Ads by Google Ads by Google

Tala otooto mai le Fa’amasinoga

ausage@samoanews.com

JOE TOGITOGI

 

O le taeao ananafi na faila ai e le malo le moliaga mamafa o le sola ese mai le falepuipui fa’asaga ia Joe Togitogi. O le moliaga o le sola ese mai le falepuipui, o se solitulafono D i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, po o le fa’asala fo’i i fa’asalaga uma ia e lua.

 

I fa’amaumauga a le fa’amasinoga o lo o taua ai e fa’apea, i le mae’a ai o le fa’amasinoga iloilo a Togitogi sa faia i le aso 29 Fepuari 2016, na ta’usala ai loa o ia e le fa’amasinoga maualuga i le moliaga mamafa o le fa’ao’olima i le tulaga lua.

 

O le aso 4 Aperila 2016 na lau ai le fa’asalaga a Togitogi, ma fa’asala ai loa o ia e le fa’amasinoga e taofia i le toese i Tafuna mo le umi e 5 tausaga. Ae i le aso 16 Aperila i le itula e 5:44 i le afiafi, na sola ese ai Togitogi mai le falepuipui i Tafuna, ma talosagaina ai loa se vaega o Leoleo ina ia sailia mai o ia.

 

I le po o le aso lava lea pe tusa o le itula e 9:25, na vaaia ai e ali’i Leoleo o le toese ia Togitogi o lo o auai i se fusuaga a ni isi o tupulaga i luma o se faleoloa i Nu’uuli, ma latou pu’e fa’apagota ai loa ma ia.

 

O le taeao o le aso Tofi o le vaiaso nei lea ua fa’atulaga e toe valaau ai le mataupu a Togitogi, mo le fa’atulagaina o le aso e faia ai lana iloiloga autu.

 

O lo o taofia pea Togitogi i le toese i Tafuna i le taimi nei e aunoa ma se tupe e tatala ai o ia i tua, ona o lo o fa’aauau pea le tuliina o lana fa’asalaga fa’a falepuipui e 5 tausaga.

 

TAUMAFAI SE ALI’I E OSOFA’I LONA USO I LE AGAESE

 

O le ali’i talavou e 24 tausaga le matua lea na ia taumafai fa’alua e osofa’i lona uso i le agaese, ua molia nei o ia e le malo i moliaga mama e lua o le fa’aoolima i le tulaga tolu atoa ai ma le fa’atupu vevesi i nofoaga faitele.

 

O le fa’alavelave lenei na tofu atu i le Ofisa o Leoleo i Tafuna i le taeao o le aso Gafua na te’a nei, ina ua vili e le ali’i na a’afia leoleo mo se fesoasoani, ona o gaioiga tau fa’amata’u a lona uso sa fai atu ia te ia, le ali’i o Vitale Vaima’a.

 

O le vevesi na tula’i mai i le taimi sa faatino ai galuega a le au uso i totonu o le latou aiga, na fa’ai’u ai loa i se taugaupu, ma i’u i le alu atu ai o le ali’i ua molia ma le agaese ma taumafai e osofa’i lona uso.

 

Na tete’e Vaima’a i moliaga ua tu’uaia ai o ia e le malo ina ua tula’i i luma o le fa’amasinoga fa’aitumalo i le taeao ananafi, ma faia ai loa le poloaiga a le fa’amasinoga e tatala o ia i tua e aunoa ma se tupe na totogiina.

 

Na fesili le afioga i le ali’i fa’amasino ia Fiti A. Sunia ia Vaima’a i le mafua’aga na fula ai lona mata agavale, ae na tali le ua molia, na mafua mai i le la vevesi ma lona uso. Na fautuaina o ia e le fa’amasino ina ia tausi le filemu i totonu o le aiga aemaise ai lava le la va ma lona uso.

 

O le aso 3 Novema 2016 lea ua fa’atulaga e toe tula’i ai Vaima’a i luma o le fa’amasinoga fa’aitumalo mo le isi ana iloiloga.

 

JOHN MANOA

 

O le ali’i e 24 tausaga le matua lea na maua atu o lo o moe i totonu o le fale talimalo a le isi aiga i Sogi, Leone, ua tu’uaia nei o ia e le malo i le moliaga mama o le talepe fale fa’apea ai ma le fa’atupu vevesi i nofoaga faitele.

 

I fa’amaumauga a le fa’amasinoga o lo o taua ai e fa’apea, na fa’ateia le fafine e ana le fale ina ua usu atu i le taeao o le aso To’ona’i na te’a nei e siaki le isi ona fale, ae te’i ina ua ia maua atu ai le alii o John Manoa o lo o moe mai ai.

 

Na fafagu e le fafine le ua molia e alu ese ma le fale, peita’i na e e i ai le ua molia, ma vili ai loa e le fafine le ofisa o leoleo mo se fesoasoani. Na taunu’u leoleo ma latou maua atu ai Manoa o lo o taoto mai i totonu o le fale, fa’atasi ai ma le malosi o le manogi ‘ava malosi o lo o sau mai lona tino.

 

Na taumafai leoleo e fafagu le ua molia, ae ina ua ala i luga, sa ia e e i leoleo ma tafiti solo a o taumafai leoleo e pu’e fa’apagota o ia. O lo o taua i fa’amaumauga a le fa’amasinoga le talepe e Manoa o le faitoto’a o le fale ae ulufale fa’amalosi ai e aunoa ma e fa’atanaga ma moe ai i totonu.

 

O ni isi o tuutuuga ua tatala ai nei Manoa i tua mai le toese, o le fa’asa lea ona toe alu i le fale o le aiga na tula’i mai ai le fa’alavelave, fa’asa fo’i ona ia toe tagofia le ‘ava malosi, a ia avea o ia ma tagatanu’u lelei e tausisi ma fa’amaoni i tulafono a le malo.

 

SHAUN LAOLAGI

 

A o le i tatalaina e le fa’amasinoga fa’aitumalo i le taeao ananafi le ali’i o Shaun Laolagi mai le toese i Tafuna, na fautuaina o ia e le afioga i le ali’i fa’amasino ia Fiti A Sunia ina ia tausisi ma usita’i i poloaiga ua mae’a ona tu’uina atu ia te ia.

 

O le fa’atamala o Laolagi e totogi le tupe e silia i le $2,000 lea na poloaina o ia e toe totogi i le tagata sa tagi i le mataupu na a’afia ai o ia, na mafua ai loa ona poloaina le taofia o ia i le toese i Tafuna.

 

Na fa’ailoa e Sunia ia Laolagi ananafi e fa’apea, o se tasi o tuutuuga o lana nofovaavaaia mo le umi e 6 masina, o lona totogiina lea o le tupe na poloa’i o ia e totogi.

 

“E tatau ona e malamalama i le taua o soo se poloaiga a le fa’amasinoga, ina ia aua ai ne’i e toe a’afia i le tulafono i le lumana’i, ona e taua tele i le fa’amasinoga le tatau lea ona e mulimuli ta’i i ana fa’atonuga e tu’uina atu”, o le saunoaga lea a Sunia ananafi, ma ia poloaina ai loa le tatala o Laolagi i tua, fa’atasi ai ma le poloaina ina ia usita’i e totogi le tupe ua mae’a ona fa’atonuina o ia e totogi.