Tala otooto mai le Fa’amasinoga

ausage@samoanews.com

KARISI TIAALII

 

O le aso 26 Aperila lea ua fa’atulaga e tu’uina atu ai le fa’asalaga a le fa’amasinoga maualuga fa’asaga i le ali’i o Karisi Tiaalii, i le mae’a ai lea ona ta’usala o ia i moliaga mamafa e lua i le vaiaso na te’a nei o le fa’aoolima i le tulaga lua atoa ai ma lona taofia faasolitulafono o se tagata.

 

I le mae’a ai ona talia e le fa’amasinoga maualuga o le tali ioe a Tiaalii i lalo o se maliliega na latou sainia ma le malo, na solofua ai loa e le fa’amasinoga isi moliaga mamafa sa totoe ai i le tagi na fa’aulu e le malo fa’asaga ia Tiaali’i, le moliaga o le faaoolima i le tulaga muamua atoa ai ma le moliaga o le gaoi.

 

I le tali ioe ai o le ua molia i moliaga e pei ona ta’usala ai o ia e le fa’amasinoga maualuga, sa ia ta’utino ai e fa’apea, i se taimi o le aso 12 Tesema o le tausaga na te’a nei, sa ia fa’aoo ai manu’a i lana uo tama’ita’i, e ala i lona ta tu’i o ona foliga i le dash board o le ta’avale.

 

Na taua atili e Tiaalii e fa’apea, sa ia futi le ulu o lana uo ma taumafai e taofi o ia ina ia aua ne’i alu ese ma le ta’avale.

 

Na taua e le ali’i e 25 tausaga lona matua, lona malie atoatoa e tusa ai o le fautuaga a lana loia fautua ia Douglas Fiaui sa tuuina atu e tusa ai o lenei mataupu. Na fa’aalia e le loia a le malo ia Christy Dunn le malie o le malo e finau i le fa’amasinoga mo se fa’asalaga fa’anofovaavaaia, peita’i ua malamalama le ua molia, e le mafai ona toe suia lana tali ioe ua tuuina atu i le fa’amasinoga, pe afai e tuuina mai se fa’asalaga e le tusa ma lona mana’o.

 

O lo o taofia pea Tiaalii i le toese i Tafuna e fa’atali ai le aso lea ua fa’atulaga e tuu’ina atu ai le fa’asalaga a le fa’amasinoga fa’asaga ia te ia.

 

O le afioga i le ali’i Fa’amasino ia Elvis Patea o lo o taulimaina lenei mataupu, fa’atasi ai ma le lagolagosua a afioga i ali’i Fa’amasino Lagolago ia Suapaia Pereira ma Satele Lili’o Satele.

 

MOLIA SE ALI’I I LE GAOI

 

Ua molia nei e le fa’amasinoga se ali’i e 24 tausaga i le gaoi ma le talepe fale, e mafua mai i le fa’alavelave lea na la osofaia ai ma se tamaititi e 14 tausaga se fale i Pago Pago ae ave fa’agaoi meatotino sa i totonu.

 

O le vaiaso na te’a nei na tula’i ai Mark Uati i luma o le fa’amasinoga fa’aitumalo, ma ua toe tolopo lana mataupu e toe fofogaina i le vaiaso nei, lea ua fa’atulaga ai lana ulua’i iloiloga i luma o le afioga i le ali’i Fa’amasino ia Fiti Sunia. E le o mautinoa mai i le taimi nei pe ua molia e le malo le ali’i talavou e 14 tausaga o lo o tu’uaia na fesoasoani ia Uati i lenei mataupu.

 

Ae na fa’amatala e le ali’i talavou e 14 tausaga i Leoleo lo la ulufale fa’amalosi ma Uati i totonu o le fale ma ave faagoai ai ni isi o meaaoga e aofia ai se laptop, o se ato o lo o i ai se tinoitupe i totonu, faapea ai ma isi lava mea aoga e sili i le $100 lona tau aofa’i.

 

O le tele o meaaoga na gaoia ua toe fa’afo’i i le aiga, sei vagana ai le tino na taua e Leoleo e lei mafai ona toe maua.

 

E $10,000 le vaega tupe lea ua fa’atulaga e totogi ona fa’atoa mafai lea ona tatala Uati i tua, ma o lo o taofia pea o ia i le toese i Tafuna e fa’atali ai le aso lea ua fa’atulaga e toe tula’i ai i luma o le fa’amasinoga fa’aitumalo.

Comment Here