Tala otooto mai le Fono Faitulafono

ausage@samoanews.com

IUGAFONO ALOAIA AI TAUTUA TOFA PAOPAOAILUA J. FIAUI

 

O le taeao ananafi na pasia ai e le maota o sui sa latou i’ugafono e momoli atu ai le agaga o le fa’avauvau a le Fono Faitulafono, e fai ai ma sui o tagata ma le malo o Amerika Samoa, i le aiga Sa Fiaui, ona o le usuia ai o le fono e le fetalaiga ia Paopaoailua Joe Matamataiauetele Fiaui, o le sa tautua i le maota o sui mo le tele o tausaga, ma aloaia ai lana tautua i totonu o lona aiga, nu’u, itumalo ma le atunu’u.

 

O lo o taua i le i’ugafono le lagona o le leo i Rama i le itumalo o le Maoputasi #5, ina ua fa’ia se tasi o pou tu o le itumalo, o se tasi fo’i sa tautua i le tofi faipule o le itumalo i le maota o sui, ina ua usufono le tofa a Paopaoailua i le aso 1 Setema 2016 i le maota gasegase i Fagaalu, a o si’omia o ia e ona aiga.

 

O le mae’a ai o le soifua a’oa’oina o Paopao i le aoga tulagalua a Feleti ma le aoga maualuga a Amerika Samoa, na aga’i atu ai loa o ia i fafo ma fa’aauau ana aoaoga i le Kolisi a Uesiliana i Virgina, atoa ai ma le Kolisi a York i Nebraska.

 

O le mae’a ai o lana tautua o se seila i fuava’a a le malo tele e pei ona lagolago ai i le militeli, na manatu ai loa o ia e toe fo’i mai i lona aiga i Amerika Samoa.

 

A o le i galue o ia i le Ofisa Vaai Tau a le atunu’u, sa avea o ia ma faiaoga i le aoga maualuga a Samoana.

 

I le mae’a ai o le taimi na tautua ai i le fono faitulafono, sa tofia ai loa o ia e le afioga i le ali’i kovana ia Lolo Matalasi Moliga e avea ma sui o le ofisa o le Kovana, e feso’ota’i ma le Fono Faitulafono mo ni isi o mataupu e moomia le fia fa’aleleia, ma e valaau mai lona matai, o lo o fa’aauau pea ona tautua o ia i le galuega na tofia ai o ia e le kovana e galue ai.

 

PASIA PILI SI’I AI PENEFITI TAGATA LITAEA UA MALILIU

 

E 12-0 le palota na pasia ai e le maota o sui i le taeao ananafi le tulafono sa talosagaina e le faigamalo a Lolo ma Lemanu, e fa’aopoopo ai i luga le aofa’i o penefiti e maua e le tagata fai saofaga i le Litaea e maliu ae le i taliina lana litaea.

 

I le tulafono tuai sa i ai, e $1,500 le tupe e totogi atu e le Ofisa o le Litaea i le tagata fai saofaga e maliu ae le i o o i le taimi e agava’a ai o ia i le litaea, peita’i o le suiga i le tulafono lea ua pasia e le maota o sui, o le a maua ai e le tagata fai saofaga ua maliu ae lei agava’a i le litaea le tupe e $3,000.

 

E ui ua leva ona fa’ataunu’uina le iloiloga a le Komiti o le Litaea a le maota o sui fa’asaga i lenei mataupu, peita’i na taua e le ta’ita’i fono o le Komiti o le Litaea a Vailoata Eteuati Amituana’i e fa’apea, na fa’atali se fa’aiuga a le komiti i ripoti mai le Ofisa o le Litaea a le malo, i le tulaga tonu o lo o i ai le malosi o le teugatupe a le litaea i le taimi nei, atoa ai ma ni a’afiaga pe afai ae to’atele tagata fai saofaga e maliliu i le taimi e tasi.

 

I ripoti e pei ona fa’ailoa i luma o le maota o sui i le vaiaso nei i le taimi na pasia ai le faitauga fa’alua o le tulafono, sa taua ai le leai o se a’afiaga o le teugatupe o le litaea pe afai e totogi atu lenei vaega tupe i tagata fai saofaga ua maliliu.

 

I le tino o le tulafono e pei ona ulufale mai ai i luma o le fono faitulafono e fa’apea, o le taua ai le taua tele o le si’i i luga o le vaega tupe lenei e fesoasoani atu ai i le tagata fai saofaga ua maliu.

 

Na taua fo’i e le faigamalo i le tino o le tulafono e fa’apea, mai le tele o tausaga ua mavae, sa tumau pea lava i le $1,500 le tupe e totogi atu mo tagata fai saofaga ua maliliu ae le i agava’a i lafoga, e fesoasoani ai i o latou aiga i o latou toe sauniga, peita’i o le taua o le suiga o le tulafono e pei ona fuafuaina, o le a mafai e aiga o i latou ua maliliu ona maua se isi fesoasoani tupe e fa’atino ai manaoga mo toe sauniga o e pele ua maliliu.

 

TULAGA UMA O LO O TUTUPU I LE ATUNU’U

 

Na fa’ailoa e le afioga i le ali’i Faipule mai le itumalo o Manu’a #2 ia Toeaina Faufano Autele i luma o le maota o sui i le vaiaso nei, o se tulaga taua tele le tatau lea ona silafia e afioga i Faipule tulaga uma o lo o tutupu i totonu o le atunu’u, e ala i le tofu lea o i latou ma nusipepa e sapalai atu i luga o a latou laulau po o Ofisa i taeao uma, ina ia fa’a faigofie ai ona latou silafia mea o lo o tutupu i le atunu’u.

 

I le lagolagoina ai e le afioga i le ali’i Faipule o le galuega a le au fa’asalalau i le atunu’u, sa ia fa’atula’i ai se fautuaga ina ia tatau ona lesitala afioga i faipule ina ia faigofie ona latou tauaaoina kopi o nusipepa i taeao ta’itasi, ma faigofie ai ona latou maua tala i mataupu eseese o lo o tutupu i le atunu’u.

 

Na taua e ni isi o faipule e to’alua i le Samoa News e fa’apea, e taua le mataupu ua fa’atula’i e le ali’i faipule mai Manu’a, o se auala faigofie fo’i lea e mafai ai ona galulue vavalalata faipule ma sui o vaega fa’asalalau i le atunu’u.

Comment Here