Tala otooto mai le Fa’amasinoga


[ata: foa'i]
ausage@samoanews.com

ELLIOTT SIAUMAU JR

 

Ua talia e le fa’amasinoga maualuga i le vaiaso na te’a nei le talosaga na finauina e le ali’i loia fautua ia Douglas Fiaui, mo se avanoa e fa’aleaoga ai e le fa’amasinoga lana poloaiga sa tuuina atu i le aso 27 Mati e pu’e fa’apagota mai ai le ali’i o Elliott Siaumau Jr, ina ua le auai o ia i lana iloiloga sa fa’atulaga i le aso lea.

 

O se tasi o tuutuuga o lo o tatala ai Siaumau Jr mai le fa’amasinoga maualuga, ia auai i soo se taimi valaau ai lana mataupu.

 

Ae na taua e Fiaui e fa’apea, o le aso ma le taimi lea na le tula’i ai Siaumau Jr i luma o le fa’amasinoga maualuga, o le aso fo’i lea ma le taimi na valaau ai lana mataupu i luma o le fa’amasinoga fa’aitumalo.

 

Na faamalulu le ali’i loia ia Fiaui i le fa’amasinoga e tusa ai o lea fa’aletonu, peita’i sa ia taua e fa’apea, ana leai le mataupu sa valaauina i luma o le fa’amasinoga fa’aitumalo, e le mafai ona fa’atamala ia Siaumau Jr mai lona auai i lana iloiloga.

 

Na lagolagoina e le loia a le malo ia Christy Dunn le talosaga a Fiaui ina ia fa’aleaoga le poloaiga na saini e pu’e fa’apagota ai Siaumau Jr. Pau lana talosaga sa fa’ailoa i le fa’amasinoga, ia toe ave se fautuaga i le ua molia, ona o le tele o taimi e vaaia ai lava lona tuai atu i le fale faamasino.

 

Na ioeina e le afioga i le ali’i fa’amasino ia Elvis P. Patea le manatu mai le loia a le malo, e fa’atatau i le tuai soo atu o Siaumau Jr i aso e faia ai ana iloiloga.

 

“O le taeao muamua lenei ua ou vaaia ai oe ua e vave mai i le potu fa’amasino, ae o le tele lava o aso e valaau ai lau mataupu e te tuai mai ai lava”, o le saunoaga lea a Patea ia Siaumau Jr, ma ia tuuina mai loa le faaiuga e faaleaoga ai le poloaiga e pu’e fa’apagota ai o ia, ae ua toe tolopo lana mataupu e toe valaau i le aso 31 Me.

 

O loo fa’atalitali se faaiuga a le fa’amasinoga pe faaleaoga le nofovaavaai a le ua molia, i se faaiuga o lana mataupu i luma o le fa’amasinoga fa’aitumalo, atoa ai ma lana mataupu i luma o le fa’amasinoga maualuga.

 

O le masina o Tesema o le tausaga na te’a nei na molia ai le ua molia i lona tete’e atu i leoleo, e mafua mai i le fa’alavelave lea na alu atu ai ma aveese mai lona atalii ao i ai i lalo o le vaavaaiga a leoleo.

 

O le masina o Fepuari o le tausaga nei, na toe molia ai foi o ia i le moliaga o le faatupu vevesi i nofoaga faitele ma le faaoolima i le tulaga tolu, ma o lo o fa’agasolo i luma o le fa’amasinoga faaitumalo lana mataupu lea.

 

MUKA GODINET

 

E 2 tausaga le ua faanofovaavaaia ai e le fa’amasinoga maualuga le ali’i o Muka Godinet, ina ua ta’usala o ia i le moliaga mama o lona talia lea o ni meatotino sa ave faagaoi e se isi tagata.

 

O ni isi o tuutuuga o lana nofovaavaaia e aofia ai lona totogiina o le salatupe e $1,000, atoa ai ma lona toe totogi o le tupe e $61 mo oloa sa ia taliaina. E pei ona taua e le malo, o le faleoloa o le Pacific Products Inc na osofa’i e ni isi o ali’i, ma latou fa’asoa atu ai oloa sa gaoi ia Godinet e pei ona a’afia ai o ia.

 

Na fa’atoese le ua molia e tusa ai o lana solitulafono, ma ia talosagaina ai se isi avanoa mo ia e fa’aauau ai lana tausiga i lona Tina ma lona atali’i.

 

Na tutu faatasi loia a itu e lua e finau i le fa’amasinoga mo se fa’asalaga faanofovaavaaia, lea fo’i na talia e le afioga i le ali’i fa’amasino ia Elvis P. Patea. Na taua e le loia a le ua molia ia Douglas Fiaui e fa’apea, talu mai tausaga e 33 o le soifua o le ua molia, o se taimi muamua lenei fa’atoa ta’usala ai o ia i se solitulafono.

 

Saunoa Patea e fa’apea, atonu o le sese o le faaiuga sa faia e le ua molia ua mafua ai ona aafia o ia i lenei solitulafono. Ua fautuaina o ia ina ia aua fo’i nei toe fesoota’i i ana uo na mafua ai ona a’afia o ia i lenei solitulafono.

Comment Here