Tala otooto mai le Fa’amasinoga

ausage@samoanews.com

MOLIA SE ALI’I I LONA FA’AO’OLIMA I LONA TO’ALUA.

 

O le ali’i mai Iliili lea o lo o tu’uaia i lona fasi o lona to’alua e ala i lona ta tu’i o foliga ma toso lona ulu i luma o lana fanau, ua tu’uaia nei o ia i le moliaga mama e lua o le fa’atupu vevesi i totonu o lona aiga, atoa ai ma le fa’ao’olima i le tulaga tolu.

 

E pei ona taua e le fafine na a’afia i Leoleo, e le o se taimi muamua lea ua faia ai e lona to’alua uiga saua ia te ia ma lana fanau, ae o le taimi muamua lenei fa’atoa mafai ai ona logo Leoleo e tusa ai o nei uiga le alofa ua tele tausaga o pagatia ai o ia.

 

O le vevesi na tula’i mai ina tula’i mai se taugaupu i le va o le ulugali’i i le afiafi o le aso Lulu na te’a nei, na i’u ina fa’ao’olima ai loa le ua molia i lona to’alua, e ala i lona ta tu’i o ona foliga toe futi lona ulu, sosoo ai loa ma lona una’i o ia i lalo a o pulapula mata o si ana fanau.

 

E le i manatu le fafine e vili Leoleo mo se fesoasoani, ae o aiga tuaoi na latou fa’afeso’ota’iina Leoleo mo se fesoasoani, atoa ai ma le latou fautuaina o le fafine ina ia fa’amalosi lona loto e fa’ailoa mea uma sa tutupu fa’asaga ia te ia, ma malie ai loa le fafine e faila lana tagi fa’asaga i lona to’alua.

 

Na teena e le ua molia tu’uaiga fa’asaga ia te ia, ma ua tatalaina nei o ia i tua e fa’atalitali ai le aso e toe valaau ai lana mataupu, ae ua poloaina e le fa’amasinoga o ia ina ia aua ne’i toe nofo i le fale o lo o nonofo ai lona to’alua ma lana fanau i lenei taimi, ae sili pe a saili se isi nofoaga e nofo ai a o fa’agasolo ai taualumaga o lana mataupu.

 

Ua faasa fo’i o ia ona ia toe taumafai e fa’afeso’ota’i lona to’alua ma lana fanau i soo se auala, aua ne’i ona toe solia se tulafono a le malo, aua fo’i ne’i ona toe tagofia le ‘ava malosi.

 

O le vaiaso muamua o Novema lea ua fa’atulaga e toe valaau ai lenei mataupu i luma o le fa’amasinoga fa’aitumalo.

 

YUSEFF CARTER

 

O le itula e 9:00 i le taeao nei lea ua fa’amoemoe e tula’i ai le ali’i o Yuseff Carter i luma o le fa’amasinoga maualuga, mo le tu’uina atu o lana tali e tusa ai o tu’uaiga fa’asaga ia te ia, i lona umia fa’asolitulafono lea o vaega o le pauta fa’asaina o le aisa, e mafua mai i le afifi lea na aumai i lana pusa meli i le vaiaso na te’a nei, lea na maua ai e ali’i Ofisa o le Tiute vaega o fualaau fa’asaina.

 

O ananafi na fa’atulaga e faia ai le ulua’i iloiloga a Carter i luma o le afioga i le ali’i fa’amasino ia Fiti A. Sunia, ae i le mae’a ai ona fautuaina o Carter e lana loia fautua, na ia manatu ai loa e fa’aagafua le fa’ataunu’uina o lana iloiloga, ae tu’u sa’o atu loa lana mataupu i luma o le fa’amasinoga maualuga e fa’aauau ai ana iloiloga o lo o totoe.

 

Ina ua fesiligia e Leoleo ia Carter e tusa ai o le afifi na aumai i lana pusa meli, na taua ai e le ua molia e fa’apea, o lo o ia fa’atali mo lana afifi o lo o lafo mai i lona Tama, peita’i o le afifi lea na aumai ma maua ai vaega o fualaau fa’asaina, e le o le afifi lea na ia fa’atalitali i ai.

 

E $5,000 le vaega tupe lea ua faatulaga e le fa’amasinoga e totogi ona fa’atoa mafai lea ona tatala Carter e fa’atalitali ai taualumaga o lana mataupu i luma o le fa’amasinoga.

Comment Here