Tala otooto mai le Fono Faitulafono


Taimi o faiga palota a le atunu’u i le tausaga na te’a nei. [ata AF]
ausage@samoanews.com

FA’AMANINO MATAUPU FA’ATATAU TULAFONO TAU PALOTA

 

O se tasi o mataupu na fa’amanino i le iloiloga a le Komiti o Palota a le Senate, ma le Komesina o le Ofisa o Palotaga a le atunu’u i le vaiaso na te’a nei, ina ua iloiloina le mataupu e fa’atatau i le toe fa’amaninoina lea o faleie e faia ai gaioiga fa’atosina o le palota, ma le fale o lo o faia ai le palota, o le mataupu i tagata o lo o masalomia le palota fa’alua, aemaise ai le mataupu i tagatanu’u o loo aumau i fafo ae fa’atoa o mai lava i le atunu’u i le taimi e palota ai.

 

Saunoa le afioga i le Senatoa ia Fa’amausili Mau Jr, o ia fo’i lea sa taitaia le iloiloga e fa’apea, i lalo o le tulafono tau palota, e tatau ona 2 tausaga e nofo ai le tagata i le atunu’u ona fa’atoa agava’a lea ona palota, peita’i o le tulaga lea o lo o maitauina i le tele o palotaga ua mavae atu, fa’atoa o mai lava tagatanu’u o lo o aumau i fafo i le taimi e palota ai.

 

Na fa’amanino e le Komesina o Palota a le atunu’u, le tofa Uiagalelei Dr. Lealofi Uiagalelei e fa’apea, o le tulaga o lo o i ai le tulafono mo tagatanu’u o lo o aumau i fafo, e tatau ona 2 tausaga e nofomau ai i le atunu’u ona fa’atoa mafai lea ona lesitala e palota, ae a mae’a loa ona fa’amalieina vaega ia o le tulafono ma mae’a fo’i ona lesitala tagatanu’u, ona mafai lava lea ona nofo i fafo, fa’atoa sau lava i le taimi e palota ai, ae a sosoo loa palotaga e 2 e le o palota lea tagata, e tatau la ona toe lesitala lona igoa ma toe uia tulaga masani o le tulafono.

 

I le mataupu o tagatanu’u o lo o palota fa’alua, o le isi lea mataupu na taua e Uiagalelei o lo o mataalia i ai lona Ofisa, ma latou galulue fa’atasi ai fo’i ma le Ofisa o Palota a Samoa, ina ia mautinoa e le o tupu lena tulaga.

 

“O le mea moni lava, e le o i ai ni tagatanu’u o palota fa’alua i le taimi nei, afai lava o tagata ua palota i Samoa, e le tatau ona toe palota i Amerika Samoa nei, o lo o matou galulue soosoo tauau pea ma le Ofisa o Palota a Samoa e ala i le fetufaa’i o fa’amaumauga ina ia mautinoa ai, e le o tupu lena tulaga”, o le saunoaga lea a Uiagalelei.

 

O le tulafono lea ua i luma o le maota maualuga e fa’amanino ai le mamao e tatau ona i ai le faleie mo faiga fa’atosina o le palota, ma le fale e faia ai le palota, na taua ai e Uiagalelei le talafeagai o le suiga ua i ai, e pei ona i ai le 200 iata le mamao o nofoaga ia e lua, ina ia mautinoa ai le tulaga saogalemu o taimi o palotaga a le atunu’u.

 

Saunoa le afioga i le ali’i Senatoa ia Magalei Logovi’i, o ia lea e to’atolu i ai senatoa na latou fa’auluina lenei tulafono e fa’apea, o le agaga atoa na mafua ai ona fa’aulu suiga o le tulafono, ina ia matua manino lelei le mamao e gata ai gaioiga a komiti a sui tauva, ma le fale o lo o faia ai le palota.

