Tala otooto mai le Fa’amasinoga

ausage@samoanews.com

TU’UAIA SE ALI’I FAIA UIGA MATAGA I SE TEINEITITI

 

Ua toe taofia nei i le toese i Tafuna se ali’i e 46 le matua mai Ottoville lea na taofia e Leoleo i le aso Tofi na te’a nei, e fa’atali ai le isi ana iloiloga lea ua fa’atulaga mo le aso Gafua o le vaiaso fou, e iloa tonu ai poo ai moliaga ua fuafua le malo e toe faila fa’asaga ia te ia, e mafua mai i le fa’alavelave lea ua tuuaia ai o ia i lona faia lea o ni uiga mataga i se teineititi e talavou i lalo o le tulafono.

 

Ua le mafai ona fa’alauiloa le igoa o lenei ali’i, ona o le la sootaga ma le teineititi o lo o masalomia na a’afia i lana gaioiga, lea o lo o masalomia o le tama a lona tuafafine. E na o le moliaga mama o le fa’atupu vevesi i nofoaga faitele lea ua tu’uaia ai e le malo le alii’ ua molia, ina ua tula’i o ia i luma o le fa’amasinoga fa’aitumalo i le taeao nei.

 

I fa’amaumauga a le fa’amasinoga o lo o taua ai e fa’apea, o se fafine e tuaoi lona fale ma le fale a le ali’i ua molia na ia logoina Leoleo e tusa ai o lenei fa’alavelave, ina ua ia vaaia le ua molia ma se teineititi laititi i totonu o lana ta’avale o lo o la talatalanoa ai.

 

O gaioiga sa faia e le ua molia ma le teineitiiti i totonu o le ta’avale na mafua ai ona masalosalo le molimau, ma ia fa’afeso’ota’iina ai loa Leoleo mo se fesoasoani, peita’i na taunu’u Leoleo ma iloa ai, ua leai se teineititi i le ta’avale, se’i vagana ai le ua molia.

 

Na fa’ailoa e le ua molia i Leoleo, e leai se mea na tupu i le va o ia ma “lona tei” i le taimi na la talanoa ai i totonu o le ta’avale. E $500 le vaega tupe lea ua fa’atulaga e le faamasinoga e totogi e le ali’i ua molia ona fa’atoa mafai lea ona tatala o ia i tua, e faatali ai lana iloiloga lea ua fa’atulaga e faia i le vaiaso fou.

 

Afai e mafai ona tatala o ia i tua, ua fa’asa ona ia toe taumafai e fa’afesootai le teineititi o loo masalomia na a’afia i lana gaioiga sa faia, ua fa’asa fo’i ona ia taumafai e fa’afesoota’i se tasi o lona aiga, a ia avea o ia ma tagatanu’u e tausisi i tulafono a le malo i soo se taimi, ma ia aua fo’i ne’i ona toe solia se tulafono a le malo.

 

MOLIA SE TINA I LE FA’AOOLIMA

 

Na teena e se tina mai Vaitogi tu’uaiga o le fa’ao’olima i le tulaga tolu fa’asaga ia te ia, ina ua tula’i i luma o le fa’amasinoga fa’aitumalo i le taeao nei. I lona teena ai o le moliaga e tasi ua tu’uaia ai o ia e le malo, ua fa’atulaga ai loa lana ulua’i iloiloga e faia lea i le aso 8 Novema 2016 i le itula e 8:30 i le taeao, ma iloa tonu ai loa le tulaga o le a taoto ai lana mataupu, i le faia lea o se maliliega ma le malo e faamuta ai, pe fa’atulaga loa sana fa’amasinoga autu.

 

O le fa’alavelave e pei ona molia ai lenei Tina na tula’i mai i totonu o se Falesa i Vaitogi, ona ua logo e le tama teine a le Tina na molia tala leaga sa fai atu e se isi tamaititi o le Ekalesia ia te ia, e aofia ai le manao la te feusua’i (tulou), ma mafua ai loa ona ita le Tina ua molia ma ia fa’ao’olima ai loa i le tamaititi e 7 tausaga le matua.

 

Na taua i fa’amaumauga a le fa’amasinoga e fa’apea, e fa’atolu ona po e le Tina ua molia foliga o le tamaititi na ia faia tala leaga i lana tama teine, ma vaaia ai le toto o le isu o le tamaititi na a’afia, ma mafua ai loa ona logo Leoleo mo se fesoasoani.

