Ads by Google Ads by Google

Tala otooto mai le Fa’amasinoga

ausage@samoanews.com

TU’UAIA SE FAFINE FA’AO’OLIMA I LONA TO’ALUA

 

E 41 o se Tina e to’alua ona alo na taofia e Leoleo i le vaiaso na te’a nei, ona o tu’uaiga i lona fa’ao’olima lea i lona to’alua.

 

E pei o na masani ai sauaga i totonu o aiga, o le Tama lava e masani ona loka ma tu’uaia e Leoleo i le faia o sauaga fa’asaga i fafine ma fanau, e pei ona molimauina i le tele o mataupu ua mafai ona oo atu i luma o le Fa’amasinoga i tausaga ua mavae. Ae o le tulaga e pei ona molia ai lenei Tina, ua atagia mai ai le ese fo’i o tulaga o lenei aiga.

 

O se aiga tuaoi na latou logoina le Ofisa o Leoleo i Tafuna mo se fesoasoani, ina ua latou fa’alogoina le leoleoa o le Tina ma lafo upu palauvale i totonu o le latou fale. Na manatu le aiga tuaoi, o loo fasi e le Tama lona to’alua, ae na faatoa manino le mata o le vai ina ua taunu’u Leoleo ma latou molimauina ai manu’a ma le toto i foliga o le tamaloa.

 

Na fesili Leoleo i le tamaloa pe aisea ua manu’a ai ona foliga, ae na tali le tamaloa, sa fa’aoolima lona to’alua ia te ia. O le mae’a ai o suesuega a Leoleo i le mafua’aga o le fa’alavelave, na taofia faapagota ai loa le Tina i le afiafi o le aso Tofi na te’a nei, ma tula’i ai loa o ia i luma o le Fa’amasinoga Fa’aitumalo i le taeao o le aso Faraile na sosoo ai.

 

Na teena e le Tina moliaga e lua o le faaoolima i le tulaga tolu atoa ai ma le fa’atupu vevesi i totonu o lona aiga fa’asaga ia te ia, ma ua tolopo lana mataupu e toe valaau i le aso 29 Mati i le itula e 8:30 i le taeao.

 

O ni isi o tuutuuga ua tatala ai le Tina i tua, o le fa’asa lea ona ia taumafai e faafesoota’i lona to’alua i soo se auala, ma ia saili se isi nofoaga e nofo ai a’o fa’agasolo ai lona fa’amasinoga.

 

I faamaumauga a le fa’amasinoga o lo o taua ai e fa’apea, o se taugaupu i le va o le ulugali’i ina ua manava atu le tamaloa i le fale e ‘ona, na mafua ai le vevesi, ma i’u ina taumafai ai loa le tamaloa e faaoolima i lona to’alua. Peita’i ane na fa’asaga atu le fafine ma una’i lona to’alua i lalo ae tatu’i ona foliga.

 

SANI TULI

 

E 30 aso i le fale puipui lea ua faasala ai e le Fa’amasinoga Fa’aitumalo le ali’i o Sani Tuli, ina ua fa’amaonia e le fa’amasinoga tuuaiga o lona le usitaia lea o tuutuuga o lana nofovaavaaia sa tuuina atu i le tausaga na te’a nei.

 

E pei ona maua i ripoti a le Ofisa Nofovaavaaia, o le masina o Fepuari 2017 na faanofovaavaaia ai e le Fa’amasinoga Fa’aitumalo ia Tuli mo le 16 masina, ina ua ta’usala o ia i le moliaga o le faaoolima i le tulaga tolu ma le faatupu vevesi i nofoaga faitele.

 

O ni isi o tuutuuga o lana nofovaavaaia o le faasa lea ona ia toe soli se tulafono, a ia avea o ia ma tagatanu’u lelei e tausisi i tulafono uma a le malo. E 6 masina talu ona nofovaavaaia ia Tuli ae toe molia o ia i le faaoolima ma le faatupu vevesi, ma toe faanofovaavaaia ai fo’i o ia mo le 18 masina, ina ua fa’amaonia e le Fa’amasinoga moliaga mama ia e 2 fa’asaga ia te ia.

 

O le masina na te’a nei na fa’atoa faila ai e le Ofisa Faanofovaavaaia le talosaga i luma o le Fa’amasinoga Faaitumalo, ina ia fa’aleaoga le ulua’i nofovaavaaia a Tuli, ona o lea ua faamaonia lona le usitaia o tuutuuga sa tuuina atu ia te ia.

 

Na faailoa e le afioga i le ali’i Fa’amasino ia Fiti Sunia ia Tuli i le vaiaso na te’a nei e fa’apea, o le 30 aso lea ua faasala ai o ia i le falepuipui, ua na o se lapataiga lea mo ia, ae afai na te toe soli se isi tuutuuga o lana nofovaavaaia, e mafai e le Fa’amasinoga ona faa falepuipui o ia mo le 18 masina.