Ads by Google Ads by Google

Tala otooto mai le Fono Faitulafono


[ata: foa'i]
ausage@samoanews.com

PASIA SENATE PILI MO FAIGA PALOTA MA TAUSIA LELEI O FALE AOGA

 

O le vaiaso nei na pasia ai e le maota maualuga a le Senate e ala i le palota fulisia a latou pili e 2 sa fa’aulufaleina; o le pili e faamanino ai le faauigaina o nofoaga e faasa ai faiga faatosina i taimi o palota; ma le pili e molia ai i le tulafono se tasi e maua i totonu o lotoa o aoga i le va o le itula e 10 i le po ma le aga’i atu i le 5 i le vaveao.

 

I le pili e fa’amanino ai nofoaga e faia ai palota, ua faamanino atili mai ai le tatau lea ona 200 iata poo le 600 futu le mamao o le fale faipalota, ma nofoaga e i ai faleie a komiti mo sui tauva.

 

O le agaga o le teuteuga o le tulafono e pei ona taua i le pili taufaaofi, ina ia mautiona tulaga lelei ma le saogalemu i le fa’afoeina o faiga palota a le atunu’u.

 

Na fa’amanino e le Komesina o Palota a le malo ia Uiagalelei Dr. Lealofi i le taimi na molimau ai i luma o le Senate e uiga i le tulafono lenei, o le suiga e pei ona toe teuteu ai le vaega o le tulafono e le i manino, ua talafeagai lelei ma le agaga o le faigamalo, o le puipuia lea o le nofoaga e faia ai le palota mai le a’afia i ni isi gaioiga fa’atosina mai komiti a sui tauva ta’itasi.

 

O le a aloaia vave lava lenei tulafono i le taimi e pasia ai e le Fono ma sainia e le ali’i kovana.

 

Mo le tulafono e puipuia ai Fale aoga a le malo mai le osofaia e tagata amio le taupulea, ua fa’avaeina ai le maga fou o le tulafono 46.4027 e faitauina fa’apea; “E solitulafono le tagata e maua o soli fua lotoa o aoga a le malo poo aoga tua foi, e aunoa ma se faatanaga, i lotoa o aoga a le malo poo aoga tua foi i le va o le 10 i le po ma le 5 i le vaveao; o se tagata e maua o soli fua lotoa a aoga a le malo poo aoga tua, e molia i le solitulafono o le tua fua i fanua o le malo, o se solitulafono A lea i le fa’atulagaina o solitulafono mama”.

 

Na taua e le sui fa’atonusili o aoga a le malo ia Philo Jennings, faapea ai ma le loia sili ia Talauega Elasalo Ale, o i laua ia sa molimau mo le malo i le iloiloga sa faia mo lenei tulafono, e taua tele le agaga o le tulafono, ina ia mafai ai ona puipuia faleaoga mai le osofa’i ma faaleagaina e tagata amio le taupulea.

 

Na taua e ni isi o senatoa le tatau lea ona fausia e le malo ni pa e si’omia ai lotoa o aoga uma a le malo, ina ia taofia ai le toe osofaia e tagata. Ae na taua e molimau a le malo, e i ai auala o loo faigata ai le fausia o pa mo faleaoga uma a le malo, ona o ni isi o nofoaga o loo i ai aoga a le malo, o fanua o aiga o lo o ofo mai.

 

E le gata i lea, o le fausia o le pa e si’omia ai le faleaoga, e ono pupuni ai ma auala o lo o fa’aaoga e aiga o lo o nonofo i tua atu o faleaoga e foa’i mai ai.

 

PILI FA’AEE AI TOTOGI MO LE LESITALAINA O TA’AVALE

 

Ua i luma o le Fono Faitulafono se tulafono taufa’aofi mai le faigamalo a Lolo ma Lemanu, mo se pili e fa’atulaga ai suiga i le tulafono mo le lesitalaina o ta’avale, ina ia mafai ai ona i ai se vaega tupe e totogi i tausaga taitasi mo le fa’afouina o ta’avale, fuafua lea i luga o le mamafa o le ta’avale.

 

I sana tusi sa tu’uina atu i Ta’ita’i o le Fono Faitulafono, na taua ai e le kovana ia Lolo Matalasi Moliga e fa’apea, o le totogi mo le lesitalaina o ta’avale e fa’aaoga ai le mamafa o le ta’avale, o lo o faia i setete e 13 i le Iunaite Setete, ma o se vaega tupe o le a mafai ai ona fesoasoani i le fa’aleleia o auala ua fa’aleagaina, e mafua mai i le tele o ta’avale mamafa o lo o feoa’i ma soli luga o auala.

 

Sa ia taua fo’i e fa’apea, o ta’avale mamafa e televave ai tele ona faaleagaina auala, ae taugata fo’i le totogi mo galuega e toe fa’aleleia ai vaega o auala e fa’aleagaina, ae o le aoga o le vaega tupe lea ua fa’aee i lalo o le suiga fou o le tulafono, o le a mafai ai ona fesoasoani i le fa’atinoina o lenei auaunaga taua.

 

E $32 le tau e fa’afou ai le ta’avale, ma le totogi fo’i lea ua fa’aee e $12 i le tone e tasi o le mamafa o le ta’avale, o le a fa’aopoopo.

 

O le 50% o le tupe atoa lea e maua mai i le totogi mo le mamafa o le ta’avale, o le a aoina ma tuu i teugatupe mo le tausia lelei o auala i le atunu’u.

 

O le masina o Iuni e pei ona taua e le Komesina o Leoleo ia Le’i Sonny Thompson, sa ia taofia ai le toe totogiina e le aufai ta’avale o le tupe mo le mamafa o le ta’avale i le taimi e fa’afou ai laisene o ta’avale, ina ua maua ane e le o i ai se tulafono e aiaia ai lea faiga, ae ua tele tausaga o ao e le malo o Amerika Samoa tupe mai tagatanu’u i lenei auala.

 

Ona o lea tulaga, na taua ai e Le’i le mae’a lea ona latou galulue ma le Ofisa o le Loia Sili, mo le tapenaina o le tulafono e tu’uina atu i le Fono Faitulafono e aloaia ai le fa’atulafonoina o le totogi e le aufai ta’avale o lea vaega tupe.