Ads by Google Ads by Google

Tala otooto mai le Fono Faitulafono


[ata: SN]
ausage@samoanews.com

FA’AMAONIA E LE SENATE IA ALAILIMA AVEA MA FA’AMASINO

 

E 18-0 le palota a le Senate na pasia ai tofiga a le afioga i le ali’i Kovana mo le tama’ita’i Loia ia Marie Ala’ilima, e avea ai o ia ma Fa’amasino o Mataupu Tau Pulega (Administrative Law Judge). O le tausaga e 2007 na avea ai Ala’ilima ma Fa’amasino le tumau o Mataupu Tau Pulega, peita’i o lea ua fa’atoa aloaia lona tauaveina o lenei tofiga taua ina ua talia aloaia e le Senate tofiga a le ali’i Kovana, tofa Lolo Matalasi Moliga.

 

O le fa’aiuga a le Senate e pasia ai le suafa o Ala’ilima, na faia lea ina ua mae’a se iloiloga sa faia a le Senate e silia i le 15 minute le umi. Na fesiligia e Senatoa le tama’ita’i Fa’amasino e fa’atatau i lana Ofisa Loia po o fa’aauau pea ona fa’atino, ae na tali Ala’ilima, ua tusa nei ma le 5 tausaga talu ona ia le toe taliaina ni mataupu fou e fa’aulu atu i lana Ofisa Loia.

 

O le tausaga e 1996 na amata galue ai Ala’ilima i le galuega fa’aloia i le teritori, ma fa’aauau mai ai lava seia tofia o ia e avea ma Fa’amasino le tumau i Mataupu Tau Pulega. O le ituaiga mataupu e taulimaina e le Fa’amasinoga o Mataupu Tau Pulega, e aofia ai tagi e fa’aulu e tagata ta’ito’atasi fa’asaga i faaiuga a Komiti Fa’afoe a le malo, atoa ai ma tagi e faila e tagata faigaluega a le malo e fesiligia ai fa’aiuga e faia e Fa’atonusili o Matagaluega eseese.

 

O le tofiga ua tauaveina nei e Ala’ilima, sa tauaveina mai e le afioga i le ali’i Fa’amasino ia Toetagata Albert Mailo ua malolo ona o gasegase o le tino. Talu mai le tausaga e 2000 ina ua fa’atoa fa’atula’i mai lenei tofiga, o le to’atolu ai lea o i latou ua filifilia i lenei nofoaga. O le ulua’i Fa’amasino sa tofia o le tofa a Sialega Malaetasi Mauga Togafau.

 

I le tusi a Lolo sa tu’uina atu i le Senate e fa’alauiloa ai lona tofiaina o Ala’ilima, sa ia taua ai le maualuga o agava’a o Ala’ilima ua mafua ai ona ia filifilia o ia i lenei tofiga taua. Sa ia taua ai fo’i lona faafetaia o le auaunaga a le afioga a Mailo, mai le tele o tausaga sa ia tauaveina mai ai le nofoa.

 

TULAFONO SUIA AI TAUSAGA E FA’AIPOIPO AI SE TAMA’ITA’I

 

Ua i luma o le maota o sui se tulafono taufa’aofi na fa’aulufaleina e le afioga i le Tama’ita’i Faipule ia Fialupe Felila Fiaui Lutu, e suia ai le tausaga faaipoipo o se tama’ita’i mai le 14 i le 18.

 

O le tulafono o lo o i ai nei, o lo o taua ai le tulaga lea, “O le tane e ao ona atoa le 18 tausaga pe sili atu e fa’aipoipo ai, ae o le tama’ita’i ia le itiiti ifo i le 14 tausaga le matua”.

 

O le agaga o le suiga i le tulafono o lo o i ai, ia suia le tausaga e fa’aipoipo ai le tama’ita’i mai le 14 e pei ona i ai i le tulafono i le 18 tausaga le matua.

 

O lo o taua i le teuteuga o le tulafono e fa’apea, “Afai o le tama’ita’i e i lalo ifo o le 18 tausaga le matua, ae ua atoa le 16 tausaga o lona olaga, e tatau ona ia te ia ona ia maua le maliega a se tasi o matua poo le o vaaia o ia.

 

Ua taoto atu nei lenei tulafono i le Komiti o Mataupu Tau Tulafono mo le fa’atulagaina o se iloiloga e iloilo ai suiga o le tulafono.