Ads by Google Ads by Google

Tala otooto o Fa’amasinoga

ausage@samoanews.com

SOLOFUA LE MOLIAGA FA’ASAGA IA ELIJAH LEASAU

 

Ua solofua e le Fa’amasinoga Maualuga i le vaiaso na te’a nei le moliaga mamafa e tasi sa tuuaia ai e le malo ia Elijah Leasau, ina ua tuuina mai le fa’aiuga a le Vaega Iloilo Iuga la latou faaiuga e le nofosala Leasau i lalo o le tulafono.

 

Na tuuaia e le malo Leasau i le moliaga e tasi o le umia fa’asolitulafono o vaega o le laau fa’asaina o le mariuana. O lea moliaga e mafai ona fa’asala ai o ia i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

 

O le moliaga e pei ona tu’uaia ai e le malo le ua molia, na alia’e mai i le fa’alavelave lea na tula’i mai i le masina o Tesema 2015, lea na finau mai ai le malo fai mai na togi i fafo e le ua molia mai totonu o lana ta’avale se afi sa i ai vaega o le laau fa’asaina o le mariuana, ina ua taofi e Leoleo lana ta’avale i luma o se faleoloa i Iliili.

 

Na taua e le malo e fa’apea, na avea le alu o le ta’avale a le ua molia i luga o le auala e aunoa ma ni moli na ola, ma auala na taofi ai loa e Leoleo lana ta’avale.

 

Ao aga’i atu le ta’avale a le ua molia ma paka i luma o se faleoloa i Iliili, na aga’i atu ai loa Leoleo ma fesiligia o ia i le mafu’aaga o le le ola o moli pito i luma o lana ta’avale. E to’atele Leoleo sa i ai i le taimi na taofi ai le ta’avale a le ua molia.

 

O se tasi o Leoleo sa ia mauaina se afi penisini na ta’atia i le isi pito e le mamao mai le ta’avale a le ua molia. I totonu o le afi penisiisi sa maua ai vaega o le mariuana.

 

E ui na finau le loia a le malo ia Christy Dunn o le afi penisini sa maua ai mariuana na togi ese mai e le ua molia mai totonu o lana ta’avale, peita’i na finau le loia a le ua molia ia Marcellus T. Uiagalelei e fa’apea, e leai ni mau faamaonia a le malo e lagolago ai sa umia e le ua molia vaega o le fualaau fa’asaina.

 

RUSIATE TABETE

 

O le aso 5 Aperila lea ua fa’atulaga e lau ai le fa’asalaga a le ali’i o Rusiate Tabete, i le mae’a ai lea ona ta’usala o ia e le fa’amasinoga maualuga i moliaga mamafa e tolu o le talepe fale i le tulaga lua.

 

Na ulua’i tuuaia e le malo ia Tabele i moliaga mamafa e 6, lea e aofia ai moliaga e 3 o le gaoi atoa ai ma moliaga e 3 o le tapele fale i le tulaga lua. Ae i lalo o le maliliega na sainia e le ua molia ma le malo, na tali ioe ai le ua molia i moliaga e 3 o le talepe fale i le tulaga lua, ae solofua e le Fa’amasinoga moliaga e 3 o le gaoi o loo totoe ai i le pepa o le tagi sa latou fa’aulu.

 

I le tali ioe ai o Tabete i moliaga e pei ona ta’usala ai o ia e le malo sa ia taua ai e fa’apea, i le va o le aso 11 Novema, ma le aso 2 ma le 7 o Tesema 2017, sa ia ulufale fa’atolu ai i totonu o se faleoloa ma le fa’amoemoe e fa’atino ai le solitulafono o le gaoi.

 

Na ta’utino le ua molia e fa’apea, e fa’atolu ona ia osofaia le faleoloa na a’afia ma gaoia mai ai oloa e silia i le $100 lo latou tau aofa’i.

 

O lo o taofia pea le ua molia i le toese ina ua le mafai ona ia totogiina le tupe na fa’atulaga e tatala ai o ia, e fa’atali ai le aso lau ai lana fa’asalaga.

 

MUKA GODINET

 

O le ali’i e 33 tausaga le matua lea na tu’uaia e le malo i le moliaga mamafa o lona auai lea i se taupulepulega e fa’atino le solitulafono mamafa o le gaoi, ua ia malie e tali ioe i le moliaga mama lea ua manatu le malo e molia ai o ia, le moliaga mama o lona taliaina lea o ni oloa sa ave fa’agaoi.

 

I le ta’i ioe ai o Muka Godinet i le moliaga e pei ona ta’usala ai o ia e le fa ‘amasinoga, sa ia ta’utino ai e fa’apea, i se taimi o le aso 30 Ianuari 2017, sa ia taliaina ai ni oloa sa ave fa’agaoi e se tagata e le atoa se $100 o lona tau aofa’i.

 

Na ioe Godinet e fa’apea, o lana gaioiga sa faia i lea aso, sa le tusa lea ma ala o le tulafono. O lo o tumau pea tuutuuga o loo tatala ai Godinet i tua e fa’atali ai le aso 5 Aperila lea ua fa’atulaga e lau ai lana fa’asalaga.