ai le ua molia o loo moe i le umukuka, ma pu’e fa’apagota mai ai loa o ia.

 

Ua toe tatala le ua molia i tua e fa’atali ai taualumaga o lana mataupu, ma ua fautuaina o ia e aua nei toe alu i le fale o loo nonofo ai lona to’alua ma lana fanau, ae saili se isi nofoaga e faamautu ai se’i vagana ua mae’a taualumaga o lana mataupu.