Ads by Google Ads by Google

Tala otooto mai le Fono Faitulafono


Afioga i Faipule i le taimi o le iloiloga ma molimau a le malo e fa’atatau i pili tupe a le malo lea ua i luma o le Fono Faitulafono, e fa’aee ai lafoga i oloa ma pia. [ata AF]
ausage@samoanews.com

TOE FESILIGIA MATAUPU FA’ASAGA FAIAOGA MAI LE AOGA LEONE

 

Ua toe fesiligia e le Senatoa mai le itumalo o Alataua, afioga Paepae Iosefo Faiai le tulaga ua o o i ai le mataupu e fa’atatau i le ali’i faiaoga mai le aoga maualuga a Leone, lea o lo o tu’uaia i le faia o uiga mataga i se tamaititi aoga.

 

O le mafua’aga na toe fesiligia ai e Paepae lenei mataupu, ona o lo o fia malamalama pea le atunu’u i le tulaga ua oo i ai le suesueina o lenei mataupu, ae pe ua i ai fo’i se ripoti lata mai i le Ofisa o Aoga e fa’atatau i se gaioiga ua faia.

 

E le i tu’uina atu e le ta’ita’ifono o le Komiti o Aoga a le Senate, afioga Galea’i Alex Iuli se tali e tusa ai o le fesili a le afioga i le ali’i senatoa.

 

Ae pei ona silafia e le atunu’u, o se tasi lenei o mataupu o lo o tu’u fesili ai le to’atele o matua ma le atunu’u, poo fea ua fai i ai le suesueina o le mataupu fa’asaga i le ali’i faiaoga o lo o tu’uaia

 

O le mataupu lenei na muamua lava ripotia e le Samoa News i le masina o Me, ina ua alia’e mai se fa’afitauli i taumafaiga a Leoleo e saili ni fa’amaoniga e lagolagoina ai tu’uaiga fa’asaga i le ali’i faiaoga o lo o tu’uaia, o ia fo’i o le alo o se ali’i Faifeau.

 

Na taua e se sui sinia mai le Ofisa o Leoleo i le Samoa News, tulaga faigata o a latou suesuega e uiga i lenei mataupu, ona e le o mana’o le ali’i foma’i sa ia faia le suega i le tamaititi na a’afia e fa’amatu’u atu lana ripoti e fesoasoani ai i su’esu’ega a Leoleo.

 

O fa’amatalaga ua maua e le Samoa News, o le alia’e ai o ripoti e uiga i lenei mataupu i le vaitaimi a o lumana’i fa’auuga a Aoga Maualuluga i le tausaga nei, o le taimi fo’i lea na fa’afuase’i ai loa ona tuua e le ali’i faiaoga o lo o masalomia le atunu’u ae malaga atu i Amerika. E oo mai lava i le taimi nei, o lo i i ai pea lava le ali’i faiaoga i Amerika.

 

O le iloiloga lea na valaauina e le Komiti o Aoga a le Senate i le masina na te’a nei e uiga i lenei mataupu, na fa’amaoni ai e le sui fa’atonusili o aoga sa molimau, susuga Philo Jennings i luma o le senate, le leai o sona silafia e fa’atatau i le tulaga ua i ai le mataupu e uiga i le ali’i faiaoga o lo o masalomia, na te le o iloa fo’i poo i ai se suesuega a Leoleo e uiga i lenei mataupu.

 

FESILIGIA PEA MATAUPU I TOTOGI O UTA MO MANU’A

 

O lo o fesiligia pea e le mamalu o le itumalo o le Manu’atele tulaga o totogi ua fa’ae’e e le malo mo uta ma pasese i Manu’a. I luma o le maota o sui i le vaiaso nei, na fesiligia ai e le afioga i le ali’i faipule mai le itumalo o Manu’a #1 le mafua’aga ua faatulaga ai fa’apea e le Pulega o Taulaga ma Malaevaalele totogi o uta mo Manu’a.

 

Na taua e Vesi Talalelei Fautanu Jr e fa’apea, e le talafeagai le totogi e $8 i le uta lea ua fa’aee mo uta i Manu’a, ona, e tusa lava poo le a le lapo’a poo le laititi o le afifi e ave, e tasi lava lona tau.

 

Mo se fa’ata’ita’iga e pei ona saunoa Vesi, e tutusa lelei lava le tau o le ato ma le pailate pe a ave i Manu’a, e ta’i $8. Sa ia taua atili e fa’apea, afai o le tulaga lea ua i ai totogi fou a le malo mo le itumalo, e tatau la ona fuafua le fa’atulagaina o totogi i le lapopo’a o uta, ina ia talafeagai mo tagata uma e malaga.

 

E le i auai le afioga Vesi i le iloiloga sa faia a le maota o sui i le masina na te’a nei, ma le Fa’atonusili o le Ofisa o Uafu ma Taulaga e uiga i lenei mataupu.

 

Ae i le iloiloga lea, na taua ai e le afioga a Taimalelagi Dr. Claire Poumele le taugofie atu o totogi mo uta i Manu’a lea ua fa’atulaga e le malo i le taimi nei, nai lo totogi sa i ai mo le va’a tuai a le MV Sili.

 

Sa ia taua atili fo’i e fa’apea, tusa lava pe faaee e le malo totogi mo uta ma pasese mo Manu’a, e le taitai gafatia e tupe o lo o maua mai i totogi nei ona fa’apaleni le tupe o lo o fa’aalu i le malaga e tasi a le va’a.

 

FA’ASEA PEA LE ATUNU’U I LE TAUTUA OFISA O TA’AVALE AFI A LE MALO

 

O lo o tele pea fa’asea mai ni isi o le mamalu o le atunu’u ua faaoo atu i luma o le Fono Faitulafono, i le tulaga o lo o i ai le auaunaga a le Ofisa o Ta’avale Afi a le malo i Tafuna, lea o lo o i lalo o le ta’ita’iga a le Matagaluega o Leoleo.

 

O ni isi o ia fa’asea e aofia ai le aveese o tint mai tioata o ta’avale a ni isi o le atunu’u, tuai ona maua o laisene ave ta’avale, atoa ai ma le fesiligia pea o le mataupu e uiga i le alii palagi o lo o nofo i le faleie i tafatafa o le auala i Nu’uuli.

 

Na taua e afioga i Faipule sa latou faaleoina nei mataupu e fa’apea, e le o fiafia le atunu’u i le tulaga o lo o fa’amalosia ai e le Ofisa o Ta’avale afi a le malo tulafono mo le pasiaina o ta’avale, ona o lo o fa’amalosia le aveese o tint mo ta’avale a se vaega toaitiiti, ae o le to’atele o tagata o lo o molimauina pea le feoa’i ma ta’avale e pogisa uma tioata.

 

O ni isi o tagata o lo o fa’asea i le leai o ni laisene ave ta’avale, lea ua fai ma fa’afitauli mo ni isi i le mana’omia lea o a latou laisene e fai ma pepa fa’amaonia mo i latou i taimi e fa’amaonia ai ni talosaga i ofisa a le malo.

 

Ua i ai le fa’amoemoe o le a fuafua se iloiloga a le maota o sui ma le Komesina o Leoleo ia Le’i Sonny Thompson, pe afai ae toe taliu mai lana malaga i le atunu’u i se taimi o i luma.