OKESENE ALO

Ua talia e le Faamasinoga Maualuga le talosaga na fa’aulu e le alii loia ia Richard deSaulles, ina ia aloaia le le toe avea o ia ma loia fautua a le ali’i o Okesene Alo, ae sili pe a tofia e le Fa’amasinoga se isi na te tauaveina le mataupu a Alo.

Na faailoa e deSaulles e faapea, ua tele masina talu ona ia tauaveina mai le mataupu a Alo ae le’i totogiina lava e le ua molia o ia. O le tama’ita’i loia ia Sharron Rancourt lea ua malaga ese ma le atunu’u sa avea muamua ma loia a Alo, ao lei suia mai ia deSaulles.

Na faailoa e Alo i le fa’amasinoga, ua uma ona la talanoa ma le alii loia ia deSaulles e faatatau i le totogiina o ia pe a fo’i mai lona uso Faifeau o loo i Amerika. Ae na toe faailoa e le ali’i loia ia deSaulles e faapea, na folafola mai lava e Alo le tala lea ia te ia i le tele o masina ua tuana’i atu, e oo mai lava i le taimi nei e lei totogiina lava o ia.

O le ali’i loia fautua ia Douglas Fiaui lea ua tofia e le fa’amasinoga e avea ma loia fautua a Alo. O Alo e to’afa i ai leoleo a le malo sa galulue i le Falepuipui o Tamaiti i Tafuna (JDC), o lo o tu’uaia i moliaga eseese e aofia ai fualaau fa’asaina ma le faia o uiga mataga i tama’ita’i.

O se tasi o talosaga na iloiloina i luma o le fa’amasinoga maualuga i le vaiaso nei e fa’atatau i le mataupu a Alo, o le finau lea o le alii loia ia deSaulles mo se avanoa e fa’ataga ai ona fa’amatuu mai faamatalaga tusitusia a tamaiti e to’afa o loo tu’uaia le a’afia i lenei mataupu, ina ia mafai ona vaavaai toto’a i ai le itu tete’e.

O ia faamatalaga tusitusia ua maea ona tauaao atu e le malo i luma o le afioga i le ali’i fa’amasino ia Elvis Patea. Na faailoa e Patea i le isi iloiloga o lenei mataupu e faapea, e le mafai ona faamatuu mai e le faamasinoga faamaumauga o loo talosagaina e le itu tete’e, sei vagana ua tuu atu se poloaiga a le Fa’amasino Sili.

Saunoa Kruse e fa’apea, e mafua ona faaeteete Patea e faamatuu mai faamaumauga e faatatau i faamatalaga a tamaiti o loo aafia, ona o loo puipui fo’i le fa’amasinoga i aia tatau o fanau laiti i lalo o le tulafono.

Ua taoto atu nei i se faaiuga a le fa’amasinoga lea talosaga, se’i iloilo ma vaavaai toto’a i ai, ona fa’atoa tuuina mai ai loa lea o se fa’aiuga.

ELLIOTT SIAUMAU

Ua taoto atu nei i se faaiuga a le fa’amasinoga maualuga le talosaga na faila e le itu a le malo, mo se poloaiga e faaleaoga ai le avanoa o loo tatala ai Elliott Siaumau i tua, ae poloaina le taofia o ia i le toese e aunoa ma se tupe e fa’atulaga.

E mafua lea tulaga e pei ona finau le loia a le malo ia Christy Dunn, ona o se tasi o tuutuuga na tatala ai Siaumau i tua mai le toese ina ua mae’a ona faila e le malo le latou tagi fa’asaga ia te ia i le tausaga na te’a nei, o le fa’asa lea ona ia toe soli se tulafono.

O le amataga o le tausaga nei e pei ona taua e Dunn, na toe faila ai e le malo le isi tagi fou fa’asaga ia Siaumau, e pei ona tuuaia ai o ia i le faatupu vevesi ma le faaoolima i le tulaga tolu.

Na finau le loia a Siaumau ia Douglas Fiaui e fa’apea, e le o mafai e le malo ona faamaonia a latou tuuaiga faasaga ia Siaumau, se’i vagana ai pepa o loo latou taua ua uma ona tusia ai le latou tagi, ae leai ni faamaumauga maumaututu poo ni molimau e fesiligia e fa’amaonia mai ai ia tu’uaiga.

Ona o ia tulaga, na talosaga ai loa Fiaui i le fa’amasinoga ina ia teena le talosaga a le malo.