Tala otooto mai le Fono Faitulafono

Le maota fono a le atunu’u o lo o i ai i le taimi nei, lea ua taua i ripoti e fa’apea, e le o toe mamao se taimi ae tatala loa i lalo le maota tuai lenei ae fausia le maota fono fou i se vaega tupe na maua mai i le Pone a le malo.  [ata AF]
ausage@samoanews.com

FUAFUA LE FAUSIAINA O LE FALE FONO FOU

 

Na avea le talosaga a le afioga i le ali’i faipule ia Toeaina Faufano Autele, mo se avanoa e toe fa’aleleia ai ni isi o vaega o ofisa o Faipule ua maitauina le fa’aletonu, ma itu na fa’ailoa ai loa e le fofoga fetalai i luma o le maota o sui, le i ai o se fuafuaga mo le amataina lea o le galuega mo le fausiaina o le maota fono fou a le atunu’u i se taimi a o le i mae’a le tausaga lenei 2016.

 

Na taua e Toeaina lona fa’anoanoa i taeao uma e aga’i mai ai i le galuega, i foliga mataga o vaega o ofisa o ali’i ma tama’ita’i faipule, atoa ai ma vaega o ofisa o lo o fa’aaoga e tagata faigaluega a le fono faitulafono.

 

Sa ia talosagaina le fofoga fetalai o le maota o sui ia Savali Talavou Ale, mo se avanoa e fa’aleleia ai vaega o ofisa o faipule o lo o maitauina le pulepule solo ma palapala, ona o lo o tele ina aga’i mai i ai tagata o le atunu’u aemaise ai turisi tafafao mai fafo, e asiasi ma vaavaai i le maota fono o le atunu’u.

 

Na fa’afetaia e Savali le saunoaga a Toeaina, peita’i sa ai taua e fa’apea, e le o toe umi se taimi ae le toe vaaia loa foliga o le maota fono tuai a le atunu’u o lo o i ai, ona o lea ua tapena ta’ita’i o le fono mo le amataina o le galuega o le maota fono fou i se taimi e le o toe mamao.

 

“Mo le silafia e le afioga i le sui mamalu ia Toeaina faapea ai le mamalu o le maota, o se taimi o le masina fou o Oketopa lea ua fa’amoemoe ta’ita’i o le fono e amata ai le galuega mo le fausiaina lea o le maota fono fou a le atunu’u, i le vaega tupe lea na maua mai i le Pone a le malo, ma, atonu o le avanoa lelei lea e foia ai loa ma fa’afitauli e pei ona atugalu i ai a outou afioga i fa’aletonu o lo o tula’i mai i vaega o le maota fono o le atunu’u”, o le saunoaga lea a Savali.

 

E le gata i fa’aletonu i ni isi o vaega o le maota fono, ae o o lava fo’i i luga o le fa’aalo i totonu o le vaega o lo o usuia ai fonotaga a faipule ma senatoa, faapea ai ma isi vaega uma o le ofisa atoa, o le tele o vaega o le fa’aalo e tutulu fa’asoloatoa pe a oo ina tetele timuga.

 

Na taua e se tasi o afioga i Senatoa i le Samoa News e fa’apea, talu ai o lea ua ofo mai le Ofisa e Pulea Malaeva’alele a le Feterale (FAA) latou te fa’atupeina le galuega, mo le suia lea o le nofoaga e tu’u i ai tane suau’u o lo o i le malaeva’alele fa’avaomalo a Pago Pago, ua fuafua ai loa le afioga i le ali’i kovana ia Lolo Matalasi Moliga, o le tupe e tusa ma le $6 miliona mai le Pone a le malo, lea sa fuafua e fa’atupe ai le galuega mo le aveesea o tane suau’u, o le a tu’uina mai e fa’atupe ai le galuega mo le maota fono fou a le atunu’u.

 

AGA’I LUMA GALUEGA FA’ATINO AUALA MA ATINA’E MALO

 

E ui i le tau fa’asoasoa o tupe maua a le malo e fa’atinoina ai le tele o atina’e aemaise ai o auala i vaega eseese o le atunu’u, peita’i o lo o maitauina pea le aga’i malie i luma o le fa’atinoina o galuega i totonu o afioaga ma itumalo, e pei ona taua e ni isi o afioga i Senatoa ma Faipule o le Fono Faitulafono.

 

Na taua e le afioga i le ali’i senatoa ia Uti Petelo i le vaiaso na te’a nei e fa’apea, e ui i le tele o fa’asea a ni isi o itumalo ma afioaga i le tuai lea ona tali atu o le malo i le fa’aleleia o atina’e ma auala i nu’u i tua, peita’i o ripoti ua taulimaina e le Fono, o lo o atagia mai ai le aga’i lemu atu pea lea o le malo e fa’atino lana matafaioi.

 

Na fa’afetaia e le afioga a Uti le Pulesili o le Ofisa o le Pulega o le Eletise ma le Suavai a Amerika Samoa (ASPA) ia Utu Abe Malae, ona o le tulaga e fa’atatau i le sewer-line mo le afioaga i Aua, lea ua amata ona toe fa’agasolo galuega mo lona fa’amae’aina.

 

“Ua tatou silafia lagona o tagata e fa’amalie gata, ae fa’afetai o lo o maitauina lava le aga’i pea i luma o galuega fa’atino a le malo”, o le saunoaga lea a Uti.

 

I luma o le maota o sui i le taeao ananafi, na fa’afetaia ai fo’i e le aifoga i le tama’ita’i faipule ia Vui Florence Saulo tulaga o galuega fa’atino i totonu o lona itumalo, lea ua tele tausaga o lo o taumafai mai pea le malo e fa’atino, e ui i le tau fa’asoasoa ma le utiuti o le itu tau tupe.

 

O le galuega e pei ona taua e Vui, o le fa’asima ina lea o se vaega o le auala e aga’i atu i totonu o le pitonu’u o Fagaima, o se tasi lea o vaega o le itumalo o Tualauta. Na taua e le tama’ita’i faipule e fa’apea, e ui o lo o tele pea lava talosaga ua mae’a ona tu’uina atu e le itumalo, ae ua molimauina le aga’i pea i luma o galuega fesoasoani a le malo mo lona itumalo.

Comment Here