Ads by Google Ads by Google

Tala otooto mai le Fono Faitulafono

ausage@samoanews.com

FINAU PEA SATAUA E FA’ATAUNU’U ILOILOGA MA LE ASTCA

 

E ui e le i fa’ataunu’uina le iloiloga a le Komiti o Fesootaiga a le maota o sui, ma le Pulega o Fesootaiga a Amerika Samoa (ASTCA) i le aso Lua na te’a nei e pei ona tu’upoina ai, ua fa’alua ona tula’i le afioga i le ali’i faipule ia Sataua Dr. Mataese Samuelu ma finau i luma o le maota, mo se avanoa e fa’ataunu’uina ai lea iloiloga taua, ona o lo o tele mataupu o lo o fiamalamalama i ai sui o lona itumalo fa’apea ai le atunu’u atoa e tatau ona fa’amanino.

 

Ina ua le fa’ataunu’uina le iloiloga sa fuafua mo le aso Lua o le vaiaso nei, na tula’i ai loa le afioga a Sataua ma talosaga i le Fofoga Fetalai mo se avanoa e toe fa’atulaga ai se isi iloiloga o lenei mataupu.

 

Saunoa le sui faipule mai le itumalo o Ituau ia Sataua, o ia fo’i lea na fa’aleoina le mataupu na mafua ai ona fa’atulaga le iloiloga ma fa’aleo lona finagalo fa’anoanoa i le aso Lua, ina ua fiu e fa’atali le molimau i le taimi e taunu’u atu ai mo le amataina o le iloiloga, ae mulimuli toe fa’ailoa atu ina ua ta le itula e 7:30 i le taeao lava lea, ua le mafai ona oo atu le molimau ona o ni isi o mafua’aga le ma’alofia.

 

O le itu na fa’amamafa e Sataua i lana folasaga, o le faigata lea ona iloa poo ai e mafua ai le fa’aletonu ua mafua ai ona le fa’ataunu’uina le iloiloga, ae vaiaso atoa na logo ai le molimau mo le iloiloga.

 

Ae na fa’amanino e le Fofoga Fetalai ia Savali Talavou Ale le itu taua, ona o lea sa toe fa’ailoa mai e le molimau lona le avanoa, ona o ni isi o mafua’aga le ma’alofia, nai lo le fiu o le maota e fa’atali ae le oo atu, ona sili ai loa lea ona le manuia le tulaga lea.

 

I le taeao ananafi, na toe tula’i ai fo’i le afioga ia Sataua ma ia toe talosagaina le Fofoga Fetalai mo se avanoa e fa’ataunu’uina ai le iloiloga ma le Pulesili a le ASTCA, ona o loo tele pea ni isi o le itumalo ma le atunu’u o loo valaau atu i lona ofisa, i le fiamalamalama lea i mataupu o loo tula’i mai i ni isi o tagata faigaluega a le Kamupani o Fesootaiga a le malo, peita’i na taua e Savali le i ai o le fuafuaga e fa’ataunu’uina pea le iloiloga e pei ona fuafuaina, ina ia mafai ai ona fa’amanino mataupu o loo fiamalamalama i ai le atunu’u.

 

O ni isi o mataupu na taua e le afioga a Sataua i le vaiaso na te’a nei o lo o fiamalamalama i ai le atunu’u, o tusi fa’ailo ia ua tufa atu e le Pulega a le ASTCA i ni isi o ana tagata faigaluega, e fautuaina ai le fa’amutaina o la latou auaunaga mai galuega ua tele tausaga o galulue ai, poo se tulaga talafeagai lea faiga ua faia e le Pulesili fou pe leai fo’i.

 

O le mataupu e pei ona fiamalamalama i ai afioga i Faipule, na alia’e mai ai le gugulu o le to’atele o tagata faigaluega ma ni isi o le atunu’u, ona o suiga fou ua faia e le Pulesili fou le tumau a le ASTCA, ae na fa’aalia e le afioga i le ali’i Kovana ia Lolo Matalasi Moliga i se vaega o lana folasaga, i le tatala aloaiaina o le tauaofiaga lona lua lenei a le Fono Faitulafono, le tatau lea i tagata uma ona latou talia suiga fou ua faia e le Pulega fou a le ASTCA, ona o lo o taumafai pea e fai ni isi o suiga e manuia ai le tautua a lea vaega o le malo i le lumana’i.

 

MALOLO LE FONO O LE 3 VAIASO

 

Ua pasia e maota e lua i le vaiaso nei i’ugafono e fa’amalolo ai galuega a le Fono Faitulafono mo le umi e 4 vaiaso. O le taeao nei, Iulai 21 e fa’amae’a ai galuega a le Fono, seia toe tau aofia i le aso Gafua, 21 Aokuso, 2017.

 

O le agaga o le malologa e pei ona taua i le i’ugafono a maota e lua ua pasiaina nei, ina ia mafai ai ona fa’asao ma fa’aaoga tatau aso fono mo galuega taua o lo o mulimuli mai.

 

Na taua e le Fofoga Fetalai a le maota o sui, afioga Savali Talavou Ale i luma o afioga i Faipule i le vaiaso nei e fa’apea, i le tuai ai ona taunu’u atu i luma o le Fono o le paketi a le malo mo le tausaga tupe fou 2018 o lo o lumana’i nei, na faia ai loa se la fa’aiuga ma le afioga i le Peresetene o le Senate, ina ia faia se malologa a le Fono e fa’atalitali ai le taunu’u atu o le paketi a le malo.

 

I lalo o le tulafono e pei ona saunoa le Fofoga Fetalai, o le masina o Iulai e tatau ona taunu’u atu ai le paketi a le malo i luma o le Fono.

 

E ese mai i le paketi, o pili tupe a le faigamalo e sailia ai le tamaoaiga mo le malo lea ua taunu’u atu i le Fono, o le isi lea autu o le malologa, ina ia lava ai le taimi e faia ai sailiiliga a komiti, a o lumana’i ai le faia o iloiloga mo le fesiligiaina o molimau.

 

TULAFONO FAAMANINO NOFOAGA E FA’ASA ASO O LE PALOTA

 

Ua i luma o le maota maualuga se tulafono e fa’aulutalaina, o se tulafono e fa’amanino ai le uiga o le nofoaga lea e fai ai fa’atosina e fa’asa i le aso o le palota. O lenei tulafono sa fa’aulufaleina e afioga i Senatoa ia Magalei Logovi’i, Nuanuaolefeagaiga S. Nua ma Paepae I. Faiai.

 

O le agaga o lenei tulafono, o se taumafaiga lea ina ia puipuia faiga palota a le atunu’u i taimi e fa’atinoina ai, ma ia lelei lona fa’afoeina i soo se taimi e galulue ai le atunu’u mo lana sailiga tofi.

 

I le vaega o le tulafono tau palota o lo o fa’amanino ai le “Ulufale i totonu o le Falepalota”, e le o manino mai ai le va o le nofoaga e i ai tagata o loo galulue i faiga fa’atosina mo sui tauva ma le fale o loo ai ai le palota, ae i le toe teuteuga o le tulafono e pei ona i luma nei o le maota, ua fa’amanino mai ai le ‘200 iata poo le 600 futu’ e va ai le falepalota ma nofoaga e faia ai faiga fa’atosina mo sui tauva.