Ads by Google Ads by Google

Tala otooto mai le Fono Faitulafono

ausage@samoanews.com

FESILIGIA FA’ATAMALA O LEOLEO FA’AMALOSIA O TULAFONO

 

O le tele o tulafono o lo o tusia i totonu o le tusi tulafono o lo o fa’atamala le malo e fa’amalosia i le taimi nei, na mafua ai ona fa’atula’i e le afioga i le ali’i faipule ia Toeaina Faufano Autele i luma o le maota o sui i le vaiaso na te’a nei, ma ia fa’atula’i se fesili taua i luma o le maota, i le mafua’aga e fau ai tulafono ae le o mafai ona fa’amalosia.

 

I le avea ai o le afioga i le ali’i faipule ma ta’ita’ifono o le Komiti o Mataupu Tau Fa’amasinoga a le maota o sui, sa ia folasia ai le tele o taimi na te molimauina ai le le usitaia e tagata lautele o le tulafono, ae i le taimi lava fo’i lea e tasi, e le o fa’amaoni le vaega fa’amalosi tulafono i le fa’amalosia o tulafono a le malo.

 

“E tele naua ta’avale o lo o vaaia le paka solo i luga o le ala savali, ae o vaega ia o lo o manino le tulafono, e fa’asa ona paka ai ni ta’avale, ae ou te maitauina pea le tele o taimi poo mea faitele a le malo e pei o tuuga fautasi ma aso fiafia, e vaaia ai le paka solo o ta’avale i luga o le ala savali, ona avea lea ma itu e poloka ai le auala, ma e ono a’afia ai ola o tagata lautele, ao lea e paka ai le ta’avale e aunoa ma le faia i ai o se galuega a Leoleo o le malo”, o le sauomaga lea a Toeaina.

 

Sa ia fa’atula’i fo’i se fa’ata’ita’iga i le va’a mai le afioaga i Faleniu lea o lo o paka i luma tonu o le vaega e la’u ai uta i le va’a o le Lady Naomi mo Samoa, po o le Fotu o Samoa mo Manu’a.

 

Saunoa Toeaina e fa’apea, o le isi lea fa’ata’ita’iga sili o le soli e tagata o le tulafono, ona e le gata o lo o paka le va’a lea i luga o le vaega savali o le alatele, ae ua fai fo’i ma fa’alavelave i tagata fegasoloa’i.

 

I le fa’aiuga o lana folasaga, ua ia fautuaina ai le Komiti o mataupu tau puipuiga o le saogalemu lautele ina ia silasila toto’a i tulaga e pei ona ia folasia.

 

PASIA E FAIPULE LE TULAFONO O LE FA’ALAPISI

 

E 12-0 le palota na pasia ai e le maota o sui i le aso Faraile na te’a nei le tulafono sa talosagaina e le faigamalo a Lolo ma Lemanu, e fa’aopoopo ai Ofisa o le malo latou te fa’amalosia le tulafono o le fa’alapisi i totonu o Amerika Samoa.

 

O Ofisa o le a fesoasoani i le Ofisa o Leoleo i le fa’amalosia o le tulafono e aofia ai le Ofisa e Puipuia le Siosiomaga (AS-EPA), Pulega o le Eletise ma le Suavai (ASPA), Matagaluega o le Soifua Maloloina, Ofisa o Alamanuia o le Sami ma le Vaomatua, Matagaluega o Paka ma Malaetaalo, fa’apea ai ma le Ofisa o Leoleo.

 

E le i taliaina e le maota o sui le talosaga a le sui o le Ofisa o Mataupu Tau Samoa, i se avanoa e aofia ai ma Pulenu’u i le fa’amalosia o le tulafono lenei, aua o Pulenu’u lava lea o lo o pau i ai le mamafa o le galuega i tua i nu’u ma afioaga eseese o le atunu’u, peita’i na fa’amanino e le Loia Sili a le malo ia Talauega Eleasalo Ale e fa’apea, o lo o manino lava le tiute tauave a Pulenu’u i totonu o le tualfono, o le latou fa’afeso’ota’iina lea o le Ofisa o le Loia Sili pe afai e i ai se tagata i totonu o le nu’u ua ia le usitaia le tulafono e ala i le fa’alapisi i totonu o le nu’u.

 

O le agaga atoa o le malo e pei ona latou talosagaina ai lenei tulafono, ia mafai ai ona taofia le fa’alapisi o tagata o le atunu’u, ae galulue fa’atasi uma ai tagata i le fa’amatagofieina o le atunu’u.

 

SAUNI FAIPULE FESILIGIA LE OFISA O LE LOIA MO TAGATA LAUTELE

 

O le itula e 11:00 o le aso Lulu nei lea ua fa’atulaga e faia ai se iloiloga a le Komiti o Mataupu Tau Fa’amasinoga a le maota o sui, ma le Loia Fautua mo tagata lautele, mo le fesiligiaina o ni isi o mataupu o lo o fia malamalama i ai le komiti ma afioga i faipule.

 

Na taua e le afioga i le ali’i faipule ia Toeaina Faufano Autele o le ta’ita’ifono o le komiti i le vaiaso na te’a nei e fa’apea, o le isi lenei Ofisa taua o le malo e tatau ona fesiligia e le maota, mo le fa’amaninoina o a latou galuega fa’atino mo le atunu’u, ina ia silafia e le maota galuega o lo o fa’atinoina e lenei ofisa.

 

Saunoa atili le afioga i le ali’i faipule e fa’apea, o le isi tulaga e tatau ona silafia e le maota mo le ofisa lenei, e le lava le paketi o lo o fa’atino ai ana galuega, ae sili atu ona taua la latou galuega o lo o fa’atinoina nei, o le puipuia lea o aia tatau o tagatanu’u e a’afia i soligatulafono.

 

E ui e leai ni fesili a le Komiti Soofaatasi o le paketi a le Fono Faitulafono i le paketi a le ofisa o le Loia Fautua i le taimi na iloiloina ai le paketi a le Ofisa, peita’i na manino i saunoaga fa’aalia e le ta’ita’ifono o le komiti le taua o le sao a lenei ofisa mo tagata lautele o le atunu’u.

 

FA’AFITAULI I LE OFISA O PALOTA

 

O le fa’aletonu o fesootaiga fa’aonaponei a le Ofisa o Palota a le atunu’u, ua faigata ai ona feso’ota’i mai tagata palota i atunu’u i fafo mo le fa’amanino o mataupu tau palota, o se tasi lea o mataupu na fa’aleo e le afioga i le ali’i faipule ia Faimealelei Anthony Fu’e Allen i luma o le maota o sui i le vaiaso na te’a nei.

 

Na taua e le ali’i faipule e fa’apea, ua i ai tagata palota o lona itumalo ua feso’ota’i atu ma faailoa atu ia fa’aletonu.

 

Ae o le itu e pito sili ona popole i ai lona taofi, ua avea le leaga o auala o feso’ota’iga a le Ofisa o Palota ma itu ua manatu ai le aufaigaluega a le Ofisa o Palota e fa’aaoga a latou imeli e tu’u atu i tagata e faia ai feso’otaiga, a o fa’atalitali ai le taimi e fa’aleleia ai le website a le Ofisa.

 

Afai ae toe maua se avanoa e toe aami ai le Komesina o Palota, ua fautuaina e le afioga a Faimealelei le komiti e talanoaina mataupu o le palota a le maota, ina ia fautuaina le Komesina o Palota ina ia vave foia le fa’afitauli o lo o alia’e mai i le Ofisa o Palota i le taimi nei.