Ads by Google Ads by Google

Tala otooto mai le Fono Faitulafono


[ata: SN]
ausage@samoanews.com

FA’ATAUNUU ILOILOGA FAIPULE MA LE PULE O LE ASTCA

 

O le itula e 8:00 i le taeao nei lea ua fa’atulaga e fa’ataunu’u aloaia ai le iloiloga a le Komiti o Fesootaiga a le Maota o Sui, ma le Pulesili o le Ofisa o Fesootaiga a Amerika Samoa (ASTCA), susuga Puleleiite Li’matua Tufele Jr.

 

I le lata ai i le 3 masina talu ona taoto le talosaga mo le fa’ataunu’uina o lenei iloiloga, o le taeao nei lea ua fa’atulaga e fa’ataunu’u aloaia ai loa.

 

O le iloiloga lenei na mafua ona fa’atula’i mai, ona o se talosaga a le afioga i le ali’i Faipoule ia Sataua Dr. Mataese Samuelu, mo se avanoa e aami ai le susuga a Puleleiite e fa’amanino i luma o le maota mafua’aga o suiga e tele ua faia i totonu o le Ofisa, talu ona tofia o ia e le Kovana e avea ma Pulesili i ni nai masina e le i mamao atu.

 

Na talosagaina e le afioga a Sataua lenei iloiloga i le masina o Iulai o le tausaga nei, a o avea pea Puleleiite ma sui faipule o le itumalo o Sua. Na iu ina fa’amavae Puleleiite mai le nofoa a le itumalo i le masina na tea nei, a o lea ua fa’atoa fa’ataunuu le iloiloga.

 

Na faailoa e Sataua i le masina o Iulai na te’a nei e fa’apea, e toatele tagata o le itumalo ua latou fesiligia suiga ua faia i totonu o le Ofisa, ma le mafua’aga autu ua ala ai ona faia fa’afuase’i nei suiga.

 

O ni isi o nei suiga e pei ona silafia e le atunu’u, na i’u ina fa’amalolo ai ni isi o tagata faigaluega mai a latou galuega sa galulue ai mo le tele o tausaga.

 

O sina nunumi laititi i le folafolaina o le iloiloga i le taimi o folafolaga a le maota o sui ananafi, na mafua ai ona fesiligia e afioga i faipule le tatau lea ona fa’ataunuu le iloiloga pe leai.

 

Na tula’i Sataua i le taimi o folafolaga a le maota o sui ananafi, na fa’amanatu le iloiloga a le Komiti mo le taeao nei. Saunoa le afioga i le ali’i faipule e fa’apea, e ui e le o ia o se totino o le Komiti o Fesootaiga a le maota o sui, ae ua fa’atonuina o ia e le sui taitai komiti e le o auai i le tauaofiaga a le maota, e tula’i e fa’amanatu le iloiloga.

 

Na tula’i le afioga a Vaetasi Tuumolimoli Saena Moliga ma ia ia saunoa e fa’apea, talu ai e le o se totino o le Komiti o Fesootaiga le afioga i le ali’i faipule ia Sataua, e le tatau ai ona ia fa’afoeina le iloiloga, ae tatau ona taoto atu i se totino o le Komiti na te fa’afoeina le iloiloga i le taeao nei, lea fo’i na fa’aluaina e le afioga a Lavea Fatulegaee P. Mauga.

 

Saunoa Lavea e faapea, talu ai e le o manino lelei le mafu’aaga ua ala ai ona valaauina le iloiloga, e talitonu ai lona sui e tatau ona toe tolopo le iloiloga ma le Pulesili a le ASTCA.

 

Sa ia saunoa atili e fa’apea, e foliga mai o le iloiloga lenei sa fa’atulaga ae o le taimi lea o lo o malaga ai i fafo, ma e le tatau ona fa’ataunu’uina se’i vagana ua manino lelei le mafua’aga o le iloiloga.

 

Na faauilavea le Fofoga Fetalai ia Savali Talavou Ale ma ia fautuaina le tatau lea ona fa’ataunuu le iloiloga, ona o fai si umi o tolopo mai lenei mataupu taua.

 

FA’ASEA KITARA VAIAU SOLI E FAIPISINISI O LE MAOTA FONO

 

Na fa’aalia e le afioga i le ali’i faipule mai Saole ia Kitara Vaiau lona le lagolagoina o le tualga lea sa tula’i mai i ni nai vaiaso ua mavae atu, o le soli atu lea e sui o le aufai pisinisi o le maota fono a le atunuu, a o alo afioga i Faipule i le sailiina o le tofa ma sui o le Komiti o Tupe a le Kovana, e fa’atatau i le taua o pili tupe ua manatu le malo e saili ai ni ana tupe fa’aopoopo.

 

Saunoa le ali’i faipule e faapea, sa tatau i le aufai pisinisi ona soalaupule ma le Komiti o le Tupe a le Kovana i mataupu e finagalo i ai i latou, ae a oo mai loa i galuega a le Fono, e le tatau ona toe o mai i latou e fa’alavelave mai ao faagasolo galuega a le Fono. E oo lava fo’i i ni isi tagata tua, sa ia taua le le tatau lea e se isi ona toe soona soli atu le maota fono.

 

Sa ia taua e fa’apea, o le fono a le malo tele o Amerika, le Konekeresi, e 3 ona laasaga eseese e faafoe ai. O le vaega e talanoaina ai mea fa’alilolilo, ma le isi vaega e talanoaina ai isi mataupu e sili atu ona le tatau ona silafia, ma le vaega mulimuli e talanoaina ai mataupu e matua le tatau lava ona iloa p faalogologo ai se tasi. I lona taofi, e tatau fo’i ona fa’apena le Fono a le atunu’u.

 

Na fa’amanino e le afioga i le Fofoga Fetalai ia Savali Talavou Ale i le sui mamalu mai Saole e fa’apea, o le fono a le atunu’u, e i ai le aia o tagatanu’u latou te silafia ma fa’afofoga i lona taualumaga.