Ads by Google Ads by Google

Tala otooto mai le Fa’amasinoga

ausage@samoanews.com

JOHNNY VALUESE

 

O le vaiaso fou lea ua fa’amoemoe e toe tula’i ai le ali’i o Johnny Valuese i luma o le fa’amasinoga fa’aitumalo, i le mae’a ai lea ona faila e le malo o le moliaga mamafa o le ave ta’avale ao se’i lona laisene fa’asaga ia te ia.

 

O le moliaga mamafa lea ua tu’uaia ai Valuese, na afua mai i le fa’alavelave lea na tula’i mai i Pago Pago i le 2 vaiaso talu ai, ina ua taofi e leoleo se ta’avale lanu uliuli solo atoa sa vaaia le alu saoasaoa i luga o le alatele, lea na toeititi lava tula’i mai ai se fa’alavelave i luma tonu o le nofoaga o lo o i ai le maota o Tupulaga Talavou i Pago Pago.

 

Na taofi e Leoleo le ta’avale na molimauina ai le ali’i o lo o ia fa’afoeina le ta’avale, o ia lea o Valuese, ae ina ua fesiligia lona laisene ave ta’avale, na fa’ailoa e Valuese i Leoleo, o lona laisene o lo o se’i e le fa’amasinoga, ona o le solitulafono o le ave ta’avale ‘ona sa ta’usala ai o ia i le tausaga na te’a nei.

 

Ina ua tula’i Valuese i luma o le fa’amasinoga fa’aitumalo i le vaiaso na te’a nei, na toe fa’amanatu i ai e le fa’amasinoga tuutuuga sa tu’uina atu ia te ia i le tausaga na te’a nei, i le taimi na ta’usala ai o ia i le moliaga mama o le ave ta’avale ‘ona, e le gata sa se’i lona laisene ave ta’avale mo le 12 masina, ae sa fautuaina fo’i o ia e aua ne’i ona fa’afoeina se ta’avale i le taimi o lo o se’i ai lona laisene, ma, afai ae maua o ia e Leoleo o lo o ia fa’afoeina se ta’avale i le taimi o lo o se’i ai lona laisene, e mafai e le malo ona faila le moliaga mamafa o le ave ta’avale a’o se’i le laisene fa’asaga ia te ia, ma afai ae fa’amaonia e le fa’amasinoga le moliaga, e ono mafai ona fa’asalaina o ia i le toese mo le umi e le itiiti ifo i le 5 tausaga, pe fa’asala i le salatupe e le silia i le $5,000, ae fa’amalosia ai lona tuliina o aso e 90 i le toese i Tafuna.

 

O lo o tumau pea tuutuuga o lo o tatala ai Valuese i tua e fa’atali ai le aso lea ua fa’atulaga e toe valaau ai lana mataupu i le vaiaso fou.

 

FERETI AGAMALU

 

E 30 aso lea ua poloaina e le fa’amasinoga fa’aitumalo e taofia ai le ali’i o Fereti Agamalu i le toese i Tafuna, ina ua ta’usala o ia i le moliaga o le fa’ao’olima i le tulaga tolu, e mafua mai i le fa’alavelave lea na ia fa’aaoga ai se atigi fagupia e sasa ai le ulu o se ali’i sa latou inupia fa’atasi, i le mae’a ai lea o se feeseeseaiga na tula’i mai i lo la va.

 

Na fa’atoese le ali’i o Agamalu i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia, peita’i na fa’ailoa i ai e le afioga i le ali’i fa’amasino ia Elvis Patea e fa’apea, ua faigata ona talitonu le fa’amasinoga ia te ia, ona o lana talosaga fo’i lea sa tu’uina mai i le masina o Mati o le tausaga na te’a nei, ina ua ta’usala o ia e le fa’amasinoga fa’aitumalo i moliaga mama e lua o le fa’ao’olima i le tulaga tolu ma le fa’atupu vevesi i nofoaga faitele, lea na talia ai e le fa’amasinoga lana talosaga, ma fa’anofovaavaaia ai o ia mo le 18 masina, ae fa’amalumalu le tu’uina atu o ia i le toese mo le 30 aso.

 

Ae talu ai ua ia le usitaia poloaiga a le fa’amasinoga, na fa’ailoa ai loa e Patea ia Agamalu le poloaina o ia na te tuliina aso e 30 i le toese i Tafuna, ma fai ma ana fa’asalaga i lenei mataupu.

 

O isi tuutuuga o lana nofovaavaaia e aofia ai le saili o sana galuega e galue tumau ai pe a magalo mai i tua, aua ne’i ona toe solia se tulafono, aua fo’i ne’i ona toe tagofia le ‘ava malosi po o fualaau fa’asaina.