Ads by Google Ads by Google

Tala otooto mai le Fono Faitulafono

ausage@samoanews.com

TALANOAINA MEAALOFA MO ATUNUU AAFIA FAALAVELAVE FAALENATURA

 

O le ofoina atu o se fesoasoani a le Fono e fesoasoani i tagata i vaega eseese o le lalolagi e aofia ai ma le malo tele, ua a’afia o latou aiga ona o fa’alavelave fa’alenatura, o se tasi lea o mataupu na talanoaina i luma o le maota o sui i le aso Faraile na te’a nei.

 

O le afioga i le ali’i Faipule ia Gafatasi Afalava na tula’i ma fa’aleo lenei mataupu taua. Saunoa Gafatasi e fa’apea, e le o toe pogisa le maimoa a Amerika Samoa i tala o lo o salalau mai i televise, i le tulaga pagatia ua i ai le to’atele o tagata, ona o le mata’utia o fa’alavelave fa’alenatura ua a’afia ai o latou atunu’u.

 

Sa ia talosagaina le Fofoga Fetalai ia Savali Talavou Ale, mo se avanoa e fa’amaopoopo ai se fesoasoani a le maota o sui, ona auala atu lea i le Koluse Mumu a Amerika Samoa, latou te fa’aooina atu lenei fesoasoani i tagata ua a’afia.

 

Na tula’i le afioga i le ali’i Faipule ia Fagaoatua D. Salave’a ma ia lagolagoina le finagalo o Gafatasi.

 

Saunoa Fagaoatua e fa’apea, e to’atele fo’i atunuu o le lalolagi na tuuina mai a latou fesoasoani, ina ua a’afia Amerika Samoa i le galulolo o le 2009. I lona talitonuga, o se tulaga talafeagai fo’i le tatau lea ona tuuina atu se fesoasoani a Amerika Samoa mo aiga ma atunu’u ua a’afia.

 

I le avea ai o le aso Faraile na te’a nei, o le aso na atoa i ai le 8 tausaga talu ona tuana’i le galulolo lea na a’afia ai Amerika Samoa ia Setema 29, 2009, lea na fa’aleagaina ai le tele o meaaoga ma ma’imau ai soifua e silia i le to’a 30, na talosagaina ai fo’i e Fagaoatua le tatau lea i le maota ona manatua aiga na maliliu o latou tagata ona o lenei fa’alavelave matuia.

 

Na lagolagoina e le Fofoga Fetalai le fautuaga mo le tu’u fa’atasia lea o se fesoasoani mo tagata ma atunu’u ua a’afia ona o fa’alavelave fa’alenatura. O le auala lea na fa’amaopoopo ai le fesoasoani a le maota o sui mo le fa’amanatuina o le Iupeli auro a le Hope House i le vaiaso na te’a nei, o le auala fo’i lea na manatu Savali e tatau ona fa’amaopoopo ai se fesoasoani a le maota mo le manaoga e pei ona tula’i mai.

 

Ae afai e le lava ai se vaega tupe, ona fuafua lea o se iugafono e talosagaina ai le faia o se fesoasoani a le atunu’u atua mo i latou ua a’afia. Saunoa atili Savali e fa’apea, e i ai lona talitonuga o lo o tapena ai fo’i le afioga i le Kovana ma le faigamalo mo lenei fa’amoemoe.

 

TOE FA’ATULAGA FONOTAGA A FAIPULE MA LE FALETUPE TBAS

 

Ua toe fa’atulagaina nei se isi aso e fa’ataunu’u aloaia ai le fonotaga lea na fuafua e faia i le aso Faraile na te’a nei, i le va o le Komiti o le Tamaoaiga a le maota o sui, ma sui o le Faletupe Fa’ateritori (TBAS), ina ua le mafai ona autova’a atu molimau mo le iloiloga.

 

Na fa’ailoa e le ta’ita’i komiti a le maota o sui ia Samuel Ioka Meleisea e fa’apea, ua avea le le avanoa o le Taitaifono o le Faletupe, afioga i le matua ia Utu Abe Malae ma auala ua le mafai ai ona oo atu le ali’i Peresetene o le Faletupe i le aso Faraile, ma mafua ai loa ona toe tolopo le aso o le iloiloga.

 

O le iloiloga lenei na pasia e le maota o sui le faapitoa lea mo na o afioga i Faipule ma sui o le Faletupe, e le fa’atagaina ai ni tagata fa’alogologo e aofia ai ma le au fa’asalalau.

 

Na talosagaina e le Faletupe le maota o sui mo se avanoa e tapunia ai le iloiloga mai le aofia ai ni isi tagata e ese mai i afioga i Faipule, ona o lo o i ai mataupu ogaoga ma le ma’ale’ale e le tatau ona silafia a le atunu’u. Na talia e le Fofoga Fetalai le fautuaga ma poloaina ai loa le Satini o le maota ina ia leoleo le maota i le taimi o le iloiloga.

 

TETE’E FAIPULE SAOLE SAILIGA TUPE FA’AOO ATU I LE FONO

 

Na fa’aalia e le afioga i le ali’i Faipule mai Saole, afioga Kitara Vaiau lona matua le lagolagoina o tusi aisa mo sailiga tupe o lo o autova’a atu i luma o le maota i le tele o taimi.

 

I le sosoo atu ai o tusi aisa i luma o le maota i le vaiaso na te’a nei, na tula’i ai loa Kitara ma fa’aleo lona lagona fa’asea e tusa ai o lea tulaga. Saunoa le ali’i Faipule e fa’apea, ua fai ma masani a tagata le avatu o tusi aisi i ulma o le maota, ae le o se tiute lea na mafua ai ona filifilia afioga i Faipule e o latou itumalo, o le o atu e tali i tusi aisi a ni isi o le atunu’u.

 

Sa ia talosagaina le Fofoga Fetalai o le maota o sui, tofa Savali Talavou Ale ina ia fa’atumauina pea le mamalu o le maota, e ala i le taofia lea o le toe tuuina atu o ni isi tusi aisi i le lumana’i.

 

Na fa’amanino e Savali ia Kitara e fa’apea, o le isi lea vaega o le auaunaga a le Faipule, o le tali atu i manaoga a le atunu’u. Saunoa atili Savali e fa’apea, talu lava ona taunu’u atu i le Fono, o lo o fa’aauau pea ona oo atu tusi aisi mai vaega eseese o le atunu’u seia oo mai lava i le taimi nei, o le tiute fo’i lea a ta’ita’i o le Fono, o le tali atu e tusa ai o a latou m anaoga.