Ads by Google Ads by Google

Tala otooto mai le Fono Faitulafono

ausage@samoanews.com

TALOSAGAINA FA’ATONUSILI O AOGA FAI FA’ALELEI FAIAOGA MAI SAMOA

 

Ua talosagaina e le afioga i le ali’i Faipule mai le itumalo o Saole ia Kitara Vaiau le Fa’atonusili o Aoga a le malo, susuga i le tama’ita’i foma’i ia Dr. Ruth Matagi-Tofiga, ina ia fai fa’alelei pea faiaoga mai Samoa o lo o tautua i le faigamalo a Amerika Samoa i le taimi nei, e ala i le Matagaluega o Aoga.

 

Na taua e Kitara i le Fa’atonusili o Aoga a le malo i le vaiaso na te’a nei e fa’apea, o ripoti ua oo atu ia te ia, e matua lelei lava faiaoga mai Samoa i mataupu o lo o latou aoaoina e aofia ai le Numera ma le Fa’asaienisi.

 

O se tasi o itu sa fautuaina e Kitaea ia Matagi-Tofiga e silasila toto’a i ai, o le fa’amautuina lea o pepa nofomau mo nai faiaoga, ina ia faigofie ai tulaga o le latou galuega i Amerika Samoa.

 

“Ou te iloa e le o oe na aumaia faiaoga nei i Amerika Samoa. Pau lau vaega e fai, o le alofa ma fai fa’alelei i latou. Afai e te silafia e i ai faiaoga mai Samoa e lelei ma fa’amaoni i le fa’atinoina o a latou galuega, fai fa’alelei tulaga o a latou totogi ma mea uma latou te mana’omia. Ae o i latou e le fa’amaoni i le fa’atinoina o le galuega, aua le toe fa’afouina a latou konekarate,” o le fautuaga lea a Kitaea.

 

FA’ASEA SENATOA I LE TELE O TIPI I VAEGA ESEESE O LE AUALA

 

O le tele o vaega eseese o le auala a le malo ua molimauina le tipi tipi solo, na mafua ai ona fesiligia e le afioga i le ali’i senatoa ia Faiivae Iuli Godinet le Faatonusili o le Ofisa o Galuega Lautele a le malo ia Faleosina Voigt, poo ai tonu e gafa ma le toe fa’aleleia o vaega o le auala ua fa’aleagaina.

 

Saunoa Voigt e fa’apea, o le Pulega o le Eletise ma le Suavai (ASPA) e gafa ma le toe fa’aleleia o vaega o le alatele o lo o tipi tipi solo, ona o galuega mo le ta’iina o a latou uaea eletise.

 

Na taua e Faiivae le tulaga fa’aletonu o lo o i ai, i le uma ona tipi ona ta’atitia ai lava lea o vaega o le auala e le toe fa’aleleia.

 

Na fa’amanino e Voigt i lana molimau i le taimi o le paketi a lona Ofisa, o lona ofisa o lona ofisa na fa’atagaina le ASPA e tipi le auala, ina ua talosaga atu mo a latou uaea e fia toso.

 

Ona o lea tulaga, na taua ai loa e le afioga i le ali’i senatoa ia Tuiagamoa Tavai e fa’apea, afai o le Ofisa o Galuega a le malo na tuuina atu le fa’anataga i le ASPA, o lo o ia tei latou fo’i la le malosi e toe fa’atonu ai le ASPA ina ia fa’atutumu vaega o le auala ua fa’aletonu ia latou galuega.

 

Na taua e Fonoti T. Aufata lona fa’anoanoaga, i le tele o vaega o le auala e fa’aleagaina pe afai e malolosi timuga.

 

ALOAIA LE AVEA GAISOA MA TOTINO KOMITI LITAEA A LE MALO

 

Ua aloaia nei le avea o le susuga a Frank Gaisoa ma totino o le Komiti o le Litaea a le malo, i le mae’a ai lea ona pasia e maota e lua lona suafa i le vaiaso na te’a nei e ala i le palota fulisia. E 12-0 le palota na mua’i pasia ai e le maota o sui le suafa o Gaisoa i le amataga o le vaiaso, sosoo ai ma le maota maualuga i le palota e 13-0 i le aso Faraile na te’a nei.

