TULA’I FA’AALOALO A LE MAOTA O SUI MO LE FA’ALAVELAVE I VEGAS

Na fa’ai’u le tauaofiaga a le maota o sui i le taeao ananafi, i se tula’i fa’aaloalo na talosagaina e le afioga i le tama’ita’i faipule ia Vui Florence Saulo, e manatua ai soifua o i latou e lata i le to’a 60 ua fa’amaonia mai i ripoti ua maliliu, e mafua mai i le fa’alavelave lea na tafana ai e se ali’i ni tagata sa auai i se fa’afiafiaga i totonu o se fale tele lava i le aai o Las Vegas.

Saunoa Vui e fa’apea, e le o se fa’alavelave e faigofie ona talia e tagatanu’u o Amerika Samoa, ona o nofoaga o lo o tula’i mai ai lenei fa’alavelave, ua to’atele le atunu’u e masani ona malaga atu i ai, o lo o to’atele fo’i tagata Samoa o lo o nonofo ma fa’amautu ai.

Na taua e Vui le tatau lea ona faia se tula’i fa’aaloalo, e aloaia ai sofua o i latou uma ua maliliu, atoa ai ma le manatuaina o nai o latou aiga ua a’afia i fa’anoanoaga.

O le afioga i le ali’i faipule ia Gafatasi Afalava na saunia le tatalo fa’aiu, e talosia ai aiga uma o i latou ua maliliui lenei fa’alavelave.

E 3 aso le umi lea ua tuuina mai e le Peresetene o le malo o Amerika, e sisi fa’avaeloto ai tagavai uma i totonu o Setete ma Teritori o le Iunaite Setete, e aloaia ai soifua o i latou ua maliliu i lenei fa’alavelave mata’utia.

PASIA SENATE IUGAFONO SOOFAATASI SUI AI LE FA’AVAE

E 14-1 le palota na pasia ai e le Senate le latou iugafono soofaatasi, e tuu atu ai le malosi i le Fono Faitulafono e fa’aleaoga ai le teena a le Kovana i se pili e pasia e le Fono Faitulafono. O lea iugafono soofaatasi e sui ai le Fa’avae Toe Teuteu a Amerika Samoa.

E 2/3 le aofa’i o le palota e manaomia ina ia pasia ai le iugafono mo le suiga o le Fa’avae. E na o le afioga i le tama’ita’i Senatoa ia Fonoti T. Aufata na palota leai i le iugafono soofaatasi a le Senate.

O le taeao ananafi na tuuina atu ai i lona faitauga muamua le iugafono soofaatasi a le Senate, i luma o le maota o sui, ma ua taoto atu nei i le Komiti o Tulafono a le maota, lea o lo o taitai ai le afioga i le Sui Fofoga Fetalai ia Fetui Fetu Jr.

O le agaga o afioga i Senatoa i le taimi na talanoaina ai lenei mataupu, ia aua ne’i fefefe le Fono e fai suiga mo le manuia o le atunu’u. I le taimi o felafolafoaiga a le Senate i le vaiaso na te’a nei ina ua talanoaina lenei mataupu, na saunoa ai afioga i Senatoa i le taua o le tuu mai o faaiuga e fai lava e Amerika Samoa, mo le manuia o lana faigamalo.

Na faamanino e le Faatonusili o le Ofisa e iloiloina Tulaga Faavaomalo a Amerika Samoa, afioga Tapaau Dr. Dan Aga e fa’apea, e fa’a 4 ona tuuina atu suiga o le Fa’avae e palota i ai le atunu’u, e fa’a 4 fo’i ona latou teena.

Saunoa le peresetene o le Senate, afioga Gaoteote Tofau Palaie e fa’apea, o tupulaga uma lava o loo tete’e i taumafaiga mo suiga o le Fa’avae, o i latou ia e le o malamalama i le taua o le soifuaga faa Samoa o lo o soifua ai tuaa ma aiga i aso fai soo. Ae iloa gofie fanau e fa’alogo i matua ma vaavaai i gaioiga o loo faia e matua i aso uma o le olaga, i le fa’atauaina lea o le aganu’u ma le olaga fa’a Samoa, o i latou ia e malamalama ma lagolago i taumafaiga mo le manuia o le atunu’u.

O le Fa’avae o loo i ai, afai e pasia e le Fono se pili ae teena e le Kovana, ona toe ave lea i le Fono e palota ina ia faaleaoga le tete’e a le malo, e ala i le palota o le 2/3 a le Fono. Afai loa e maua le palota e pei ona manaomia, ona tuuina atu loa lea o le fa’aiuga e fai mai e le Failautusi a le Initeria.

Na taua e afioga i Senatoa e fa’apea, e i ai mataupu ua uma ona tuuina atu i le Failautusi a le Initeria mo se fa’aiuga, e oo mai lava i le taimi nei e lei tuuina mai lava se fa’aiuga e uiga i lea mataupu.

E le i fa’atulagaina ni iloiloga a le maota o sui e tusa ai o lenei iugafono soofaatasi e sui ai le Fa’avae.

TEENA SENATE PILI FAAOPOOPO AI SENATOA MO MANU’A

E 9-9 le palota na teena ai e le Senate i le vaiaso na te’a nei le pili e toe fa’aopoopo ai nofoa e 2 mo le itumalo o Manu’a i le maota maualuga. O le agaga o le pili e pei ona fa’aulufaleina ai i luma o le Senate, e le o manatu le itumalo o Manu’a e fa’aopoopo ni ona sui fou se to’atolu, ae o loo talosagaina ia toe fa’afo’i nofoa a le itumalo i le aofaiga e 5 e pei ona i ai le Feagaiga sa osia ma Amerika i tausaga ua mavae.

I le iloiloina o lenei mataupu i luma o le Senate, sa molimauina ai le to’atele o ni isi o Senatoa sa molimauina lo latou le lagolagoina o lenei tulafono.

Na taua e ni isi o Senatoa e fa’apea, afai ua a’e se finagalo o Manu’a e fa’aopoopo a latou nofoa i totonu o le Senate, e tatau fo’i la ona fa’aopoopo nofoa o ni isi o itumalo tetele i le atunu’u.

Na fa’amanino e le afioga i le ali’i senatoa ia Galea’i M. Tuufuli i le iloiloga e fa’apea, o le Fono o le Fa’avae lea na suia ai nofoa o le itumalo o Manu’a, e lei auai Manu’a i le taimi o le fa’aiuga, ae na tula’i ese i latou ona o le le fiafia i le fa’aiuga.

O le talitonuga o Manu’a, o le nu’u e tasi i Manu’a, o le itumalo lava fo’i lea. Talu ai lava e 5 nu’u i Manu’a, lona uiga fo’i e 5 itumalo, e tatau fo’i la ona tofu le itumalo ma le Senatoa.

E le o i ai se fuafuaga a le maota o sui e vave faia sa latou fa’aiuga i lenei mataupu, e pei ona saunoa le afioga Fetui i le taeao ananafi.