Tala otooto mai le Fono Faitulafono

Le afioga i le ali’i faipule ia Maugaoali’i Leapai Tusipa Anoa’i.  [ata AF] Le Fa’atonusili o le Ofisa o Fa’atoaga a le malo ia Lealao M. Purcell.  [ata AF]

TALOSAGA MAUGAOALI’I I LE ASPA MO LE FA’ALELEIA AUALA I LE TAULAGA

 

Ua taoto i luma o le Pulesili o le Ofisa o le Pulega o le Eletise ma le Suavai a Amerika Samoa (ASPA) ia Utu Abe Malae, se talosaga mai le afioga i le ali’i faipule ia Maugaoali’i Leapai Tusipa Anoa’i, e talosagaina ai le tatau lea ona ave la latou fa’amuamua i le fa’aleleia o auala i le talafatai o le taulaga.

 

I le tusi a le afioga a Maugaoali’i lea sa tu’uina atu ia Utu, lea fo’i sa mafai ona maua e le Samoa News, o loo taua ai e le afioga i le ali’i faipule ona lagona fa’anoanoa, ona ua tele fonotaga ua mae’a ona faia ma sui o le ASPA, ma fa’ailoa atu i ai talosaga mo le fa’aleleia o auala i le taulaga e aofia ai Fagatogo, ae foliga mai lava e le o fa’atauaina lea talosaga e oo mai i le taimi nei.

 

“E fa’afetai atu i lau afioga Utu e tusa ai o taimi e tele sa tatou fono ai e fa’atatau i manaoga mo le fa’aleleia o auala i Fagatogo, ae pei ona ou fa’ailoaina atu i ni isi o tatou fonotaga ua mavae, e taua tele le ave o le fa’amuamua e fa’aleleia ai auala i Fagatogo, ona o le vaega lea o le taulaga o lo o taula’i mai i ai femalagaaiga a tagata ta’itasi, aemaise ai fo’i turisi mai fafo lo o aga’i mai ma tafafao i le atunu’u”, o se vaega lea o le tusi a Maugaoali’i.

 

Na auina atu fa’atasi e Maugaoali’i i lana tusi ata o le auala i Fagatogo, atoa ai ma le paipa o le sewer line lea o lo o toso mai i Aua ma aga’i atu i Utulei, ma ua molimauina ai foliga le manuia i le auala o lo o fa’ataoto ai le paipa o le sewer line.

 

“E pei ona e silafia lau afioga i le Pulesili, o le vaega lea o le atunu’u i Fagatogo, e muamua lava taunu’u mai i ai tagata e malaga asiasi mai i fafo, e pei fo’i o le tele o atunu’u i le lalolagi ma le Pasefika, o le taulaga lava e muamua taunu’u i ai tagata malaga asiasi, o le mafua’aga lea ua ou toe talosagaina ai ma le agaga maualalo lau afioga i le ali’i Pulesili o le ASPA, fa’amolemole, ia ave la outou fa’amuamua i le toe fa’aleleia o auala i Fagatogo, ou te malamalama i le fa’afitauli o lo o fetaia’i ma le malo, o le faigata lea ona saili le itu tau tupe e fa’atino ai galuega fa’apenei, ae afai tatou te galulue ma saili, e mafai lava ona maua vaega tupe e fa’aleleia ai manaoga e pei ona taua”, o se vaega lea o le tusi a Maugaoali’i ia Utu.

 

O manatu ma talosaga ua fa’aalia e Maugaoali’i i lana tusi ia Utu, o manatu fo’i ia ma talosaga sa ia fa’aleoina i le fonotaga ma le Faatonusili o le Ofisa o Galuega Lautele a le malo i le vaiaso na te’a nei, lea fo’i na ia fa’aleoina ai le tatau lea ona ave le fa’amuamua i le fa’aleleia o auala i le taulaga e aofia ai ma le auala o lo o ui atu i le uafu, ma aga’i atu ai i tua o le maota fono a le atunu’u.

 

Na taua e Faleosina Voigt ia Maugaoali’i i le iloiloga sa faia i le vaiaso na te’a nei, o le a galulue malosi lona Ofisa e saili se vaega tupe e fa’atupe ai le galuega mo le fa’aleleia o le auala e pei ona talosagaina e le ali’i faipule.