 

Na taunu’u Leoleo i le ekalesia na tula’i mai ai le fa’alavelave, ma latou taofia fa’apagota mai ai le Tina e pei ona taua, ma molia ai loa o ia e le malo i le moliaga mama e tasi o le fa’ao’olima i le tulaga tolu.

 

I le taimi o lana ulua’i iloiloga i le taeao nei, na fautuaina ai o ia e le afioga i le ali’i fa’amasino ia Fiti A. Sunia ina ia aua ne’i ona toe fa’atinoina se fa’aiuga o se mataupu i lona lava malosi, ae fa’afeso’ota’i le Ofisa o Leoleo mo se fesoasoani.

 

Ua tatalaina nei i tua le Tina na a’afia e aunoa ma se tupe e totogi i le fa’amasinoga, i lalo o tuutuuga ua fautuaina o ia e tatau ona usita’i i ai, ma o ni isi o ia tuutuuga e aofia ai le fa’asa lea ona ia toe taumafai e feso’ota’i le tamaititi na a’afia i lana gaioiga sa faia.

 

Ae ina ua mae’a ona fa’ailoa e le itu a le malo ni isi o tulaga taua e tatau ona silafia e le fa’amasinoga, e pei o le lolotu fa’atasi lea o le ua molia ma le aiga o le tamaititi na a’afia i le ekalesia e tasi, toe vavalalata fo’i nofoaga e nonofo fa’atasi ai i latou i totonu o le lotoa a le ekalesia, na manatu ai loa le fa’amasinoga e toe fa’aleaoga lana poloaiga e fa’asa ai ona toe fesoota’i le ua molia ma le tamaititi na a’afia, ae ua fautuaina o ia ina ia tausi le filemu i taimi uma, ma aua ne’i ona toe soli se tulafono.

 

ASENATI TOGIASO

 

O le tama’ita’i lea na fa’ao’olima i le isi tama’ita’i o le latou Ekalesia e ala i lona futi o lona ulu ma ta tu’i ona foliga, ua lapataia e le fa’amasinoga o ia ina ia “taofi le fia malosi ma aua ne’i ona toe fa’atinoina se fa’aiuga i lona lava malosi”, aua e leai se isi e sili atu i luga o le tulafono.

 

Na ulua’i tu’uaia e le malo ia Asenati Togiaso i moliaga mama e lua o le fa’ao’olima i le tulaga tolu, e mafua mai i le fa’alavelave lea na ia fa’ao’olima ai i ni tama’ita’i se to’alua o le latou Ekalesia. E pei ona taua i fa’amaumauga a le fa’amasinoga, o se taugaupu na tula’i mai i le va o Togiaso ma le tama’ita’i na a’afia, ma i’u i le fa’ao’olima ai loa o Togiaso i le tama’ita’i na a’afia, ae ina ua taumafai le isi tama’ita’i o le aulotu e taofi le vevesi, na fa’asaga atu Togiaso ma una’i ese le tama’ita’i lea ma pau atu ai i tua.

 

I lalo o se maliliega na sainia e Togiaso ma le malo, na ia malie ai e tali ioe i le isi moliaga mama o le fa’aoolima i le tulaga tolu, ae solofua a le fa’amasinoga le isi moliaga sa totoe ai i le pepa o tagi sa fa’aulu e le malo.

 

Na faatusa e le fa’amasinoga le gaioiga sa faia e le ua molia, o se gaioiga na atagia mai ai lona fia malosi. Na talia e le fa’amasinoga fautuaga a loia ina ia faanofovaavaaia le ua molia mo le 12 masina, i lalo o ni tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona ia toe soli se tulafono, fa’asa fo’i ona ia toe fa’atupuina se vevesi i le va o ia ma tama’ita’i e lua na a’afia.

 

E 15 aso na manatu le fa’amasinoga e taofia ai le ua molia i le falepuipui, peita’i ua fa’amalumalu lona tuliina o aso e 14, ae ua lava le aso e tasi lea na taofia ai o ia e Leoleo e fai ma ana fa’asalaga i lenei mataupu, atoa ai ma lona totogiina o le salatupe e $100 i totonu o le ulua’i 30 aso o lana nofovaavaaia.

Comment Here