NOFOVAAVAAIA LE ALI’I NA PISAPISAO LUGA O SE PASI

O le ali’i talavou e 22 tausaga le matua mai Vaitogi lea ua ta’usala e le fa’amasinoga i le moliaga o le fa’atupu vevesi i nofoaga faitele, e mafua mai i le fa’alavelave lea na ‘ona ai ma pisapisao solo i luga o se pasi la’u pasese a o tumu i le mamalu o le atunu’u, ua fautuaina e le fa’amasinoga o ia ina ia taofia lona toe faia o uiga le mafaufau, ae fa’aali amioga e iloa ai o ia o le talavou a’oa’oina lelei.

O le masina na te’a nei na taofia ai e Leoleo se pasi sa aga’i mai i Tafuna i luga o le auala i Nu’uuli, ina ua logo e se tasi o le pasese se ali’i o lo o ‘ona ma pisapisao solo ai i totonu o le pasi, ma ia faia ni uiga e ono save’u ai le nonofo filemu o tagata.

Na taofi e Leoleo le pasi ae ave i lalo le ua molia, ma ave sa’o loa i le Ofisa i Tafuna mo suesuega, sosoo ai ma le taofia o ia i le toese i Tafuna, e fa’atali ai le aso e tula’i ai i luma o le fa’amasinoga.

Na fautuaina e le afioga i le ali’i fa’amasino ia Fiti A. Sunia le ali’i o Fereti Toomalatai ina ia aua nei ona toe tagofia le ‘ava malosi poo ni fualaau fa’asaina i totonu o le 6 masina lea ua fa’anofovaavaaia ai o ia, aua fo’i ne’i ona toe solia se tulafono a le malo, pe na te toe faia ni uiga le mafaufau i nofoaga e tumu tumu ai le atunu’u, a ia avea o ia o se tasi e tausi le filemu ma usita’i i tulafono a le malo.

Ua fautuaina fo’i e le fa’amasinoga le ua molia ina ia saili sana galuega e galue tumau ai, ma auai i aoaoga e fesoasoani ai i a’afiaga o le ‘ava i lona olaga.

POLOAINA SE ALI’I MO FA’AMAUMAUGA O ANA TAUMAFAIGA

O se tasi o tuutuuga a le fa’amasinoga maualuga mo le nofovaavaai a Tavita Mapu mo le 5 tausaga, e le gata ia saili sana galuega e galue tumau ai ma maua ai sona totogi i le ulua’i 6 masina o lana nofovaavaaia, ae ia totogi fo’i lana salatupe e $1,000 i le fa’amasinoga.

O lea ua tuana’i le 3 tausaga o le nofovaavaaia a Mapu a o lea lava e le i maua sana galuega, e le i totogiina fo’i lana salatupe i le fa’amasinoga maualuga, ae ina ua fesiligia o ia i le vaiaso na te’a nei i le mafua’aga ua le maua ai sana galuega, ae na tali le ua molia, ua fiu e ave solo ana tusi talosaga i le tele o pisinisi, ofisa ma kamupani i le atunu’u, e leai lava se kamupani ua mana’o e fa’a faigaluega o ia.

Ona o lea tulaga, sa talosagaina ai loa e le afioga i le ali’i fa’amasino ia Elvis P. Patea le ua molia ina ia tu’uina atu i le fa’amasinoga fa’amaonia o ana tusi talosaga e tele ua mae’a ona tufatufa atu i pisinisi ma faleoloa i le atunu’u, se’i taumafai le fa’amasinoga e saili poo le a le mafua’aga ua le maua ai sana galuega, ae pe moni fo’i sa fai sana tufaga tusi apalai.

O Mapu na ta’usala e le fa’amasinoga i le 2013 i le moliaga o le talepe fale i le tulaga lua, e mafua mai i le fa’alavelave lea na latou osofaia ai ma ni isi ali’i talavou se to’alua se fale o se aiga i Peseta ae ave fa’agaoi oloa ma ni isi o meatotino sa i totonu.

E na o le 6 masina na taofia ai o ia i le toese ae o isi masina e 14 o lo o totoe o lana fa’asalaga faa falepuipui e 20 masina na faamalumalu le tuliina, fuafua lava i lona usitaia o tuutuuga a le fa’amasinoga.

Afai e faamaonia ua le usita’i Mapu i tuutuuga o lana nofovaavaaia, e ono faia se faaiuga a le fa’amasinoga e faaleaoga ai lana nofovaavaaia, ae poloaina loa o ia e tuli fa’amae’a masina e 14 o lo o fa’amalumalu.