 

O le fa’aiuga a le Senate e pasia ai le suafa o Gaisoa e galue i le Komiti Fa’afoe o le Litaea, na faia lea ina ua mae’a se iloiloga na fa’atautaia e le Komiti o le Litaea a le maota maualuga. O le tele o Senatoa na maua avanoa e tulei saunoa ai, sa na o fautuaga sa latou tu’uina atu i le molimau e tusa ai o lu’itau o lo o fetaia’i ma le Ofisa o le Litaea a le malo.

 

Na fa’ailoa e Nuanuaolefeagaiga S. Nua ia Gaisoa se tasi o lu’itau o lo o tula’i mai i le Litaea i le taimi nei, le tatau lea ona silasila toto’a ina ia fa’aopoopo saofaga a tagata litaea, ona ua maualuga fo’i le tau o le soifuaga ua i ai.

 

Na taua atili e Nua le tulafono lea na taua e le Litaea sa auina atu i le Fono e fa’atulaga ai siitaga o saofaga a tagata fai lafoga, peita’i e o o mai lava i le taimi nei e le i taulimaina lava e le Fono se tulafono.

 

Na fa’ailoa e le afioga i le ali’i senatoa ia Magalei Logovi’i i le komiti, o Gaisoa le sui o le aufai pisinisi i totonu o le Komiti Fa’afoe. O ia e sui tulaga ia Beaver Ho Ching ua fa’amavae mai lona tofiga i le tausaga nei, ona o tofiga fou a le Ekalesia ua valaauina ai o ia i Apia i le fa’aiuga o le tausaga nei.

 

E tai foliga tutusa lava fo’i fautauga na tuuina atu e afioga i Senatoa ia Gaisoa, ma fautuaga na tuuina atu e afioga i Faipule i le latou iloiloga sa faia i le aso Lua o le vaiaso na te’a nei. E le gata sa fautuaina Gaisoa ina ia silasila toto’a i auala e puipuia ai le teugatupe a le atunu’u, a ia i ai fo’i se avanoa e fa’amanino ai i le atunu’u tulaga lelei e alaga tatau ai ona inivesi i totonu lava o Amerika Samoa tupe a le litaea.

 

E LE O I AI SE TULAGA FA’ALETONU I FAIAOGA MO MANU’A

 

E ui i se fa’asea mai le afioga i le ali’i senatoa ia Nuanuaolefeagaiga S. Nua, i le le lava lea o faiaoga o lo o aoaoina fanau i le aoga maualuga i Manu’a, peita’i na fa’amanino e le Fa’atonusili o Aoga i le Samoa News, le le fa’amaonia o lea ripoti, ona o lo o lava ma totoe faiaoga mo Manu’a i le taimi nei.

 

Na taua e Dr. Ruth Matagi-Tofiga i se fa’atalatalanoaga ma le Samoa News i le vaiaso na te’a nei, i le tuana’i ai lea o le iloiloga ma le komiti o Aoga a le maota o sui, le tumau pea o lana molimau sa tuuina atu i afioga i Faipule i le tulaga o faiaoga i aoga uma a le malo i le taimi nei.

 

“E le o i ai se tulaga fa’aletonu i faiaoga mo le aoga maualuga a Manu’a i le taimi nei. O lo o lava faiaoga o lo o aoaoina fanau aoga e to’a 48 o lo o i ai,” o le saunoaga lea a Matagi-Tofiga.

 

Ina ua fesiligia e afioga i Faipule ia le tama’ita’i Fa’atonusili i le vaiaso na te’a nei i le tulaga o faiaoga o lo o i ai, sa ia taua ai le leai o se fa’aletonu i tulaga o faiaoga, ae o lo o lava ma totoe faiaoga o lo o fa’atinoina le galuega.