 

ALOAIA E LE FONO LE TAUTUA A LT. KEVIN PATRICK WHALEN

 

O se i’ugafono mai le maota o sui ua pasia e le Fono Faitulafono, o lo o aloaia ai le tautua a le Ta’ita’i o le Ofisa o le Puipuiga o le Gataifale a Amerika i le teritori (US Coast Guard), le susuga ia Lt. Kevin Patrick Whalen, a o i ai o ia i Amerika Samoa.

 

E pei ona taua i le iugafono sa fa’aulufaleina e le afioga i le ali’i Faipule mai Swains ia Su’a Alexander Eli Jennings e faapea, e tele naua fa’alavelave na alia’e mai i le gataifale o Amerika Samoa sa mafai ona tali atu i ai le ali’i Lutena, ona o le naunau ina ia faasaoina ai le saogalemu o tagatanu’u o Amerika Samoa.

 

O se tasi o fa’alavelave o lo o taua i le iugafono na molimauina ai le tautua a le ali’i Lutena, o le fa’alavelave lea na afaina ai se va’a fagota i tai o le sami, ae sa vave ona tali atu i ai le ali’i Lutena ma ni isi o sui o le US Coast Guard, ma fa’aitiitia ai le ono tula’i mai o se fa’alavelave e ono a’afia ai le soifua o tagatanu’u o le atunu’u.

 

A o le i toe tu’uva’a ese atu le ali’i Lutena mo Amerika, na maua le avanoa e tauaao atu ai lenei iugafono i se sauniga faapitoa, lea sa molimauina e sui o le fono, fa’apea ai le Faatonusili o le Pulega o Uafu ma Malaeva’alele ia Taimalelagi Dr. Claire Poumele ma ni isi o lana aufaigaluega.

 

TEENA NI ISI FAIPULE FUAFUAGA FAUSIA O POTU SUI LE TUMAU

 

Na taua e ni isi o afioga i Faipule o le maota o sui i le Samoa News, lo latou teena o le fuafuaga ina ia fausia ni potu le tumau latou te sui ai, a o fa’atalitali ai le fausiaina o le Fale Fono fou a le atunu’u e le o toe mamao ae amata aloaia loa.

 

O le salalau ai o lenei ripoti mai ni tusitusiga a le Samoa News i le vaiaso na te’a nei, i le silia i le $30,000 lea ua fuafua le malo e fa’aalu e fa’atau mai ai mea faigaluega e fa’atino ai lenei galuega, ae le o aofia ai le totogi o le konekarate latou te fa’atinoina le galuega, na fesiligia ai loa e ni isi o tagata palota a latou faipule e uiga i lenei mataupu, ma mafua ai loa ona finagalo faipule e fa’aleo o latou lagona e uiga i lenei mataupu.

 

Na taua e se tasi o Faipule e le i finagalo e fa’ailoa lona suafa e fa’apea, e leai se mea e fausia ai fua nei potu sui le tumau mo i latou, e le o mana’omia e Faipule ni potu sui, o lo o i ai lava le aiga o le tagata e sui mai ai ona laei.

 

“O lea o loo tulaga faaletonu tupe maua a le malo, to’atele tagata o loo fa’atali siaki o lafoga, tele manaoga i aoga ma auala e fia fa’aleleia, aisea la e toe mana’omia ai e le malo le fa’aalu o lenei tupe tele mai tupe o lafoga a le atunu’u e fausia ai nei potu, ae a uma ona fausia le fale fono fou ona toe tatala lea i lalo”, o le saunoaga lea a se tasi o faipoule.

 

Ae na taua e se tasi faipule e fa’apea, sa tatau ona tu’uina atu muamua le mataupu e lalafo i ai le maota, ona fa’atoa fai ai loa lea o le fa’aiuga pe tatau ona fausia lenei galuega pe leai fo’i.

 

O le tusi lea na tu’uina atu e le Fa’atonusili o le Matagaluega o Fefa’atauaiga ma Alamanuia a le malo, susuga a Keniseli Lafaele i le Fofoga Fetalai o le maota o sui, tofa Savali Talavou Ale, o lo o atagia mai ai sa talosagaina e le Fono le fausiaina o lenei galuega.

Comment Here