Ads by Google Ads by Google

Tala otooto mai le Fono Faitulafono

ausage@samoanews.com

TOFIA SUI FOU KOMITI FA’AFOE TAMAOAIGA AMERIKA SAMOA

 

O le vaiaso na te’a nei na taunu’u ai i luma o le Fono Faitulafono se tusitusiga mai le afioga i le ali’i kovana ia Lolo Matalasi Moliga, e fa’amaonia ai lona filifilia o ni sui se to’atolu o lana Kapeneta e avea ma totino fou o le Komiti o le Atina’e ma le Tamaoaiga o Amerika Samoa (ASEDA).

 

O i latou ua filifilia e le tofa i le tootoo ia Lolo Matalasi Moliga e aofia ai le Fa’atonusili o le Ofisa e Pulea Fa’atauga a le malo (Procurement) ia Dr. Oreta Mapu Crichton; Fa’atonusili o le Ofisa o Galuega Lautele a le malo ia Faleosina Voight, ma le Sui Fa’atonusili o le Matagaluega o Atina’e ma Alamanuia (DOC) ia Uili Leauanae.

 

O le mafua’aga o lenei tofiga fou a le ali’i kovana, ona o i latou e to’atolu sa umia tofiga ua avanoa nei, ua avea ma totino o le Komiti o le Faletupe a Amerika Samoa (TBAS).

 

Na taua e Lolo i lana tusi i ta’ita’i o le Fono le tele o le tomai o loo umia e Dr. Oreta i tulaga tau i le tamaoaiga, ona sa avea o ia ma faufautua i le faigamalo a Togiola ma Faoa ua mavae atu.

 

O le tama’ita’i faipule ia Faleosina o lo o i ai lona malamalama i tulaga o atinae ma galuega tetele, ua silia i le 20 tausaga o lana tautua i le Ofisa o Galuega Lautele a le malo i le tulaga o le Inisinia, ma ua tele fo’i tausaga o auai o ia i le talanoaina o auala e fa’aleleia ai le galuega tetele i totonu o le atunu’u.

 

O le susuga ia Leauanae lea ua tele tausaga o avea ma sui Fa’atonusili o le Matagaluega o Fefa’atauaiga ma Alamanuia a le malo, ma ua lava fo’i lona silafia i auala e fa’atupulaia ai le tamaoaiga o le malo i soo se auala.

 

“Ou te talitonu i le agava’a ua ia i latou uma nei, lea o le a fesoasoani ai i le fa’aleleia atili o le tautua a le Komiti o Atina’e ma le Tamaoaiga o Amerika Samoa”, o se vaega lea o le saunaoga a Lolo i lana tusi i ta’ita’i o le Fono.

 

POLOKALAME A LE LBJ FESOASOANI AI AIGA VAIVAI TAMAOAIGA

 

E ui i le tele o fa’asea mai ni isi o le atunu’u i le taugata o pili a le falema’i o le LBJ i Faga’alu, ma ua avea ma auala ua alofia ai e le atunu’u le aga’i atu e saili togafiti i le falema’i, peita’i o le iloiloga sa faia a sui o le pulega a le Falema’i ma afioga i Faipule i le vaiaso na te’a nei, na fa’amanino ai e sui o le LBJ polokalame eseese e agava’a ai tagata lima vaivai o le atunu’u e fa’amama ai pili latou te totogiina atu i le falema’i.

 

O le iloiloga a le Komiti o le Soifua Maloloina a le maota o sui, lea na taitaia e le afioga i le Sui Taita’i Komiti ia Veevalu Meauta Mageo, na mafua mai i fa’asea e fa’atatau i le taugata o pili mo tagata mai fafo, atoa ai ma le tupe e totogi e vaai ai le foma’i, lea ua to’atele le atunu’u ua fa’aalia i ai lagona fa’asea.

 

Na fa’amanino e le sui mai le LBJ i luma o le maota o sui e fa’apea, e 2 auala o lo o fa’atulaga ai pili a le LBj mo le mamalu o tagata gasegase e aga’i atu e fa’aaoga le latou tautua, o le pili mo tagatanu’u o Amerika Samoa ma tagata mai fafo ua nofomau i le teritori, atoa ai ma le pili mo tagata mai fafo e le o nofomau i le teritori.

 

Saunoa stili le sui o le LBJ e fa’apea, e ui i le maualuga o le totogi o pili a le falema’i, ae o lo o i ai a latou polokalame e fesoasoani ai i aiga e vaivai le tamaoaiga, e ala i le fa’atumu o le pepa ina ia mafai ai ona lesitala i le polokalame, ma maua ai le avanoa e fa’aitiitia ai le pili e totogi.

 

Mo le tupe o lo o totogi e vaai ai le foma’i, poo le “facility fee” e pei ona talitonu le to’atele e $10 e totogi i taimi faigaluega ae $20 pe a tuana’i taimi faigaluega, na fa’amaonia e sui o le LBJ i luma o le maota o sui, e tasi lava le tupe e totogi e tagata uma i soo se taimi e aga’i atu ai e vaai le foma’i, e $20.

 

“O le $10 lea e finau mai le to’atele e totogi i taimi faigaluega ae $20 pe a tuana’i taimi faigaluega, o le polokalame lea sa fa’aaoga e le falema’i i le tele o tausaga ua mavae, peita’i e le o toe fa’aaogaina lea polokalame i le taimi nei.