Ads by Google Ads by Google

Tala otooto mai le Fa’amasinoga


[ata: SN]
ausage@samoanews.com

VAITELE TAGO

 

I le mae’a ai o aso e 152 lea na taofia ai Vaitele Tago i totonu o le toese i Tafuna, e fa’atalitali ai taualumaga o lana mataupu, o le vaiaso nei lea na faia ai le poloaiga a le afioga i le ali’i Fa’amasino ia Fiti Sunia, ina ia tatalaina o ia i tua mai le falepuipiu.

 

Ae talu ai o loo i ai le isi mataupu o loo aafia ai fo’i Tago i le fa’amasinoga maualuga, o le mafua’aga lea o le a le mafai ai ona tatala o ia i tua, se’i vagana ua mae’a taualumaga o lana mataupu o lo o fa’agasolo i luma o le fa’amasinoga maualuga i le taimi nei.

 

Na tuuaia e le malo ia Tago i moliaga mama e fa e aofia ai le faatupu vevesi i nofoaga faitele, lua moliaga o le faaoolima i le tulaga tolu, atoa ai ma le moliaga o le tete’e atu i Leoleo ao taumafai e pu’e faapagota o ia.

 

I lalo o se maliliega na sainia e Tago ma le malo, na malie ai le ua molia e tali ioe i le moliaga o le faatupu vevesi i nofoaga faitele, ae solofua e le Faamasinoga isi moliaga o lo o totoe ai i le pepa o tagi sa fa’aulu e le malo.

 

I le tali ioe ai o Tago i le moliaga o le fa’atupu vevesi i nofoaga faitele, sa ia ta’utino ai e fa’apea, i se taimi o le aso 29 Setema o le tausaga na te’a nei i Nuuuli, sa ia faia ai ni gaioiga e lepeti ai le nonofo filemu o tagata ma aiga tuaoi. E le gata sa ia leoleoa ma leotele, ae sa ia lafo fo’i upu masoa ma avea ma itu na le maua ai se nonofo filemu o tagata ma lona aiga.

 

Na faatoese le ua molia i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia faatoese foi i lona aiga aemaise ai lona Tina ina ia fa’amagalo o ia.

 

Saunoa Sunia e fa’apea, e le o se taimi muamua lenei ua tula’i ai Tago i luma o le fa’amasinoga. I le silasila atu fo’i a le Fa’amasinoga, ua fa’atele ona tula’i o ia i luma o le fa’amasinoga ona o solitulafono e pei ona ta’usala ai o ia.

 

E 6 masina lea ua faanofovaavaaia ai Tago, o se tasi o tuutuuga o lana nofoaiga o lona tuliina lea o se fa’asalaga faa falepuipui e 152 aso, o le umi fo’i lea sa taofia ai o ia i totonu o le toese.

 

Ua fautuaina o ia e le fa’amasinoga e aua ne’i ona toe soliina se isi tulafono a le malo, a ia avea o ia ma tagatanu’u lelei e tausisi i tulafono i taimi uma.

 

NOFOVAAVAAIA LE ALI’I NA FAAOOLIMA I LONA TO’ALUA

 

O le ali’i e 43 tausaga le matua mai Tafuna lea na tu’uaia i lona faaoolima i lona to’alua, ua faanofovaavaaia nei o ia mo le 12 masina e aofia ai lona tuliina o aso e 10 i le toese i Tafuna, ina ua ta’usala o ia i le moliaga o le faaoolima lea i lona to’alua. O isi tuutuuga o le nofovaavaaia e le ua molia, o le faasa lea ona ia toe faia ni gaioiga e fa’afefe pe fa’amata’u ai lona to’alua ma lana fanau, a ia avea o ia o se tagata e tausisi i tulafono a le malo i taimi uma.

 

O le vevesi na tula’i mai ina ua manava mai le ua molia i le fale e ‘ona, ma amata ai loa se taugaupu i le va o ia ma lona to’alua, ma i’u i lona po ai o foliga o lona to’alua ao sii e le fafine le la tama e 2 tausaga le matua.

 

Na faailoa e le fafine na a’afia i Leoleo e faapea, e le o se taimi muamua lea ua fasi ai o ia e lona to’alua. O le tausaga e 2011 na ta’usala ai fo’i le ua molia i le moliaga o le faatupu vevesi i totonu o lona aiga, e mafua mai i le fa’alavelave lea na ia faaoolima ai i lona to’alua.

 

Ua fautuaina e le fa’amasinoga le ua molia ina ia auai i ni aoaoga fa’a faufautua e fesoasoani ai i aafiaga o le ‘ava malosi ma le ita i lona olaga.