Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

IOE AFA FUIMAONO I LE MOLIAGA O LE FAAOOLIMA

 

O le aso 4 Me lea ua faatulaga e tuu atu ai le faasalaga a le fa’amasinoga maualuga fa’asaga i le susuga a Afa Fuimaono, i le mae’a ai lea ona ta’usala o ia i le moliaga mamafa o le faaoolima i le tulaga lua.

 

Na ulua’i tuuaia e le malo ia Fuimaono i le moliaga pito mamafa o le faaoolima i le tulaga muamua, le moliaga e mafai ona faasala ai o ia i le toese mo le olaga atoa, poo le faasalaga faa falepuipui e oo atu i le 30 tausaga le umi.

 

Ae i lalo o se maliliega na sainia e Fuimaono ma le malo ma talia e le fa’amasinoga maualuga, na malie ai le ua molia e tali ioe i le moliaga ua toe teuteu e le malo, le solitulafono o le faaoolima i le tulaga lua, lea e mafai ona fa’asala ai o ia i le toese mo le umi e le silia i le 5 tausaga, pe faasala i le salatupe e le silia i le $5,000.

 

I le tali ioe ai o Fuimaono i le moliaga e pei ona ta’usala ai o ia e le fa’amasinoga na ia ta’utino ai e fa’apea, i se taimi o le aso 22 Tesema 2017 i lona ma’umaga i Mapusaga Fou, sa ia faaoo ai manu’a tuga i le tino o le alii o Elisara Paselio, e ala i lona fa’aaoga o se agaese e faaoo ai manu’a ia te ia.

 

O se feeseeseaiga i le fanua i le va o le ua molia ma le ali’i na a’afia, na mafua ai ona tula’i mai lenei fa’alavelave, e pei ona fa’aalia e Fuimaono i luma o le fa’amasinoga.

 

O lo o taofia pea Fuimaono i le toese e fa’atali ai le aso lea ua fa’atulaga e lau ai lana fa’asalaga.

 

Ua malilie itu e lua e talosaga i le fa’amasinoga mo se fa’asalaga mama mo Fuimaono, peita’i ua malamalama le ua molia, tusa lava pe finau loia i le fa’amasinoga mo se fa’asalaga mama mo ia, e le mafai ona toe suia lana tali ioe ua tuuina atu i le fa’amasinoga, pe afai e tuuina mai se faaiuga a le fa’amasinoga ae le tusa ai ma lona mana’o.

 

METHODIST KUKA MIKA

 

O le aso 20 Aperila o le tausaga nei lea ua fa’atulaga e lau ai le fa’asalaga a le ali’i o Methodist Kuka Mika i luma o le Fa’amasinoga Maualuga, i le mae’a ai lea ona ta’usala o ia i le moliaga mamafa o lona umia fa’asolitulafono o vaega o le laau fa’asaina o le mariuana.

 

I le tali ioe ai o Mika i le moliaga e pei ona ta’usala ai o ia e le Fa’amasinoga, i lalo o se maliliega sa latou sainia ma le malo, sa ia ta’utino ai e fa’apea, i se taimi o le aso 31 Tesema 2017 i Amerika Samoa, sa ia umia fa’asolitulafono ai se vaega o le laau fa’asaina o le mariuana.

 

Na ta’utino atili Mika sa maua e Leoleo ia te ia se paipa o loo i ai vaega o le mariuana, ina ua sailia e Leoleo o ia i le po na tula’i mai ai le fa’alavelave.

 

E le o le taimi muamua lenei ua molia ai e le malo ia Mika i le moliaga o le umia faasolitulafono o mariuana.

 

O le tausaga na te’a nei na molia ai fo’i o ia e le malo, e mafua mai i le fa’alavelave lea na maua ai ni mariuana ia te ia, ina ua taofi e Leoleo se ta’avale sa tietie ai i le aso 12 Setema 2017 ona o le leotele o le mafa.

 

E ui sa maua i le tino o Mika vaega o fualaau fa’asaina, peita’i na solofua e le afioga i le ali’i fa’amasino ia Fiti Sunia le tagi a le malo fa’asaga ia te ia i le taimi o lana ulua’i iloiloga, ina ua talitonu le Fa’amasinoga, e le tusa ma le tulafono le auala na fa’aaoga e Leoleo e saili ai le tino o Mika i le aso na fesiligia ai o ia.