Ads by Google Ads by Google

Tala otooto mai le Fono Faitulafono

ausage@samoanews.com

FESILIGIA PISINISI FOU UA FAATUTU E LE MALO

 

O le iloiloga a le Komiti o le Tamaoaiga a le Senate sa faia i le vaiaso na te’a nei, na fesiligia e le afioga i le ali’i Senatoa ia Tuaolo M. Fruean le Faatonusili o le Fefaatauaiga ma Alamanuia, pe ua i ai ni pisinisi fou ua mafai ona fa’atutu e le malo talu ona avea o ia ma Faatonusili o le Ofisa o Atina’e a le malo.

 

Na faailoa e Tuaolo ia Fuiavailiili Keniseli Lafaele e faapea, e matua taua tele lana galuega o lo o faia i le atina’eina o le tamaoaiga o le malo i le taimi nei.

 

I le mae’a ai ona fa’afofoga o afioga i Senatoa i le faaletonu e pei ona tula’i mai i le faatuina o se pisinisi e pulea e se kamupani Filipaina, ma le faamoemoe e gaosia ai apa taumafa i le atunu’u, ao lea ua le taunu’u, na fesiligia ai loa e Tuaolo galuega o lo o fa’atinoina e Fuiavailiili mo le atina’eina o le malo.

 

Na taua e Fuiavailiili i lana molimau, e leai ni pisinisi fou a le malo na mafai ona faatutu i le taimi na avea ai o ia ma Faatonu. Sa ia taua atili e faapea, o le tamaoaiga o le atunuu o loo faalagolago malosi lea i tulaga o faiga faiva.

 

Na fautuaina e Tuaolo ia Fuiavailiili ina ia silasila i auala eseese e mafai ai ona tatala ni isi o pisinisi fou i le atunu’u, e fesoasoani ai i le atina’e ma le tamaoaiga.

 

FESILIGIA E FAIPULE MATAUPU FAATATAU TUPE MO LE HAWAIKI CABLE

 

O se tasi o mataupu na fesiligia i le iloiloga a le Komiti o le Litaea a le maota o sui, ma sui o le Litaea a le malo i le vaiaso na te’a nei, o le talanoaina lea o le tupe o lo o inivesi atu e le malo i le uaea mo fesootaiga i lalo o le sami (Hawaiki Cable).

 

O le afioga i le Faipule ia Vailoata E. Amituana’i sa taitaia le iloiloga. O molimau e aofia ai le Pulesili o le Litaea ia Iaulualo Talia Faafetai ma se sui sinia o le Ofisa ia Doreen Amituana’i.

 

E pei ona manino i le iloiloga, e $17 miliona le vaega tupe o lo o inivesi atu e le malo mo le Hawaiki Cable. Na manino i le iloiloga e fa’apea, o le vaega tupe e pei ona inivesi atu e le malo i le Hawaiki Cable e $17 miliona, ua mafai ai ona fa’amatu’u mai le avanoa e avea ai le Litaea a le malo ma totino o le kamupani mai Hawaii o lo o faatautaia le uaea o fesootaiga, lea o lo o faafoeina e le Ofisa o Fesootaiga a Amerika Samoa i le taimi nei (ASTCA).

 

Ina ua fesiligia e afioga i Faipule tulaga e fa’atatau i lenei uaea o fesootaiga, na mafai ai ona faamanino e molimau e fa’apea, o le masina o Iuni o le tausaga nei o lo o fa’amoemoe e tatau ai ona taunu’u aloaia mai lenei uaea i laufanua o le atunu’u.

 

LUMANA’I O LE FAIGAMALO A AMERIKA SAMOA

 

O le itula e 11:00 i le taeao nei lea ua faatulaga e faataunuu ai se iloiloga a le Komiti o Faamasinoga a le maota o sui, mo le fesiligiaina lea o le tulaga i le lumana’i o le Faigamalo a Amerika Samoa. O le afioga a Tapaau Dr. Dan Aga, o le Faatonusili o le Ofisa o lo o gafa ma le taulimaina o mataupu e faatatau i le Tulaga Faavaomalo a Amerika Samoa, ua faamoemoe e molimau i lenei iloiloga.

 

O le agaga autu e pei ona naunau afioga i Faipule e fesiligia ai Tapaau i lenei mataupu, ona o lo o tele pea lava mataupu e fa’atatau i le suiga o le Fa’avae e ao ona manino i ai le atunu’u aemaise le Fono Faitulafono.

 

O ni isi o mataupu e aofia ai sui o itumalo i le Fono Faitulafono, aemaise ai tulaga i le va feagai o Amerika Samoa ma le malo tele o Amerika.