Tala otooto mai le Fono Faitulafono


[ata: foa'i]
ausage@samoanews.com

PASIA SENATE PILI SUIA AI LE LESITALAINA O TA’AVALE

 

Ua pasia e le Senate le pili na talosagaina e le faigamalo a Lolo ma Lemanu, mo se tulafono e suia ai le lesitalaina o ta’avale, ina ia faia ai se totogi fa’aletausaga e fa’avae i luga o le mamafa o le ta’avale.

 

O le aso Lulu na pasia ai e le Senate la latou tulafono, ma ua taoto atu nei i le maota o sui mo sa latou fa’aiuga. O le taeao o le aso Tofi na taunu’u ai i le maota o sui le tulafono ua pasia a le Senate, ma ua taoto atu nei i le Komiti o le Puipuiga o le Saogalemu Lautele ma Ta’avale afi a le maota o sui, mo le fa’atulagaina o se iloiloga.

 

Na taua e le faigamalo i le fa’atomuga o lenei tulafono tau fa’aofi e fa’apea, talu ai le taugata o le fa’aleleia o auala a le malo, o le maualuga o le tau o le soifuaga, aemaise ai o le taugata o le fa’agaioiina o le malo, ua alaga tatau ai ona fa’aee totogi mo le lesitalaina fa’aletausaga o ta’avale.

 

E $32 le totogi mo le lesitalaina o ta’avale e pei ona i ai, a o lea ua fa’aopoopo i ai e le malo le $12 mo le tone e tasi o le mamafa o le ta’avale.

 

O le 50% o tupe totogi mo le mamafa o ta’avale e aoina i lalo o le teugatupe, o le a tuuina i le tupe mo le tausia lelei o auala e fa’aaoga mo le fa’aleleia o auala.

 

O le vaiaso fou lea ua fa’atulaga e faia ai le iloiloga a le maota o sui, mo le talanoaina o le pili a le Senate ua pasia, e sii ai totogi mo le lesitalaina o ta’avale. O le afioga i le Komesina o Leoleo ia Le’i Sonny Thompson ma le Pule o le Ofisa o Taavaleafi a le malo i Tafuna (OMV) ua fa’amoemoe e molimau i lenei iloiloga.

 

FESILIGIA FAIPULE FA’AFITAULI O LOO ALIA’E MAI I LE MALAE VA’ALELE

 

I le to’atele ai o le mamalu o le atunu’u ua fa’aalia o latou finagalo fa’asea i le tuai o le fa’agasoloina o galuega e siaki ai pepa malaga a pasese pe a taunu’u mai, atoa ai ma le to’atele o Ofisa eseese a le malo o lo o vaaia i le malae va’alele i soo se taimi e taunu’u mai ai va’alele, na tula’i ai le afioga i le ali’i faipule mai Manu’a ia Vesi Talalelei Faufano Jr i le vaiaso nei, ma fa’aleo fo’i lana fa’asea e uiga lava i lenei mataupu.

 

Na taua e Vesi lona lagolagoina o taumafaiga a le malo e taofi le ulufale fa’asolitulafono mai o fualaau fa’asaina i le atunu’u, ae i lana molimau i le tulaga o lo o fa’agasolo ai galuega a Ofisa eseese a le malo o lo o galulue i le malae va’alele, e tatau lava ona i ai se isi auala e fa’aleleia atili ai lea tautua.

 

Mo se fa’ata’ita’iga e pei ona saunoa Vesi, e le gata e fa’aaoga masini e su’e ai, ae toe su’e fo’i e tagata faigaluega ato, ae ese ai fo’i le galuega a ta’ifau (K-9) e fai.

 

E le gata i le tulaga lea, ae oo lava fo’i i le taimi e taunu’u mai ai pasese i totonu o le malae va’alele, e fiu tagata e tutu i laina, ae foliga mai e pule lava tagata faigaluega o lo o i ai i le fa’agasoloina o a latou galuega, ae fiu ai tagata malaga e tutu i laina ma fa’atali le taimi e o ai i o latou aiga.

 

Na talosaga e Vesi se avanoa e valaau ai se iloiloga mo lenei mataupu, ina ia mafai ai ona maua le avanoa o faipule latou te fesiligia ai le tulaga tonu ua mafua ai le fa’aletonu i le malae va’alele.

 

Na taua e le Fofoga Fetalai, afioga Savali Talavou Ale e fa’apea, sa i ai lona manatu ua fiafia afioga i Faipule i le tulaga lea ua fa’atinoina ai e le malo galuega mo le sailia o uta i le malae va’alele, ona o le taumafai lava e puipuia le toe ulufale mai o fualaau fa’asaina.

 

“Sa ou fa’apea lava ua lagolagoina e le maota le tulaga manuia ua o o i ai galuega a le malo, talu ona amata mai galuega mo le puipuia o fualaau fa’asaina mai le ulufale mai i le atunu’u. O mataupu uma nei sa atugalu i ai ta’ita’i o le atunu’u aemaise ai le Fono Faitulafono, ae foliga mai e le o le tulaga tonu lea o lo o i ai le finagalo o lau afioga i le sui mamalu,” o le saunoaga lea a Savali ia Vesi.

 

Sa ia taua atili e fa’apea, e le afaina le mataupu pe afai o lo o aga’i le fa’asea i le tuai ona fa’agasolo o le siakiina o pepa malaga a pasese pe a taunu’u mai i le malae va’alele. O se tulaga e tatau ona fesiligia ai Ofisa o lo o galulue i lea tautua, ae afai o le fa’asea e autu i le tele o feuiaiga i le su’eina o uta, e foliga mai la ua toe fesiligia e le maota mataupu sa mamafa i ai fautuaga ina ia fa’aleleia ina ia malu puipuia le atunu’u mai le a’afia i fualaau fa’asaina.

 

E le o se taimi muamua lenei ua fa’aleo ai e afioga i Faipule ma Senatoa lenei mataupu. I le vaiaso na te’a nei na fesiligia ai fo’i e le aifoga i le ali’i faipule ia Gafatasi Afalava le mataupu lava lenei e tasi, i le taimi na fesiligia ai e le Fono le paketi a le Ofisa o Tupe a le malo.

 

Na taua e Gafatasi e fa’apea, sa i ai lona manatu a fa’aaoga loa masini ma ta’ifau (K-9), lona uiga e le toe mana’omia le fa’aaoga o tagata faigaluega e su’eina ato ma uta, ae o le tulaga o lo o tula’i mai i le malae va’alele, e ese le taimi e fa’aaoga ai ta’ifau, sosoo ai loa ma le fa’aaogaina o le masini, ae mulimuli ai galulue tagata faigaluega e su’e uta a pasese.

 

Na taua e Gafatasi lona manatu sa i ai, o le a avea le fa’aaogaina o masini fou a le malo e su’e ai uta ma auala e fa’aitiitia ai tagata faigaluega, ae foliga mai o lo o atili ai lava ona fa’aopoopo tagata faigaluega, a o lea fo’i sa alu tupe e fa’atau mai ai masini e su’e ai uta.

Comment Here