RICHARD LAGAVALE

E 12 masina lea ua nofovaavaaia ai le ali’i o Richard Lagavale, ina ua fa’amaonia e le Faamasinoga Faaitumalo moliaga mama o le gaoi sa tu’uaia ai o ia e le malo. O ni isi o tuutuuga o le nofovaavaaia a Lagavale ua tuuina atu e le Fa’amasinoga, e aofia ai le fa’asa lea ona ia toe alu i le nofoaga na tula’i mai ai le fa’alavelave, fa’asa ona ia toe soli se tulafono pe tagofia fo’i le ‘ava malosi, a ia avea o ia ma tagatanu’u e tausisi i tulafono a le malo i taimi uma.

O le fa’alavelave e pei ona ta’usala ai Lagavale e le fa’amasinoga i le moliaga o le gaoi, na mafua mai ina ua ia gaoia se ato o lo o i ai n mea faigaluega kamuta sa i tua o se ta’avale pikiapu sa paka i luma o se faleoloa i Tafuna.

Na alu le ave ta’avale o le ta’avale pikiapu e fai lana fa’atau i totonu o se faleoloa, ae na fa’ateia o ia ina ua toe fo’i ane i lana ta’avale ua leai sana ato mea faigaluega sa i tua o le keli o lana ta’avale.

O se molimau sa ia vaaia gaioiga a Lagavale, sa ia faafesoota’iina le Ofisa o Leoleo ma mafua ai loa ona maua e Leoleo le ua molia. Na toe faafoi uma mea faigaluega na gaoia, ma ua poloaina fo’i le ua molia na te totogi le salatupe e $230.

NICOLE MAXEY

Faamaonia moliaga fa’asaga ia Nicole Maxey

O le aso 20 Mati i le 8:30 i le taeao lea ua fa’atulaga e lau ai le fa’asalaga a Nicole Maxey i luma o le Fa’amasinoga Maualuga, i le mae’a ai lea ona fa’amaonia e le fa’amasinoga o moliaga sa tu’uaia ai o ia e le malo.

E 2 tagi na faila e le malo fa’asaga ia Maxey. O le tagi muamua sa molia ai o ia i moliaga mamafa e lua o le gaoi ma le faia o fa’amaumauga tau fa’asese. I le tagi lona lua, sa tu’uaia ai fo’i o ia i moliaga mamafa e lua o le gaoi atoa ai ma le faia o fa’amaumauga taufa’atasese.

I lalo o se maliliega na sainia e Maxey ma le malo, lea fo’i ua talia e le fa’amasinoga maualuga, ua malie ai le ua molia e tali ioe i moliaga e lua o le faia o fa’amaumauga tau fa’atasi, ae talosaga le malo i le fa’amasinoga e solofua moliaga e 2 o le gaoi o lo o totoe ai i le pepa o tagi sa latou fa’aulu fa’asaga ia te ia.

I le tali ioe ai o Maxey i moliaga mamafa e lua o le faia o fa’amaumauga tau fa’asese, sa ia ta’utino ai e fa’apea, i se taimi o le aso 23 Aperila 2017 i Amerika Samoa, sa ia fa’amalosi ai ona saini ni siaki a le kamupani o le CSL Cargo Services e aunoa ma se fa’atanaga faaletulafono.

Na ta’utino le ua molia e fa’apea, i le aso e pei ona taua, sa ia sainia ai ni siaki se 3 a le CSL Cargo Services e ala i lona tusia ai o lona igoa toe fa’amalosi ma le saini a le Pule o le Kamupani, ina ia foliga ai o ni siaki moni ia sa avatu ia te ia. O le siaki muamua e $650, o le isi siaki e $650, ma le isi siaki e $375.

Na ioe Maxey i le fa’amasinoga i lona alu lea ma tala siaki nei e tolu ma fa’aaoga mo ia lava.

I le aso 16 Me 2017, sa ia sainia ai fo’i le isi siaki a le CSL Cargo Services e aunoa ma se fa’atanaga, ma le fa’amoemoe e le mafai e le kamupani ona latou toe maua le vaega tupe. E $632 le aofa’i o le siaki sa ia saini ma tala ma fa’aaoga mo ia lava.

O lo o tumau pea tuutuuga o lo o tatala ai i tua le tama’ita’i o Maxey e fa’atali ai le aso lea ua fa’atulaga e tuu mai ai le fa’asalaga a le fa’amasinoga fa’asaga ia te ia.