Tala otooto mai le Fono Faitulafono


Sui o le kamupani a le G.H.C Reid i totonu o le maota o sui i le taeao ananafi. [ata AF]
ausage@samoanews.com

PASIA SENATOA PILI SUI AI LE FUA O LAFOGA A LE MALO

 

Na fulisia finagalo o le maota maualuga e ala i le palota e 14-0 i le vaiaso nei, e pasia ai le tulafono na fa’aulu e le faigamalo a Lolo ma Lemanu, mo le pili e sui ai le fua o lafoga a le malo, ina ia tutusa ma le fua o lafoga a le ofisa o Lafoga a le malo tele (IRS).

 

O le faaiuga a le Senate e pasia ai lenei pili tupe, na faia lea ina ua mae’a se iloiloga na fesiligia ai molimau a le malo, i le taua o lenei tulafono mo le malo ma le atunu’u. Ae na taua e le Teutupe a le malo ia Ueligitone Tonumaipe’a, fa’apea ai ma le Sui o le Ofisa o Lafoga a le malo sa molimau i lenei pili e fa’apea, afai ae pasia lenei tulafono, o le a maua e tagata faila lafoga ni isi o fa’amanuiaga i tulaga o a latou tupe maua i lafoga toe fa’afo’i.

 

Afai ae pasia e le Fono Faitulafono ma sainia e le kovana lenei tulafono, o le tausaga e 2018 ua fa’amoemoe e fa’aaoga ai loa e Amerika Samoa le fua o lafoga a le IRS i le tausaga e 2004.

 

O loo taua i le pili a le malo le fuafuaga, ina ia sui lava i tausaga uma le fua o lafoga, ina ia mafai ai ona oo atu i le tausaga e 2022, ae fa’aaoga ai loa fo’i ma le fua o le lafoga a le malo tele 2022.

 

Ua mae’a le iloiloga a le Komiti o le Sailiga o le Tamaoaiga a le maota o sui e fa’atatau i lenei tulafono, peita’i ua faia la latou faaiuga e toe taoto le pili i le Komiti, ae se i fa’aauau isi a latou suesuega e fa’atatau lava i lenei tulafono.

 

Na fautuaina e le tamaitai faipule ia Vui Florence Saulo le tatau lea ona amata aloaia loa i le tausaga lenei 2017 le fa’aaogaina o le fua o lafoga a le malo tele 2004, pe afai ae pasia lenei tulafono.

 

Ae o le fautuaga mai le afioga i le ali’i faipule ia Fagaoatua D. Salavea, e le tatau ona sui i tausaga uma le fua o lafoga e pei ona taua i le pili, ae tatau ona fuafua lava i le lelei o tupe maua a le malo, ona fa’atoa fai lea o le isi suiga.

 

TOE TOLOPO ILOILOGA A FAIPULE MO LE LAFOGA O OLOA E 7%

 

Ua toe tolopo mo le vaiaso fou le iloiloiga sa fuafua e fa’ataunu’uina i le maota o sui i le taeao ananafi, e talanoaina ai le pili a le malo mo le lafoga o oloa e 7%, ina ua fa’ailoa e sui o le Komiti a le malo sa gafa ma le fuafuaina o nei lafoga, le i ai o ni suiga e fia faia i le tulafono ua mae’a ona tuuina mai i luma o le Fono.

 

O le afioga i le ali’i faipule ia Vailiuama S. Leasiolagi, le ta’ita’i o le Komiti o le Paketi a le maota o sui sa ta’ita’ia le iloiloga.

 

Na fa’ailoa e le Loia Sili ia Talauega Eleasalo Ale, o ia fo’i lea o le ta’ita’ifono o le Komiti sa iloiloina pili o lafoga i luma o le maota o sui, le mae’a lea ona tauaao atu e le latou Komiti o a latou suiga i le loia a le malo mo le iloiloina.

 

Ae ina ua talosagaina e le afioga i le ali’i faipule ia Vailoata E. Amituana’i le tatau lea ona tofu afioga i Faipule ma se kopi o suiga a le Komiti o Tupe a le malo, ina ia faigofie ai ona latou malamalama i suiga, na manatu ai loa Talauega e saunoa e fa’amanino atili le mafua’aga o a latou suiga.

 

Saunoa Talauega e fa’apea, talu ai suiga i le gagana o le tulafono e tatau ona faia, e tatau ai ona toe fa’aulu e le faigamalo se pili fou e sui tulaga i le pili ua i luma o le Fono, ae talu ai le puupuu o le taimi ua i ai, ua manatu ai le Komiti o le Tupe a le malo e ui i le auala puupuu, e pei o le fa’aauala mai lea o a latou suiga i le loia a le fono, ma mafai ai loa ona fa’aoo i luma o le komiti a le maota.

 

Na taua e le loia sili le i ai o se sasi i le latou pito laau i le fa’aupuina o le tulafono, ma ua vave fo’i ona fa’aoo mai i le fono, ae lei mae’a lelei i ai sailiga i vaega e tatau ona aveese, atoa ai ma vaega e tatau ona toe faaopoopo i le tulafono.

 

Na toe talosagaina e ni isi o afioga i faipule sui o le Komiti o le Tupe a le malo, ina ia silasila toto’a i ni isi o ripoti ua mae’a ona talosagaina e le maota, e pei o ripoti i tulaga o tupe maua i le tausaga atoa lenei mai lafoga lotoifale, faatusatusa i le tausaga ua mavae, ina ia mafai ai ona silafia e le komiti tulaga tonu o lo o i ai tupe maua fa’alotoifale a le malo.

 

PASIA SENATE PILI SUI AI FA’ASALAGA MO FUALAAU FA’ASAINA

 

Na pasia e le maota maualuga i le vaiaso nei e ala i le palota fulisia e 14-0, la latou pili e sui ai le fa’aupuga o le fa’asalaga mo soo se tasi e fa’amaonia lona umia faasolitulafono o fualaau fa’asaina, e aofia ai ma le taumafai e tufatufa atu, poo le gaosia fo’i i totonu o le atunu’u.

 

O le fa’asalaga e pei ona i ai mo soo se tasi e fa’amaonia lona umia fa’asolitulafono o fualaau fa’asaina, o lo o i ai le fa’aupuga lea, “e mafai ona fa’asala mo le umi e oo atu i le 5 tausaga, ae le silia i le 10 tausaga”, peita’i o le suiga e pei ona pasia i le tulafono a le Senate, ua atagia mai ai le fa’asalaga, “e tatau ona fa’asala mo le umi e le itiiti ifo i le 5 tausaga, ae le silia i le 10 tausaga.

 

O le fa’aiuga a le maota maualuga, na faia lea ina ua maea sa latou iloiloga sa faia i le masina na te’a nei, lea na fesiligia ai molimau a le malo e fa’atatau i le taua o lenei tulafono. O molimau a le malo sa molimau i lenei tulafono i luma o le Senate e aofia ai le Loia Sili ia Talauega Eleasalo Ale, ma le sui komesina o Leoleo ia Vaimaga Maiava.

 

E pei ona taua e le taitai o le Komiti o le Puipuiga o le Saogalemu Lautele a le maota maualuga, le afioga i le ali’i senatoa ia Faamausili Mau Jr e fa’apea, o le agaga atoa o lenei tulafono, ina ia mafai ai ona siitia fa’asalaga mo i latou e tagofia fualaau fa’asaina, ona o le isi lea fa’afitauli ua molimauina le to’atele o tupulaga talavou i le atunu’u ua a’afia ai.

Comment Here