Ads by Google Ads by Google

Tala otooto mai le Fono Faitulafono


[ata: foa'i]
ausage@samoanews.com

PASIA FAIPULE PILI SII AI SAOFAGA A TAGATA LITAEA

 

O le vaiaso na te’a nei na pasia ai e le maota o sui le pili e sii ai le saofaga a tagata litaea mai le 3% o lo o i ai i le 5%.

 

O lenei tulafono taufa’aofi, ua o gatasi ma le fuafuaga a le Ofisa o le Litaea a le malo o Amerika Samoa, ina ia aloaia loa le tuuina atu o le si’itaga i luga o penefiti a tagata litaea, e fuafua i le tau o le soifuaga ua i ai le atunu’u i le taimi nei (COLA).

 

Afai ae pasia e le Fono Faitulafono lenei tulafono ma sainia loa e le Kovana, o le aso 1 Oketopa 2018 ua fa’amoemoe e aloaia ai loa lenei si’itaga. O le si’itaga e aofia ai le si’i o saofaga e totogi e tagata litaea atoa ai ma le sao e totogi e le malo.

 

I le iloiloga sa faia a le Komiti o le Litaea a le maota o sui, ma sui mai le Ofisa o le Litaea a le malo i le vaiaso na te’a nei, e aofia ai le Pulesili o le Ofisa o le Litaea ia I’aulualo Talia Fa’afetai ma le Ta’ita’ifono o le Komiti Fa’afoe ia Va’anatiu Iafeta Tofala, sa la faailoa ai i afioga i Faipule le taua tele o le sii i luga o saofaga a tagata litaea, ina ia fesoasoani ai i le fa’atupuina i luga o le tupe a le litaea.

 

Na taua e I’aulualo i lea iloiloga e fa’apea, e silia i le $2 miliona le tupe o lo o totogi atu e le Ofisa o le Litaea i tagata litaea uma a le malo i masina ta’itasi mo a latou penefiti o lo o maua. Ae a fuafua atu i le tupe o loo maua mai i totonu i le masina e tasi, e na o le $800,000 le tupe o loo maua mai i saofaga a tagata fai saofaga, e le taitai lava lea tupe e fa’atupe ai le manaoga.

 

Sa ia taua fo’i e fa’apea, o masina uma lava e aveese mai ai le tusa ma le $1.5 miliona mai le tupe a le litaea e fa’apaleni ai le tupe o lo o totogi atu mo penefiti a tagata litaea.

 

Na taua e afioga i Faipule lo latou lagolagoina o le tatau lea ona sii saofaga a tagata totogi saofaga i le litaea, ina ia fesoasoani ai i le manaoga o le si’i lea i luga o saofaga ma tupu ai le teugatupe a le litaea. Na taua e Faipule le taua tele o le tupu o le teugatupe, ina ia fesoasoani ai i fanau mo le lumana’i.

 

O le pili sa fa’aulufaleina e le afioga i le ali’i faipule ia Vailoata E. Amituana’i, o ia fo’i lea o le ta’ita’ikono, atoa ai ma isi afioga i faipule e to’a 11 e aofia ai Fetu Fetui Jr, Timusa Tini Lam Yuen, Fagaoatua D. Salavea, Veevalu Meauta Mageo, Matagi David Mauga, Vailiuama Steve Leasiolagi, Gafatasi Afalava, Fialupe Fiaui Lutu, Sataua Dr. Mataese Samuelu, Vesi Talalelei Fautanu ma Manumaua Wayne Wilson.

 

I’UGAFONO FA’AFETAIA AI TAUTUA A LE LALELEI O AMERIKA SAMOA

 

Ua pasia e le Fono Faifaitulafono se i’ugafono na afua mai i le maota o sui, e fa’afetaia ai le Lalelei o Amerika Samoa ia Matauaina Toomalatai, i lona fa’aeaea lea ia Amerika Samoa e ala i lona manumalo i le pale o le Lalelei o le Pasefika i le tauvaga sa faia i Fiti i le masina o Tesema o le tausaga na te’a nei.

 

O le Lalelei o Amerika Samoa e malaga mai i le afioaga o Onenoa, ma o le afioga i le ali’i faipule mai le itumalo o Vaifanua ia Lavea Fatulegae’e Palepoi Mauga na fa’aulufaleina le i’ugafono.

 

E pei ona taua i le i’ugafono e faapea, ua 15 tausaga talu ona le toe oo mai le pale o le Lalelei o le Pasefika i Amerika Samoa. Na fa’afetaia e le Fono ia le Lalelei o Amerika Samoa atoa ai ma le galuega fita sa feagai ma le vaega a le MASI, i le lagolagosua lea ia Matauaina mo lona fa’amoemoe.

 

Na fa’ataua e le Lalelei o Amerika Samoa i le tauvaga e saili ai se Lalelei o le Pasefika le manulaiti, e fia avea o ia ma Tausima’i ina ia fesoasoani ia i latou ua aafia i le gasegase o le suka, atoa ai ma lona taumafai ina ia fa’alauiloa ta’iala e fesoasoani ai i le foia o lenei gasegase.