Tala otooto mai le Fono Faitulafono


[ata: foa'i]
ausage@samoanews.com

FESILIGIA TUPE A LE MALO MAI ISI LAFOGA UA MAE’A ONA PASIA

 

A o vavao ai le fono faitulafono e tau fuafua ma fa’atulaga aso e fa’ataunu’u ai iloiloga fa’atatau i pili tupe a le faigamalo, ua talosagaina e le afioga i le ali’i faipule ia Timusa Tini Lam Yuen le tatau lea ona fesiligia se ripoti a le malo e fa’atatau i tupe na maua mai i isi lafoga ia e le i leva atu ona pasia e le Fono Faitulafono ma sainia e le ali’i kovana.

 

O ia lafoga e aofia ai le lafoga mo potu o fale talimalo, fa’apea ai le lafoga o le pia ma le sikaleti.

 

Saunoa Timusa e fa’apea, e tatau ona malamalama lelei le Fono i le aofa’i o le tupe na mafai e le malo ona ao mai i lafoga nei, ae poo fa’amaoni fo’i le malo i le aoina mai i totonu o tupe mai lafoga nei.

 

Sa ia saunoa atili e fa’apea, e le o faigofie le mataupu e fa’atatau i le mau pili tupe a le faigamalo lea ua i luma o le Fono, e tatau fo’i ona silafia e afioga i Faipule tulaga pagatia o lo o i ai le atunu’u i le taimi nei.

 

FA’AMAVAE BEAVER T. HO CHING MAI LE KOMITI FA’AFOE LITAEA

 

Ua fa’aalia e le afioga i le ali’i kovana ia Lolo M. Moliga i sana tusi i Ta’ita’i o le Fono Faitulafono, lona talia aloaia o le fa’amavaega a le susuga ia Beaver T. Ho Ching mai le avea ma totino o le Komiti Fa’afoe o le Litaea a le malo, ona o ni isi o tofiga fou a le Ekalesia ua filifilia ai o ia i Samoa.

 

O le aso 31 Oketopa lea ua fa’atulaga e fa’amuta aloaia ai le tautua a Ho Ching mai le Komiti Fa’afoe o le Litaea a le malo.

 

I le taliaina ai e le ali’i kovana o le fa’amavaega a Ho Ching, ua ia tofia ai loa le susuga ia Frank Gaisoa e sui tulaga ia te ia.

 

O le susuga a Gaisoa e pei ona taua e Lolo i lana tusi, o se tasi o ali’i faipisinisi lauiloa i le atunu’u, ma ua iloa lana auaunaga e ala i lana kamupani o le Tautua Mo Oe, lea o lo o tufatufaina atu oloa sii atoa mo pisinisi laiti i le atunu’u.

 

O le aso 1 Novema lea ua fa’amoemoe e amata aloaia ai le tautua a Gaisoa i le komiti o le Litaea mo le umi e 5 tausaga.

 

Na faaiu le tusi a Lolo i lona fa’ailoa lea i ta’ita’i o le Fono, le sauni o Gaisoa mo le taimi o lana iloiloga e fa’amaonia ai o ia i luma o le Fono Faitulafono.

 

FAAMAONIA SENATE SUI FOU KOMITI TAMAOAIGA O LE MALO

 

Ua pasia e le maota maualuga i le taeao ananafi sui fou e to’atolu na tofia e le afioga i le ali’i kovana ia Lolo M. Moliga, e avea ma totino o le Komiti o le Tamaoaiga o le malo, e sui tulaga i sui tuai e to’atolu ua tofia i latou e galulue i isi tofiga a le malo.

 

O sui e to’atolu e aofia ai Faleosina Voigt e 16-0 lana palota, ma Dr. Oreta Crichton e 15-1 lana palota, o i laua ia o lo o umia tofi Fa’atonusili i le kapeneta a le kovana, le matagaluega o Galuega Lautele fa’apea ai ma le Ofisa e Pulea Oloa a le malo, ma Uili Leauanae e 13-3 lana palota, o ia lea o le sui fa’atonusili o le Matagaluega o Fefa’atauaiga ma Alamanuia a le malo.

 

O le fa’aiuga a le senate e pasia ai suafa o i latou nei, na faia lea ina ua mae’a se iloiloga sa fa’atautaia e le Komiti o le Sailiga o le Tamaoaiga a le malo, lea na ta’ita’ia e le afioga i le ali’i senatoa ia Tilo Vasaga.

 

O sui tuia o le Komiti o le Tamaoaiga a le malo ua tofia i isi galuega e aofia ai le afioga i le matua ia Utu Abe Malae, o ia lea o le Taitaifono o le Komiti o le Faletupe Fa’ateritori a Amerika Samoa (TBAS), o le susuga ia Keniseli Lafaele, o le Fa’atonusili lea o le Matagaluega o Fefa’atauaiga ma Alamanuia a le malo, ma le susuga a Steven Watson, o le loia fautua mo le ali’i kovana.

 

O isi sui tuai o le Komiti Fa’afoe o le Tamaoaiga a le malo e aofia ai le Teutupe a le malo ia Uelinitone Tonumaipe’a, o ia fo’i lea o le ta’ita’ifono, afioga Taimalelagi Dr. Claire Poumele, o le Fa’atonusili o le Pulega o Taulaga ma Malaeva’alele, susuga Talauega Eleasalo Ale, o le Loia Sili a le malo, ma le tofa Iulogologo J. Pereira, o le fesoasoani fa’apitoa lea i le kovana.

 

O le vaiaso fou lea ua toe fa’atulaga i ai le iloiloga a le maota o sui, e fa’amaonia ai suafa o i latou e pei ona tofia a le kovana e avea ma sui fou o le Komiti o le Tamaoaiga a le malo.

Comment Here