 

FOLIGA LE MANUIA TALA O LE TUPE A LE ASPA I LE KUATA 3

 

O le ripoti i galuega fa’atino a Matagaluega ma Ofisa eseese a le malo, lea e pei ona tauaaoina e le Fono Faitulafono, o lo o atagia mai ai foliga le manuia i tulaga o tupe maua a le Ofisa o le Pulega o le Eletise ma le Suavai a Amerika Samoa (ASPA), ina ua latou le ausia se vaega tele o tupe sa valoia e tatau ona maua i le kuata 3 lenei o ana galuega fa’atautaia.

 

E $116.4 miliona le aofa’i o le paketi a le ASPA sa pasia e fa’atino ai ana galuega mo le tausaga tupe lenei 2016, ae ina ua mae’a le Kuata 3 lea na fa’amutaina i le masina o Iuni na te’a nei, e na o le 33% le tupe na mafai e le ASPA ona ao mai mo lana paketi mai tupe lotoifale atoa ai ma tupe fesoasoani mai le feterale.

 

E $116.4 miliona sa valoia e le ASPA e tatau ona oo i ai lana tupe fa’aalu, ae ina ua mae’a le Kuata 3, e na o le $66.4 miliona le aofa’i o le tupe ua mae’a ona fa’aaoga, ma ua atagia mai ai le maualuga atu o tupe ua fa’aaoga e le ASPA nai lo tupe sa mafai ona maua mai, i le aofaiga e $5.3 miliona.

 

O le vaega tele o tupe fa’aalu a le ASPA i le Kuata 3 e pei ona taua i le ripoti, o le $28.1 miliona i tulaga o konekarate, tusa lea o le 43.4% o lana tupe fa’aalu. Mai le aofaiga e to’a 466 o ana tagata faigaluega, o le to’a 36 o i latou o lo o i lalo o konekarate, to’a 387 o tagata faigaluega tumau, ma tagata e to’a 43 e le o ni tagata faigaluega tumau.

 

Na taua e le ASPA i totonu o lana ripoti e fa’apea, o le fa’aitiitia o le tau o le suau’u atoa ai ma le tuai lea ona pili o ni isi o vaega tupe o lo o fa’atupe mai e le feterale, o ni isi ia o mafu’aaga ua ala ai ona fa’aitiitia tupe maua mo lana paketi i le Kuata 3 o le tausaga tupe lenei 2016.

 

E ui i tulaga fa’aletonu e pei ona taua i le ripoti, ae o lo o taua le mafai pea lea ona fa’atinoina galuega a le ASPA, ma ua fa’amoemoe e tatau ona mae’a le kuata mulimuli o le tausaga tupe lenei 2016, o lo o tulaga lelei pea le aga’i i luma o lana tautua.

 

AVEA MA LU’ITAU FA’AFITAULI I TUA MAI LE FETERALE MO LE DHLS

 

O tulaga tau fa’aletonu i tupe maua mai le feterale a le Matagaluega o le Puipuiga o le Saogalemu Lotoifale (DHLS), ua mafua ai ona avea ma lu’itau ni isi o fa’aiuga ua faia, ina ia mautinoa ai o lo o mulimulita’i ma tausisia auala e fa’atino ai galuega atoa ai ma le fa’aaogaina o tupe fesoasoani mai fafo.

 

E pei ona taua e le afioga i le ali’i Faatonusili ia Iuniasolua Savusa i le ripoti o galuega fa’atino a lona Ofisa mo le Kuata 3 ua mae’a atu, o ni isi o lu’itau o lo o feataia’i pea ma lona Ofisa i le va feagai ai ma le Ofisa o le FEMA atoa ai ma le Ofisa o le Puipuiga o le Saogalemu Lotoifale a le malo tele, ua mafua ai ona tuai le faia o ni isi o galuega ma fa’aiuga.

 

Mo se fa’ata’ita’iga e pei ona taua i le ripoti, o ni isi o lu’itau e aofia ai le tuai lea ona fa’agasolo tulaga i le okaina mai o oloa mai fafo e moomia mo le fa’atinoina o galuega, tuai le totogiina atu o tupe i pisinisi, atoa ai ma le taua o le fa’agasoloina o pepa mo tagata faigaluega, lea e tatau ona ui muamua atu i le Ofisa o Tagata Faigaluega a le malo, ona fa’atoa mafai ai loa lea ona fa’amaonia se tagata faigaluega.

 

E ui i nei fa’afitauli, o lo o galulue pea le Ofisa i auala fa’a faigofie e mafai ai ona foia le toe alia’e mai o fa’afitauli nei i le lumana’i.

Comment Here