Tala otooto mai le Fono Faitulafono

Le taimi o le tula’i fa’aaloalo a le maota o sui i le taeao ananafi, e manatua ma aloaia ai le tautua a le tofa Paopaoailua Joe Fiaui ua fai i lagi lana folauga i le vaiaso na te’a nei.  [ata AF]
ausage@samoanews.com

ALOAIA TAUTUA PAOPAO TULA’I FA’AALOALO MAOTA O SUI

 

Na aloaia e le maota o sui i le taeao ananafi le tautua a le tofa a Paopaoailua Joe Fiaui, e ala i se tula’i fa’aaloalo sa faia i le taimi o le sauniga lotu e tatala aloaia ai galuega masani a le maota mo lana tauaofiaga i le itula e 8:30 i le taeao ananafi.

 

E tusa ai ma fa’amatalaga mai ni isi o aiga o le tofa a Paopaoailua, o le vaiaso na te’a nei na fa’amanavaina ai e le Atua ana galuega.

 

I le mae’a ai o le viiga o le Atua sa lagiina e afioga i ali’i ma tama’ita’i faipule, na tula’i ai loa le afioga i le ali’i faipule ia Faimealelei Anthony Fu’e Allen ma talosaga i le afioga i le Fofoga Fetalai o le maota o sui ia Savali Talavou Ale ma ona loimata, mo se avanoa e tula’i fa’aaloalo ai le maota o sui, e fa’ailoa ai lo latou fa’aaloalogia o le tautua sa ofoina mai e le tofa a Paopaoailua mo le atunu’u, aemaise ai fo’i taimi sa avea ai o ia ma Faipule o le afioaga i Aua i le nofoaiga ua mavae atu.

 

Na talia e Savali le talosaga a Faimealelei, ma ia talosagaina ai loa le mamalu o le maota ina ia tutula’i, ao saunoa le susuga i le ali’i Faifeau, o le sui failautusi fo’i lea o le maota o sui mo le tatalo, le tofa i le Matua ia Rev. Tavita Loseti.

 

I le taimi o folafolaga a le maota o sui, na fa’afetaia ai e Savali le afioga a Faimealelei e tusa ai o lona naunau e ave le fa’aaloalo i le afioga a Paopaoailua.

 

“O se tasi lenei o Tama o le atunu’u sa tautua i le maota o sui mo ni isi o nofoaiga ua mavae atu, e tele fo’i ni fa’ata’ita’iga lelei na afua mai ia te ia, ao ia nofoia le nofoa o le itumalo”, o le saunoaga lea a Savali.

 

Na taua e ni isi faipule tuai o le maota o sui le fa’ateia o i latou i lenei tala fa’avauvau e fa’atatau i le usugafono a le tofa a Paopaoailua, ina ua tula’i le afioga a Faimealelei e talosagaina se tula’i fa’aaloalo a le maota mo le usuia.

 

O le aso Faraile na te’a nei i le taimi o le sauniga a le malo e aloaia ai tautua a tagata faigaluega uma i Amerika Samoa, na faia ai fo’i se tula’i fa’aaloalo a ta’ita’i o le malo ma le aofia uma na auai i le malae ta’aalo i Tafuna, ao tolaulauina e le tofa Le’i Sonny Thompson le lisi o i latou ua lagomau mai Tia Sa, lea fo’i na aofia ai ma le suafa o Paopaoailua, mo le aloaiaina o le latou tautua i tausaga e tele sa galulue ai mo le malo ma le atunu’u.

 

MANA’OMIA FA’AIUGA VAVE A I LE PILI PULEA AI LE FA’AOTAOTA

 

Ua talosagaina e le fofoga fetalai o le maota o sui le ta’ita’ifono o le Komiti o le Soifua Maloloina a le maota lea ua taoto atu i ai le iloiloina o le pili e pulea ai le fa’aotaota i le atunu’u, mo le vave fa’atulaga o se iloiloga e fesiligia ai molimau mo le fa’atalanoaina o le tulafono taua lenei, ina ia vave faia i ai se fa’aiuga a le Fono Faitulafono ao lei maea aso fono mo le tauaofiaga o lo o nofoia nei.

 

I le avea ai o le taimi lenei o le tausaga, o se “taimi faigata ma pisi” mo afioga i faipule ona o le tausaga palota, ua talosagaina ai e Savali Talavou Ale le tatau lea ona vave faia se iloiloga fa’asaga i lenei mataupu, ina ia vave fai i ai se fa’aiuga ma pasia ai le isi lenei pili taua ua talosagaina e le faigamalo a Lolo ma Lemanu, ma taofia ai le ono valaauina e le kovana o se fono fa’apitoa, e talanoaina ai pili sa talosagaina e le malo e mae’a le tauaofiaga lenei ae le’i faia i ai se finagalo o le Fono Faitulafono.

 

E le gata i le pili e pei ona taua, ae o lo o i ai fo’i isi pili taua sa talosagaina e le faigamalo ua mae’a ona taoto i luma o le Fono Faitulafono, e tatau fo’i ona vave faia i ai se finagalo o le Fono Faitulafono.

 

E ui o le vaiaso na te’a nei na tauaao ai e ta’ita’i o le fono tusitusiga mai le ofisa o le ali’i kovana e fa’atatau i le fa’aulufaleina o lenei tulafono taua, o le taeao aanafi na fa’atoa tolaulauina ai i luma o maota le tino atoa o lenei tulafono taufa’aofi, lea o lo o talosagaina ai suiga mo le fa’amalosia o le fa’asa lea o le fa’aotaota i le atunu’u, atoa ai ma le tu’uina atu o le malosi i ni isi o Ofisa o le malo latou te fa’amalosia lenei tulafono, atoa aima fa’asalaga e fa’ae’e atu ia i latou e molia ma ta’usala e le fa’amasinoga i le soliina o le tulafono.

 

PASIA FONO TULAFONO FA’AITIITIA LAFOGA MO PISINISI

 

O le vaiaso na te’a nei na pasia ai e le Fono Faitulafono se tasi o tulafono taufa’aofi sa talosagaina e le faigamalo a Lolo ma Lemanu, e faia ai se suiga i le tulafono o lafoga e totogi e pisinisi, ina ia fa’aitiitia le maualuga o le lafoga e totogi e pisinisi i le malo mai le 44% sa i ai i le 34% e pei ona fa’atulaga mai ai nei.

 

E le gata i le fa’aitiitia o lafoga totogi e pisinisi i le malo, ae o lo o aofia ai fo’i i le isi vaega o le tulafono le aveesea o se vaega o loo i le tulafono mo le fa’afouina o laisene pisinisi, ina ia aveese le fa’aupuga lea e taua ai le mafai ona fa’afou le laisene pisinisi, tusa lava pe le totogia vaega o le lafoga o lo o aitalafu ai i le malo, ae tu’u ai le vaega e tatau ai ona faia se feutanaiga a le pisinisi ma le malo i auala e totogi muamua ai le aofa’i o lafoga o lo o nofo aitalafu ai i le malo, ona fa’atoa mafai lea ona fa’afou le laisene pisinisi

 

Na fa’aalia e le teutupe a le malo ia Ueligitone Tonumaipe’a i luma o le fono ina ua fesiligia o ia e maota e lua i uiga i lenei tulafono, o le taua o le suiga i le tulafono, e le gata e tele ai pisinisi fou e ulufale mai i Amerika Samoa, ae o le a fa’atupulaia ai fo’i i luga tupe maua a le malo i le itu tau lafoga o pisinisi.

Comment Here