Ads by Google Ads by Google

Tala otooto mai le Fono Faitulafono

ausage@samoanews.com

PASIA FONO I’UGAFONO ALOAIA AI TAUTUA AFIOGA FOMA’I FUATA

 

O le vaiaso nei lea na pasia ai e le Fono Faitulafono se i’ugafono malilie fa’atasi a le maota maualuga, e momoli atu ai fa’amaisega ma le agaga faamafanafana i le faletua ia Manu Sipili I’atala, ona o le motusia o le mafutaga ma le afioga ia Fuata Dr. Tagiilima I’atala, ma momoli atu ai le agaga fa’amalo e tusa ai o lana tautua i le malo, atunu’u ma lona aiga.

 

O Fuata na soifua mai i le masina o Setema 1946, ma amata mai ai loa lona soifua aoaoina i Amerika Samoa nei, seia oo i le taimi na ia maua ai le avanoa sikolasipi e aoga ai i le Kolisi Faifa’atoaga i Avele i Samoa mo tausaga e 2, ma faai’u atu ai lona soifua aoaoina i Kolisi i Amerika.

 

Sa tautua o ia i vaega o le Fuava’a a le malo tele o Amerika, atoa ai ma le tele o tausaga sa tautua ai o ia i galuega eseese, ae i le mae’a ai o tausaga e 24 sa tautua ai o ia i le tele o tautua eseese, na toe fo’i ai loa o ia e fa’aauau ana aoaoga i mataupu fa’a foma’i o loo fiafia tele i ai, ma fa’au’u mai ai i le Iunivesite a Papua Niu Kini ma lona faailoga BA i le fa’a foma’i i vailaau ma galuega i gasegase tipitipi.

 

Sa tautua o ia i le falema’i o le LBJ i Fagaalu, lea e aofia ai tausaga e 24 sa ia vaaia ma pulea ai le potu o gasegase mo fanau, atoa ai ma isi vaega eseese o le falema’i i Fagaalu sa tautua ai o ia, ae i le tausaga e 2011, na talia ai e Fuata le fa’atalauula atu a lona itumalo o Saole ina ia avea o ia ma sui i le maota maualuga o le Senate, mo le fa’aauauina o le tofi sa amataina mai e le afioga i le Matua ia Utu Abe Malae, ma ia galue ai i le tele o komiti eseese a le maota maualuga, e aofia ai ma le komiti o le Atina’e o le Tamaoaiga sa avea ai o ia ma ta’ita’i.

 

E ese mai i lana tautua i totonu o le malo o Amerika Samoa, sa tele fo’i tausaga na galue ai o ia i lona aiga i Amouli, atoa ai ma le Ekalesia i le tofiga o le Tiakono. O le aso 3 Mati 2017 na tuumalo ai le afioga a Fuata ina ua 70 tausaga o lona soifua. O lo o soifua mai pea i le taimi nei lona faletua ia Manu, o ona alo e to’a 9 fa’apea ai ma fanau a lana fanau e to’a 21.

 

GALUEGA TETELE TALIGALU LEONE MA AUALA SAVALI  LEASINA

 

Ua i luma o le maota o sui ni i’ugafono sa fa’aulufaleina i le vaiaso na te’a nei, e talosagaina ai le afioga i le kovana ina ia fa’atonu le Fa’atonusili o Galuega Lautele a le malo, mo se avanoa e fuafua ai le fa’atinoina o ni isi o galuega tetele i itumalo i le Falelima i Sisifo o le atunu’u, e aofia ai se taligalu mo le afioga i Leone, atoa ai ma auala savali faapea ai le fa’aleleia o auala i le itumalo o Leasina.

 

O le agaga atoa o nei iugafono e pei ona taoto atu nei i le Komiti o Galuega Lautele a le malo mo le iloiloina, o le taumafai lea ina ia fa’atinoina i se taimi vave le fa’aleleia o nei galuega mo le soifua manuia o tagata o le atunu’u aemaise ai le atunu’u o loo feafioa’i i ia vaega o le atunu’u.

 

E pei ona silafia, o le afioaga i Leone, o le isi lea vaega o le atunu’u e maualalo lona talafatai, lea fo’i sa sili ona pagatia i le galulolo o le 2009, lea na maliliu ai ni isi o aiga e pele i loto ma agaga, ma ua moomia ai le fausia o se taligalu ina ia mafai ai ona foia le toe tula’i mai o ni aafiaga i soifua o tagata lautele ma le afioaga.

 

Ae mo le itumalo o Leasina, ua tele tausaga o maitauina pea tulaga fa’aletonu i auala, ma ua moomia ai le toe fa’aleleia o auala ina ia mafai ai ona faigofie femalagaaiga a le atunu’u.

 

Ae pei ona manino i le molimau a le Faatonusili o Galuega Lautele a le malo ia Faleosina Voigt i luma o le Fono Faitulafono i le tele o taimi e fesiligia ai o ia, o le fa’afitauli numera tasi o loo mafua ai ona tuai le fa’atinoina o galuega faapenei o le leai lea o se vaega tupe mai le malo e fa’atupe ai, e oo fo’i i tupe fesoasoani mai le feterale o loo auina mai i tausaga taitasi, e le taitai gafatia ia vaega tupe e fa’atupe ai nei mau galuega tetele.

 

O nei iugafono sa fa’aulufaleina e le afioga i le ali’i faipule ia Fagaoatua Dorian T. Salavea mai le itumalo o Fofo, ma le afioga a Gafatasi Afalava mai le itumalo o Leasina.